Mateus 10:15 - Biblia Tetun Dili

¹⁵ Hau hatete loloos ba imi, iha loron ikus bainhira Maromak tesi ema hotu-hotu nia lia, ema iha aldeia nee sei simu kastigu todan liu fali ema aat sira nebee uluk hela iha rai Sodoma no Gomora.”

Mateus 10:15 Iomraidhean Croise

Mateus 12:36

Hanoin didiak! Iha loron ikus bainhira Maromak tesi ema hotu-hotu nia lia, Nia sei tetu ema nia liafuan ida-idak. Imi nia liafuan nebee mak imi koalia arbiru, imi tenki responsabiliza iha Maromak nia oin.

Mateus 5:18

Hau hatete ba imi, bainhira lalehan ho rai sei iha, buat hotu nebee hakerek iha lei nee, mezmu ke letra kiik-oan liu ida, ka pontu ida mos sei la lakon, too buat hotu nebee Maromak hatete, sai realidade.

Mateus 7:22

Iha loron ikus bainhira Maromak tesi ema hotu-hotu nia lia, ema barak sei mai dehan, ‘Nai, Nai, ami uluk foo tutan Maromak nia lia tatoli hodi Nai nia naran. Ami mos temi Ita Boot nia naran hodi duni sai diabu hosi ema, i halo milagre oi-oin hodi Ita Boot nia naran.’

Marcos 6:11

Maibee se imi too iha fatin ida, ema lakohi simu imi, i lakohi rona imi, imi tenki sai kedas hosi fatin nee. I baku rai rahun hosi imi nia ain. Ida nee sinal katak, ‘Imi lakohi rona ami, imi rasik mak lori todan nee!’ ”

João 12:48

Maibee ema nebee la simu Hau no la simu Hau nia Liafuan, iha ona juiz ba nia. Bainhira mundu nee remata, Liafuan nebee Hau foo sai ona nee, mak sai hanesan juiz hodi tesi nia lia.

João 6:39

I Nia hakarak mak nee: Hosi ema sira nebee Nia hili ona atu sai Hau nia ema, Nia hakarak Hau halibur sira hotu. Hau la bele husik ida lakon. Maibee bainhira mundu nee remata, Hau sei halo sira moris fali.

João 6:40

Hanesan ohin Hau dehan ona, Hau nia Aman hakarak para ema hotu konhese no fiar mai Hau, Nia Oan, para sira bele hetan moris rohan laek. I bainhira mundu nee remata, Hau sei halo sira moris fali.”

Apostolu sira nia Istoria 17:31

Nia marka ona loron ida, hodi halo justisa ba ema hotu-hotu iha mundu tomak. I Nia hili ona Ema ida sai Juis, hodi tesi lia loloos. Ita hatene katak Juis nee mak Jesus. Tanba Nia mate tiha ona, maibee Nai Maromak halo Nia moris fali.”

1 Korintu 3:13

Maibee iha loron ikus bainhira Maromak tesi ema hotu-hotu nia lia, Nia sei tau ahi hodi koko badaen sira nia serbisu. Ahi nee sei hatudu momoos, badaen ida-idak nia serbisu diak ka lae.

1 Tesalonika 5:4

Maun-alin sira, imi la moris iha nakukun laran. Nunee, imi sei la hakfodak bainhira Nai Jesus fila fali mai derepenti hanesan naok-teen tama uma iha tempu nebee ita la hatene.

Ebreu 10:25

Tan hau rona ona, ema balun lakoi halibur hamutuk tan ho sira nia maun alin iha Kristu. La bele nunee. Tanba imi tenki halibur hamutuk hodi foo korajen ba malu nafatin para ita nia fiar sai metin. Liu-liu tanba Nai Jesus nia loron hodi fila fali mai hosi lalehan besik ona.

2 Pedro 2:6

Nunee mos povu sidade Sodoma ho Gomora. Nai Maromak kastigu sidade rua nee ho ahi too sai tiha akudesan hotu. Nee hanesan ezemplu ida hodi hatudu katak, Maromak sei foo kastigu todan ba ema nebee mak la interese Nia.

2 Pedro 2:9

Ezemplu hirak nee hatudu katak, Nai Maromak salva ema nebee mak halo tuir Nia hakarak, bainhira sira hasoru tentasaun. Nia mos foo kastigu ba ema nebee mak moris la loos, hodi hein too tempu atu Nia tesi ema hotu-hotu nia lia.

2 Pedro 3:7

Nunee mos liu hosi Maromak nia liafuan mak lalehan ho rai nebee agora dadauk iha, hein hela too loron nebee mak Nia tesi ema hotu-hotu nia lia. Iha loron Julgamentu, Maromak sei uza ahi hodi sunu tiha lalehan ho rai too halo mate mohu ema nebee mak la respeita Nia.

1 João 4:17

Se ita laran ida ho Maromak ita iha domin loloos. Aban-bainrua, iha loron nebee Nai Maromak tesi ema hotu nia lia, ita sei la tauk, tanba iha mundu nee ita nia moris hanesan Jesus Kristu nian.

Judas 1:6

Nunee Maromak mos kastigu anju nebee husik tiha sira nia knaar ho sira nia hela fatin. Maromak kesi metin sira ho korenti iha fatin nakukun laran hodi hein loron nebee Maromak tesi ema hotu-hotu nia lia.

Judas 1:7

Hanesan povu sidade Sodoma ho Gomora, ho aldeia sira nebee besik. Sira gosta halo sala seksual nebee la normal no iha relasaun seksual ho ema nebee laos nia laen ka nia feen. Too ikus Maromak kastigu sira iha ahi nebee nunka mate. Nee hanesan ezemplu ida hodi foo hanoin mai ita hotu.