Yibru Yerrcha 10:25 - Burarra

²⁵ Rrapa gun-gata minypa ngayburrpa nguburr-mulpiya nguburr-workiya nuluwa Wangarr, gun-narda ngayburrpa gala barra ngubu-bawa minypa aburr-werranga gubu-bawuja aburr-workiya. Wurra jarra mu-nguy derta nguburr-negiya barra nguburr-ni gu-gapa gu-guta minypa gun-guniya gugu ngubi-nacha nguburr-nirra ngardawa yi-gurrepa gu-jirra gu-boya nula Jesus ana-jeka barra.

Yibru Yerrcha 10:25 Iomraidhean Croise

Metiyu 10:15

Ngardawa ngaypa ngu-weya ana-gorrburrwa gun-burral: Jurdach guna-bamburda Wangarr barra burr-mari a-wengga, birripa gu-gata burr-yika gu-rrawa burr-guya gun-nerra gu-ni barra burrwa; aburr-gata mu-ngoyurra aburr-ni rrawa Jorram (Sodom) rrapa Gumóra (Gomorrah), birripa marr gu-yinda barra gun-nerra gu-ni burrwa!

Metiyu 18:20

Ngardawa yina abirri-gaya abirri-bamagutuwiya abirri-workiya minypa abirri-jirrapa gu-galiya yerrcha, waygaji abirri-jirrapa an-ngardapa, minypa marr aburr-balcharra apula ngaypa ngu-welangga, ngaypa ng-gatiya wugupa burrwa.”

Jon A-wukurrjinga A-ngurrjinga Jesus Christ (John) 12:48

Wurra an-gata gala marr a-balcha apula rrapa gala janguny gu-borrwa apula, nipa jarra a-rrimanga an-mari a-ni barra nula, minypa jurdach gu-jirra ngorrngurra mari gu-ma barra. Minyja gun-ngaypa wengga ngaypa mu-ngoyurra ngu-wena, gu-gurdiya ngacha minypa mari gu-garra barra nula an-gata an-gugaliya.

Jama Aburr-ji 16:16

Nuwurra gun-nerranga gu-ni, nyiburr-bona gu-maywapa gata Wangarr abu-wengganana aburr-workiyana. Wurra gojilapa nyiburr-bamuna, jin-nerranga jin-mujama jin-guyinda galamurrpa nyibu-garrana, nipa walkwalk ji-bama. Minypa walkwalk nyanma jiny-yena jiny-yorkiyana, wurra gama gorlk mu-ngoyurra gu-ngurrjinga burrwa jiny-yorkiyana barrwa gu-yinmiya barra. Minypa gun-narda burr-rrupiya jama jiny-ji jiny-yorkiyana rrapa aburr-yigipa jaga aburr-ganana achila aburr-workiyana rrupiya wana mbi-menga aburr-workiyana.

Jama Aburr-ji 2:1

Nuwurra waypa janara gu-ji gun-gata birripa gubu-ngurrjinga aburr-workiya Bentikoch (Pentecost), an-gatiya wupa marr abirriny-balcha nula Jesus aburr-gakakiyana gurda, gu-ngardapa aburr-negiyana.

Jama Aburr-ji 2:42

Lika gu-gata wenga aburr-galiyana burrwa aburr-ni aburr-workiyana Jesus burr-yika aburr-mujama marn․gi marn․gi burrbi-negarra aburr-ni janguny. Rrapa minypa aburr-gunggachichiyana burrwa aburr-workiyana gu-gapa gu-guta; rrapa minypa gu-ngardapa aburr-negiyana aburr-workiyana, Christ an-munyjurr mbi-barra aburr-workiyana; rrapa minypa Nyanyapa arrku abu-wengganana aburr-workiyana gu-ngardapiya.

Jama Aburr-ji 20:7

Gun-gata Jarradi (Saturday) gu-wulebiyana, yi-rrana gu-ni gugu Jandi (Sunday), ngayburrpa nyiburr-jaranga Jesus nyiburr-yika gu-galiya yerrcha nyiburr-gata gu-ngardapa nyiburr-negiyana, Jesus an-munyjurr nyibu-bay barra. Rrapa gatiya Paul a-wena burrwa gun-baykardakarda, ngardawa gu-borrwurra nuwurra guna-gepa burr-bawa barra a-boy. Minypa a-wena a-ni, gornborrk gu-ni,

Rowm Aburr-guyinda 12:8

rrapa an-nerranga nipa barra gelama gelama burr-bay, rrapa an-nerranga nipa barra burr-wu aburr-gata aburr-nyagara, wurpa lika minypa murna an-molamola a-nirra burrwa. Rrapa an-nerranga nipa barra mu-ngoyurra a-ji burrwa, wurpa lika minypa burr-guya jama a-jirra burrwa. Rrapa an-nerranga nipa barra a-gunggaja burrwa gun-nga birripa gun-derta gubu-barripuna, wurpa lika minypa burr-guya nawanawa a-nirra burrwa.

1 Gorint Aburr-guyinda 11:20

Ngardawa minypa ana-goyburrpa gu-ngardapa nyiburr-negiya nyiburr-workiya rrapa balaja wugupa nyibu-banga minypa ana-goyburrpa gu-galiya yerrcha Wangarr nyiburr-yika, mun-gata ana-goyburrpa bama nyiburr-yinaga jimarna an-ngayburrpa Bunggawa mun-nika, wurra ngika.

1 Gorint Aburr-guyinda 14:23

Wurra minypa ana-goyburrpa Christ nyiburr-yika nyiburr-bamagutuwiya nyiburr-workiya, minyja wengga gun-nerranga nyiburr-wengga nyiburr-ni nyiburr-jiwa, rrapa aburr-werranga aburr-boy gurda, aburr-galiya ana-gorrburrwa, birripa aburr-wengganachichiya aburr-ni. Minypa aburr-yinda, “A-lay, aburr-guna aburr-bamapama, ya? Minyja wengga gun-nerranga aburr-weya burrwa aburr-nirra, ngarla, rrapa gala aburr-galiya burrwa gu-gapa gu-guta!”

1 Gorint Aburr-guyinda 14:3

Wurra an-nerranga an-gugaliya an-gata nipa Wangarr ana-nyala a-wucha a-workiya, nipa gu-ngurrjinga Wangarr gun-nika, nipa jarra gu-galiya yerrcha a-weya burrwa. Minypa nipa burr-jalkakaja rrapa gelama gelama burr-banga rrapa derta burr-nenga.

1 Gorint Aburr-guyinda 3:13

Wurra nuwurra waypa gu-gubalmapa gu-ni, yarlanga gu-yu barra gun-gata minypa birripa aburr-yinmiyana ngardapa ngardapa jama aburr-ji. Ngardawa Wangarr gu-bol barra a-ngunyangunyjiya burrwa gun-gata birripa jama aburr-ji.

Bilipay 4:5

Nyiburr-molamola buburr-ni burrwa aburr-werranga warlaman wurra gama gorlk. Yi-gurrepa gu-jirra gu-boya an-ngayburrpa Bunggawa a-bengga barra.

1 Jechalónika Aburr-guyinda 4:18

Gun-narda minypa janguny barra ana-goyburrpa nyiburr-jalkakachichiya nyiburr-workiya.

1 Jechalónika Aburr-guyinda 5:11

Ganapiya, lika mu-nguy buburr-jalkakachichiya buburr-ni rrapa derta buburr-negachichiya buburr-ni gun-maywapa minypa gipiya gugu nyiburr-yinagatiya nyiburr-nirra nyiburr-workiya.

Yibru Yerrcha 10:24

Wurra ngayburrpa barra ngubu-borrwa nguburr-workiya nguburr-yinmiya barra nguburr-jalkakiya barra nguburr-workiya gu-gapa gu-guta, minypa gurrurta ngubi-rrima barra arrburrwa gu-gapa gu-guta rrapa gun-molamola jama nguburr-ji.

Yibru Yerrcha 10:37

Minypa janguny mu-jurra gu-yurra gu-yinaga, “Burdak gun-baykarda ngika, wurra an-gata ana-boya nipa a-bengga barra. Gala a-yinmiya gun-baykarda gu-nega.

Yibru Yerrcha 13:22

Japurra ngapa nyiburr-jirra, jela, worla. Bubu-borrwa gun-gata geka ngaypa gelama gelama arr-barra, ngardawa ngaypa gun-balmbarra ngu-wukurrjinga ana-gorrburrwa.

Yibru Yerrcha 3:13

Wurra gelama gelama buburr-bachichiya buburr-workiya gun-guniya nguburr-ninyarra, gun-guniya minypa nipa gu-ngurrjinga, a-yinanga, “Geka barra.” Gelama gelama buburr-bachichiya; gala yapa ny-yinga ny-jata gu-werra minypa biy-warganyjin, ny-derta ny-jorla nyi-ningin ny-bamun nuluwa Wangarr.

Jeymch 5:8

Ana-goyburrpa buburr-yirda marr bubu-ga rrapa derta buburr-negiya buburr-ni barra nyiburr-jinyjapa. Ngardawa yi-gurrepa yi-gurrepa gu-jirra gu-boya an-ngayburrpa Bunggawa nipa gugu ana-jeka barra.

1 Birta 4:7

Gun-guniya gugu yi-gurrepa gu-nirra gu-boya Wangarr gu-mungba barra. Gun-narda nula ana-goyburrpa barra bama jechinuwa nyibu-borrwa barra nyiburr-rrigirrga rrapa nyiburr-jarlapiya nyiburr-bamba, barra nyanma gun-mola ana-gorrburrwa Wangarr nyibu-wenggana barra nyiburr-workiya.

2 Birta 3:11

Ganapiya, wurra gun-guna rrawa ngardawa gu-yirda barra gun-nyagara gu-ni, wurra gun-guniya ana-goyburrpa nyiburr-yinmiya barra nyiburr-bamba nyiburr-workiya, ya? Wurra minypa Wangarr nyibu-borrwa barra nyiburr-workiya rrapa jama nyiburr-ji barra nyiburr-workiya gun-molamola,

2 Birta 3:14

Ganapiya, japurra ngapa nyiburr-jirra. Wurra ngardawa gun-gata nula ana-goyburrpa marr nyibu-ganyja, lika burr-guya bubu-borrwa minypa ana-goyburrpa nyiburr-yinmiya barra nyiburr-bamba nyiburr-workiya minypa barra nipa Wangarr nyirr-na ana-goyburrpa nyiburr-molamola, gala gun-nga gun-nerra nyibi-rrima rrapa gala werra nyiburr-negiyarna, wurra minypa magaya nyiburr-nirra ana-gorrburrwa gu-gapa gu-guta ana-goyburrpa rrapa nipa Wangarr.

2 Birta 3:9

Aburr-werranga abu-yopurda aburr-workiya Wangarr, jimarna bama aburr-yinaga nipa gun-baykarda gu-negarra, waygaji gu-ngukurdanyjinga gun-gata nipa mu-ngoyurra gochila an-dana. Wurra gun-narda ngika. Wurra nipa jarra marr gu-ganyja ana-gorrburrwa. Nipa gala jal a-ni ny-yinga ny-jata ny-juwa ny-mungbiyapa, wurra nipa jal a-nirra arr-gurdiya gorlk barra gun-nerra ay-bawa rrapa arr-ngukurdanyjiya nula nipa.

Jut A-wukurrjinga 1:19

Gun-nardiya minypa Jesus Christ burr-yika aburr-mujama mu-ngoyurra aburr-wena, burrbu-ngurrjinga birripa aburr-gata minypa nyirrbu-ngorrkorndanga aburr-workiya ana-goyburrpa. Birripa gala Mern An-mawunga abi-rrima, wurra jarra jama aburr-jirra aburr-workiya gun-nga minypa birripa wupa ngardapa gu-galiya yerrcha jal aburr-nirra.