Kolose 3:4 - Biblia Tetun Dili

⁴ Kristu foo ona moris foun ba imi. I aban-bainrua Nia fila fali mai, imi mos mosu hamutuk ho Nia, ho naroman nabilan nian.

Kolose 3:4 Iomraidhean Croise

Mateus 13:43

Maibee ema nebee moris loos, sira sei tama ba lalehan hodi hela hamutuk ho Aman Maromak. Iha nebaa sira sei nabilan hanesan loromatan. See mak iha tilun, rona didiak baa!”

Lucas 17:30

Nunee mos, bainhira Hau, Ema Oan fila fali mai i ema hotu-hotu haree momoos Hau.

João 11:25

Entaun Jesus hatete, “Ema nebee mate, Hau mak halo moris fila fali no Hau mak foo moris loloos. Ema nebee fiar mai Hau sei hetan moris nee, maski nia mate.

João 14:3

Bainhira Hau baa ona i prepara fatin ba imi hotu ona, Hau sei mai fali hodi lori imi baa hamutuk ho Hau. Nunee, iha fatin nebee Hau hela, imi mos hela iha nebaa.

João 14:6

Jesus foo hatene dehan, “Hau mak dalan, lia loos no moris. La iha ema ida mai iha Hau nia Aman, se la liu hosi Hau. Tanba Hau mak dalan mesak hodi baa Maromak, Hau mak lia loos nia huun, no Hau mak foo moris loloos ba ema.

João 17:24

Aman, Hau hakarak para ema hotu nebee Aman foo ona mai Hau, hamutuk ho Hau. Tan Hau hakarak atu sira haree Hau nia Aman foti aas Hau. Aman hadomi ona Hau, molok Ita halo mundu nee.

João 20:31

Maibee, buat sira nebee hau hakerek ona iha livru nee, hau hakerek para imi bele fiar dehan, Jesus mak Kristu nebee Nai Maromak promete ona atu haruka mai. Jesus mos Nai Maromak nia Oan. I bainhira imi fiar ba Nia, imi hetan moris rohan laek, tanba imi sai ona Nia ema.

Apostolu sira nia Istoria 3:15

Imi oho tiha Jesus, ida nebee moris hotu-hotu nia huun. Nia mate duni, maibee Nai Maromak halo Nia moris fali. Ami haree rasik ho matan.

Roma 8:18

Hau hanoin terus nebee ita hetan agora la kompara ho naroman nabilan nian nebee Maromak sei hatudu sai mai ita iha aban-bainrua.

Roma 8:19

Maromak nia kriasaun hotu-hotu hein hela atu haree Maromak hatudu sai see-see loos mak Nia oan duni.

1 Korintu 1:7

Maromak foo tiha ona kbiit oi-oin ba imi, nunee imi la falta buat ida atu halao Nia serbisu durante imi hein ita nia Nai Jesus Kristu fila fali mai hosi lalehan.

1 Korintu 15:43

Isin lolon nebee ema hakoi, ita haree ba aat loos, maibee ita moris fila fali ho isin lolon nebee furak. Isin lolon nebee ema hakoi, la iha kbiit, maibee ita moris fila fali ho isin lolon nebee forti.

2 Korintu 4:17

Terus nebee ami hetan agora dadauk nee hanesan buat kamaan ida nebee la kleur sei hotu. Liu hosi terus nee, ami sei moris iha naroman nabilan nian too tinan ba tinan. Kompara ho ida nee, ami nia terus agora nee buat kiik ida.

Galasia 2:20

Bele dehan, hanesan hau mate tiha ona iha krus hamutuk ho Kristu. Agora laos hau mak moris tan, maibee Kristu mak moris iha hau. I hau moris iha mundu nee, hau fiar deit ba Nai Maromak nia Oan. Nia hadomi teb-tebes hau, too foo nia Aan ba mate iha hau nia fatin.

Filipi 3:21

Iha mundu nee, ita nia isin lolon fraku, i sei mate. Maibee bainhira Jesus Kristu mai, Nia sei troka tiha ita nia isin lolon fraku nee, sai fali forti ho furak teb-tebes hanesan Nia isin lolon rasik, i ita sei la mate tan. Nia bele halo ida nee tanba Nia iha kbiit hodi ukun buat hotu-hotu.

1 Tesalonika 4:17

Liu tiha nee, ita nebee sei moris hela, Maromak foti sae hamutuk ho sira, hodi hasoru Nai Jesus iha kalohan. I ita sei moris hamutuk ho Nai Jesus tinan ba tinan nafatin.

1 Timóteo 6:14

hau haruka para o halo tuir Nai Maromak nia orden nee hotu. Nunee ema la foo sala ba o too ita nia Nai Kristu Jesus fila fali mai hosi lalehan.

2 Timóteo 1:1

Timóteo nebee diak. Kumprimentus hosi hau, Paulo. Nai Maromak hili ona hau sai Kristu Jesus nia apostolu, i haruka hau baa foo sai kona ba moris rohan laek. Nia promete atu foo moris nee ba ema nebee fiar ba Kristu Jesus.

2 Timóteo 4:8

Agora hau hein prémiu nebee Nai Jesus prepara ona ba ema nebee moris loos. Ita nia Nai nee mak juis loos. I too iha loron nebee Nia tesi lia, Nia sei foo prémiu nee mai hau. Laos mai hau deit, maibee Nia sei foo mos ba ema hotu nebee ho laran tomak hein hela Nia atu fila mai.

Tito 2:13

Agora ita hein hela ho laran metin Jesus Kristu atu fila fali mai ho naroman nabilan. Jesus mak ita nia Maromak Forsa teb-tebes, nebee salva ita.

Ebreu 9:28

Kristu mos mate dala ida deit, hanesan sakrifisiu hodi hamoos ema barak nia sala. I Nia sei fila fali mai, laos atu kasu ita ema nia sala tan, maibee atu salva ema sira nebee mak hein hela Nia ho laran metin.

1 Pedro 1:13

Tanba nee, matan moris neon nain hodi komprende didiak buat sira nee hotu. I hein ho laran metin nafatin atu Maromak hatudu Nia laran diak ba imi bainhira Jesus Kristu fila fali mai.

1 Pedro 5:4

Se imi halo nunee, aban-bainrua bainhira bibi atan sira nia Boot fila fali mai, imi sei simu koroa naroman nabilan, i koroa nee nunka namlaik.

1 João 2:28

Nee duni, oan doben sira, imi tenki moris laran ida ho Jesus Kristu nafatin, para aban-bainrua Jesus fila fali mai hosi lalehan, ita la tauk i la moe hamriik iha Nia oin.

1 João 3:2

Maluk doben sira, ita sai ona Maromak nia oan. Maibee Maromak seidauk foo sai ba ita, aban-bainrua ita sei sai oinsaa. Maski nunee ita sei hatene, bainhira Jesus Kristu fila fali mai hosi lalehan, ita sei sai hanesan Nia, tanba ita sei haree Nia momoos.

1 João 5:12

Nunee, ema nebee iha Maromak nia Oan hetan moris rohan-laek. Maibee ema nebee la iha Maromak nia Oan sei la hetan moris rohan-laek.

Judas 1:24

Nai Maromak forsa teb-tebes, Nia mak iha kbiit hodi kuidadu imi para imi la bele monu ba sala. Nia mak bele lori imi ba iha Nia futar oin. Tanba Nia mak halo imi moris loos, no la iha sala ida. Imi sei haksolok boot, iha Nia naroman nabilan.

Apokalipse 2:7

Imi nebee iha tilun, rona didiak saida mak Maromak nia Espiritu hatete ba sarani sira. Ema nebee manaan, Hau sei foo direitu ba nia para bele haan ai fuan nebee lori nia ba moris rohan-laek. Ai fuan nee nia huun moris iha Nai Maromak nia toos Eden.’ ”

Apokalipse 22:1

Tuir mai anju nee hatudu mota ida mai hau. Mota nee nia bee foo moris tinan ba tinan, i moos loos hanesan vidru. Bee nee sai hosi Nai Maromak ho Bibi Oan nia kadeira ukun,

Apokalipse 22:14

Ema nebee fasi tiha ona sira nia hena too moos, sira hetan bensaun. Tanba sira mak iha direitu tama ba sidade laran liu hosi portaun para bele haan ai fuan nebee foo moris rohan-laek.