Kolose 1:10 - Biblia Tetun Dili

¹⁰ Ho nunee, imi nia moris foti aas Nai Jesus nia naran, i sempre halo haksolok Nia laran. Imi mos sei foo fuan iha imi nia serbisu nebee diak, i sei buras hodi konhese Maromak diak liu tan.

Kolose 1:10 Iomraidhean Croise

João 15:16

Laos imi mak hili Hau. Maibee Hau mak hili no foti imi hodi halao serbisu nee. Nunee imi tenki baa halo buat diak barak nebee bele dura. Nee hanesan ai uvas huun ida nebee foo fuan diak nafatin. Se imi halo nunee, imi bele husu saida deit ba Hau nia Aman lori Hau nia naran, i Nia sei foo ba imi.

João 15:8

Se imi halo buat diak barak, nee hanesan sanak nebee foo fuan barak. Nunee imi foti aas Nai Maromak no hatudu katak imi nee, Hau nia eskolante sira.

João 17:3

Dalan hodi hetan moris loloos nebee rohan laek mak nee: Ema tenki konhese Aman, nudar Nai Maromak nebee loos. La iha tan seluk ida. Sira mos tenki konhese Hau, Jesus Kristu, nebee Aman haruka ona mai iha mundu nee.

Roma 1:13

Maun-alin sira, hau hakarak para imi hatene katak, dala barak ona hau halo planu atu baa vizita imi, maibee too agora hau la konsege baa. I se hau karik, hau sei haree ema barak sei fiar nafatin ba Kristu, hanesan mos iha fatin sira seluk. Ho nunee, hau nia serbisu nee iha rezultadu diak.

Roma 4:12

Abraão mos sai aman ba ema Judeu nebee sunat. Laos tanba ita sunat, maibee tanba ita fiar ba Kristu, hanesan ita nia bei-ala Abraão mos fiar ba Maromak bainhira nia seidauk sunat.

Roma 6:4

Bainhira ita simu batizmu, ita hanesan mate tiha ona no hakoi hamutuk ho Kristu. Ita tenki mate uluk ho Nia atu ita bele moris foun, hanesan mos Kristu moris fali ona hosi mate liu hosi Aman Maromak nia kbiit boot.

2 Korintu 2:14

Maibee agradese ba Maromak! Ami nebee uluk Nia inimigu, agora Nia halo ami sai laran ida ho Kristu hodi lori ami tutuir Nia. Ho nunee ema hotu-hotu haree katak Kristu mak manaan. Agora Nia uza fali ami hodi foo sai kona ba Kristu iha nebee-nebee deit, nunee ita sai hanesan mina morin nebee foo morin duni.

2 Korintu 4:6

Tanba Maromak rasik dehan, “Tenki iha naroman hodi leno iha nakukun laran.” Agora mos Maromak foo Nia naroman hodi leno ita nia laran. Nunee ita bele hatene katak Maromak nee makaas teb-tebes, tanba ita haree naroman nabilan nian iha Kristu nia oin.

2 Korintu 5:9

Tanba nee, atu ita sei moris iha mundu nee ka ita husik ona mundu, ita nia hakarak mak nee: atu halo haksolok ita nia Nai nia laran.

2 Korintu 9:8

Maromak iha kbiit hodi foo bensaun oi-oin ba imi. Nunee buat nebee imi presiza imi sei hetan hotu, i liu fali imi nia presiza, para imi mos bele ajuda ema seluk.

Efezu 1:17

ba Maromak. Nia mak ita nia Nai Jesus Kristu nia Aman Maromak. Nia mak ita nia Aman, i Nia boot teb-tebes. Hau husu atu Nia haraik Nia Espiritu ba imi, para loke imi nia neon i hatudu Maromak ba imi para imi bele konhese Nia diak liu tan.

Efezu 2:10

Ita ema Nai Maromak nia liman fatin. I Kristu Jesus foo moris foun mai ita para ita bele halao buat diak iha ita nia moris loro-loron. Buat diak sira nee, Maromak prepara tiha ona ba ita hori uluk kedas.

Efezu 4:1

Hau dadur hela tanba serbii ita nia Nai. Nunee hau husu boot atu imi bele moris tuir Maromak nia hakarak, tanba Nia bolu ona imi sai Nia ema.

Efezu 4:13

too ita hotu neon ida laran ida fiar ba Maromak nia Oan i konhese didiak Nia. Iha ikus, ita laos hanesan labarik tan, maibee sai boot ona, too ita sai hanesan Kristu.

Efezu 5:10

Hakaas aan buka hatene oinsaa mak imi bele halo haksolok Nai Maromak nia laran.

Efezu 5:15

Tanba nee, imi tenki hatene oinsaa imi nia moris. La bele moris hanesan ema beik, maibee moris hanesan ema matenek.

Efezu 5:2

Hadomi malu, hanesan mos Kristu hadomi ita, too Nia foo Aan ba mate hodi troka ita. Ho Nia mate nee Nia sai hanesan sakrifisiu morin nebee halo haksolok Nai Maromak.

Filipi 1:11

Ho Jesus Kristu nia tulun, imi sei hatudu hahalok diak iha imi nia moris tomak. Ho nunee, ema sei foti aas Nai Maromak nia naran hodi hahii Nia.

Filipi 1:27

Bele halo nusaa mos, imi tenki moris tuir loloos Kristu nia Novidade Diak. Nunee, se hau rasik baa vizita fali imi ka rona deit hosi ema mos, hau bele hatene katak, imi hamriik metin ho neon ida laran ida. I hau bele hatene katak, imi hotu serbisu makaas para ema seluk mos fiar Kristu nia Novidade Diak nee.

Filipi 4:18

Hau simu ona ajuda hotu-hotu nebee imi haruka mai hau liu hosi Epafroditu. Agora hau la falta buat ida, i sei iha resin tan. Imi nia tulun nee hanesan sakrifisiu morin ida nebee imi foo ba Maromak, i Nia simu ho laran haksolok.

Kolose 2:19

Ema sira nee haketak aan ona hosi Kristu, maski Nia mak Ulun, i Nia povu hanesan Nia isin lolon. Kristu halo Nia povu hotu hamutuk sai ida deit, hanesan mos ita nia uat sira liga metin ho ita nia ruin iha isin lolon tomak. Nunee Kristu halo ita hotu buras ba bebeik, tuir Maromak nia planu duni.

Kolose 2:6

Imi simu ona Kristu Jesus hanesan imi nia Nai. Tanba nee, imi mos tenki moris laran ida ho Nia nafatin.

Kolose 3:20

Oan sira, imi tenki halo tuir buat hotu-hotu nebee imi nia inan-aman haruka, tanba ida nee mak halo haksolok ita nia Nai nia laran.

Kolose 4:5

Bainhira imi hamutuk ho ema nebee seidauk fiar ba Kristu, hatudu hahalok diak ba sira. Iha oportunidade saida deit, uza didiak baa.

1 Tesalonika 2:12

Ami foo konselhu ba imi hodi hametin imi nia laran, i husu bebeik ho laran tomak ba imi hodi moris tuir Maromak nia hakarak. Tan Nia mak liurai boot, nebee bolu imi sai Nia reinu hodi simu respeitu hamutuk ho Nia.

1 Tesalonika 4:1

Maun-alin sira, ami husu ba imi atu moris halo haksolok Nai Maromak, tuir ami hanorin ona ba imi. Loos, imi moris tuir ona nunee, maibee tanba ita Nai Jesus nia ema, ami husu atu imi hakaas aan liu tan.

2 Timóteo 2:4

Soldadu nebee halo funu dadauk, nia la hanoin tan atu halo serbisu seluk. Tanba nia hakarak halo kontenti nia komandante.

Tito 3:1

Foo hanoin fali ba sarani sira para halo tuir estadu nia lei sira no ema nebee kaer ukun, i sempre prontu atu halo serbisu ho diak.

Tito 3:14

Ita nia maluk sarani sira tenki aprende hakaas aan halo diak ba ema, hodi ajuda ema nebee presiza duni. Ho nunee sarani sira nia moris sei hetan fuan.

Ebreu 11:5

Enoke fiar ba Nai Maromak. Nee mak nia la mate, maibee Maromak foti sae nia ba lalehan. Ema buka nia mos la hetan, tanba Maromak lori tiha ona nia. Molok Nai Maromak foti sae nia, Maromak dehan katak, Enoke ema ida ke halo haksolok Maromak nia laran.

Ebreu 13:16

La bele haluha halo diak ba ema seluk, i se sira presiza buat ruma, ajuda sira. Tanba hahalok nee mos hanesan sakrifisiu nebee ita foo ba Nai Maromak hodi halo haksolok Nia laran.

Ebreu 13:21

Maromak foo saida deit mak imi presiza atu imi bele halo tuir Nia hakarak. Hau mos harohan atu Nia serbisu nafatin iha ita hotu nia laran liu hosi Jesus Kristu nia tulun, para ita sai ema nebee mak halo haksolok Nia laran. Mai ita foti aas Nia naran too tinan ba tinan nafatin. Amen.

2 Pedro 1:8

Se hahalok diak sira nee hotu buras ba bebeik iha imi nia moris, entaun imi sei konhese diak liu tan ita nia Nai Jesus Kristu, i imi nia moris iha folin i la saugati.

2 Pedro 3:18

Hakaas aan para loron ba loron konhese diak liu Nai Jesus Kristu ita nia Salvador, i hatene liu tan Nia laran diak. Mai ita foti aas Nia naran agora i too tinan ba tinan. Amen.

1 João 3:22

Nunee ita husu saida deit, Nia sei foo, tanba ita moris tuir Nia ukun fuan i halo haksolok Nia laran.

1 João 5:20

Ita hatene katak Maromak nia Oan mai ona, i Nia loke ona ita nia neon para ita bele konhese Ida nebee mak loos. Ita laran ida ona ho Ida nebee mak loos, ita mos laran ida ho Nia Oan Jesus Kristu. Nia mak Maromak loloos, i Nia mak moris rohan-laek.

3 João 1:6

Sira nee mai konta ba sarani sira iha nee kona ba o nia domin ba sira. Agora hau husu ba o atu foo ajuda nafatin buat nebee mak sira presiza iha dalan, tanba ajuda nee halo haksolok Nai Maromak nia laran.