Jonas 1:6 - Biblia Tetun Dili

⁶ I bainhira kapitaun roo haree Jonas, nia siak dehan, “O nee, nusaa? Tanba saa mak o bele toba dukur nunee? Diak liu o hadeer lai, hodi hamulak ba o nia maromak sira no lulik sira. Keta halo be nia hanoin ita, nunee ita la mate!”

Jonas 1:6 Iomraidhean Croise

Ester 4:16

“Baa halibur ema Judeu hotu iha sidade Suzan nee. Hau husu ba imi jejun no harohan mai hau loron tolu, kalan tolu. La bele haan, no la bele hemu buat ida. Hau ho hau nia ema feto sira nebee serbisu mai hau nee mos jejun no harohan hotu. Depois, hau sei baa koalia ho liurai, maski kontra lei. Se karik hau tenki mate ba ida nee, hau prontu mate.”

Jonas 3:8

Ema hotu tenki hatais hena hosi karoon. Animal sira mos nunee. Ho nunee ita hotu hatudu katak ita hanoin hikas ona. Ema hotu tenki bolu ho lian makaas hodi husu tulun ba Maromak ho laran tomak nebee moos. Ema hotu tenki husik sira nia hahalok aat sira nee. Ema hotu tenki hapara halo aat ba ema, no hapara halo terus ema seluk.

Jonas 3:9

Se ita hotu halo nunee, keta halo be Maromak haree no rona ita, i nia laran nakali nee bele malirin, hodi hatudu Nia domin mai ita i la harahun ita.”

Apostolu sira nia Istoria 21:13

Maibee nia hataan, “Nusaa mak imi tanis? Imi halo hau nia laran dodok deit. Maski ema futu hau ka oho hau tanba hau tuir Nai Jesus, hau prontu atu simu.”

Roma 13:11

Imi tenki halo buat sira nee hotu tanba imi komprende tempu too ona para imi hadeer. Tanba loron nebee Maromak atu salva ita besik dadauk ona, laos hanesan uluk bainhira ita foin fiar ba Kristu.

Efezu 5:14

tanba naroman halo buat hotu-hotu sai klaru. Iha kanta ida dehan, “Imi nebee dukur, hadeer ona baa, imi nebee mate, moris fali ona baa. I Kristu sei foo naroman ba imi.”