João 1:14 - Biblia Tetun Dili

¹⁴ I ‘Maromak nia Liafuan’ nee, sai tiha ema. Nia moris iha ita nia leet. Ita haree Nia naroman-nabilan. Nia iha naroman-nabilan nunee, tanba Nia mak Nai Maromak nia Oan mane mesak. Nia hakarak hatudu Nia laran diak no grasa mai ita, tanba Nia hahalok nunee duni. I buat hotu nebee Nia hatoo kona ba Nai Maromak, loos duni.

João 1:14 Iomraidhean Croise

Mateus 1:16

Jacó nia oan mak José. José kaben ho Maria, i Maria nee mak tuur ahi oan mane ida, nia naran Jesus, nebee ema mos bolu Kristu.

Lucas 2:11

Ohin imi nia Salvador moris ona iha liurai David nia moris fatin Belém. Nia mak Kristu, imi nia Nai, Ema nebee Maromak promete ona hori uluk atu haruka mai.

Lucas 2:7

Nia tuur ahi oan mane boot. Nia falun ho neras, i hatoba iha animal nia haan fatin, tanba la iha fatin ba sira hodi hela.

Lucas 9:32

Tempu nee, Pedro ho nia kolega nain rua nee toba dukur tiha. Bainhira sira hadeer mai, sira haree Jesus naroman nabilan loos hamriik hela ho profeta nain rua nee.

João 1:1

Hahuu fofoun, Nai Maromak nia Liafuan iha tiha ona. Liafuan nee hamutuk ho Nai Maromak. I Liafuan nee mak Nai Maromak. [Liafuan nee, Ema ida.]

João 11:40

Jesus foo hanoin ba nia dehan, “Ita sei hanoin, ka lae? Hau foo hatene ona dehan, se ita fiar teb-tebes mai Hau, ita sei haree Nai Maromak nia naroman-nabilan.”

João 14:6

Jesus foo hatene dehan, “Hau mak dalan, lia loos no moris. La iha ema ida mai iha Hau nia Aman, se la liu hosi Hau. Tanba Hau mak dalan mesak hodi baa Maromak, Hau mak lia loos nia huun, no Hau mak foo moris loloos ba ema.

João 14:9

Jesus foo hatene ba nia dehan, “Filipe, Hau hamutuk ho o kleur ona, maibee o seidauk konhese Hau didiak, ka? Tanba ema nebee haree Hau, nia haree mos Hau nia Aman. Nusaa mak o husu dehan, ‘Hatudu Ita Boot nia Aman mai ami’?

João 17:22

Aman hatudu ona Hau nia naroman-nabilan ba sira, no Hau foti aas ona sira, hanesan Hau. Nunee, sira sai neon ida laran ida, hanesan mos Aman ho Hau ida deit.

João 17:24

Aman, Hau hakarak para ema hotu nebee Aman foo ona mai Hau, hamutuk ho Hau. Tan Hau hakarak atu sira haree Hau nia Aman foti aas Hau. Aman hadomi ona Hau, molok Ita halo mundu nee.

João 18:37

Governador husu fali, “Entaun, o Liurai, ka?” Jesus hataan, “Senhor rasik mak dehan Hau Liurai. Loloos nee, Hau moris para sai Liurai. Hau mai iha mundu nee para sai Liurai, hodi foo hatene kona ba buat nebee loos. Ema hotu nebee kaer metin lia loos, sira rona Hau.”

João 2:11

Ida nee akontese iha aldeia Kanaa, iha provinsia Galileia. Nee milagre dahuluk Jesus halo nebee ema bele haree. Jesus hatudu Nia naroman-nabilan nunee, maka Nia eskolante sira fiar ba Nia.

João 3:16

Tanba Nai Maromak hadomi teb-tebes ema hotu-hotu iha mundu nee, nee mak Nia haruka Nia Oan mane mesak, para ema hotu nebee fiar ba Nia, Nai Maromak la husik sira lakon, maibee Nia foo ba sira moris rohan laek.

João 3:18

Nai Maromak la kastigu ema nebee fiar mai Hau. Maibee Nia desidi tiha ona kastigu ba ema nebee la fiar mai Hau, tanba ema nee la fiar mai Hau, nudar Nai Maromak nia Oan mane mesak.

João 6:51

Hau mak Paun nebee lori moris, nebee tuun mai hosi lalehan. Bainhira Hau mate, Hau entrega Hau nia isin para ema hotu iha mundu nee bele moris. I ema nebee haan Paun nee, sira hetan moris rohan laek.”

João 8:32

I imi bele hatene lia loos. I lia loos nee mak hasai imi hosi atan i liberta imi.”

Apostolu sira nia Istoria 13:33

Maromak halo Jesus moris fali hosi mate, nee tuir liafuan iha livru Salmus nebee dehan, ‘O nee Hau nia Oan. Ohin loron, Hau hatudu katak Hau O nia Aman.’

Roma 8:3

Ukun fuan sira la bele hasai ita hosi sala nia ukun, tanba ita ema sala nain la iha kbiit atu halo tuir lei nee hotu. Maibee Maromak bele hasai ita liu hosi Nia haruka Nia Oan rasik mai iha mundu para sai ema kriatura nudar ema sala nain, i mate hanesan sakrífisiu ida hodi halakon sala iha ita nia laran.

Roma 9:5

Sira nia bei-ala sira naran boot. Tuir raan, Kristu nebee Maromak promete hori uluk atu haruka mai nee mos hosi sira nia jerasaun. Maibee Kristu nee mos Maromak, Nia boot liu buat hotu-hotu. Mai ita hahii Nia too tinan ba tinan. Amen.

1 Korintu 15:47

Adão ida primeiru hosi rai rahun, Adão ida segundu hosi lalehan.

2 Korintu 12:9

Maibee Nai Jesus hataan mai hau dehan, “Hau nia grasa natoon ona ba o. Tanba bainhira o fraku mak Hau hatudu Hau nia kbiit ba o.” Nee mak hau sempre haksolok koalia kona ba hau nia frakeza, para Kristu nia kbiit bele hamahon nafatin hau.

Galasia 4:4

Maibee too nia tempu, Nai Maromak haruka Nia Oan mai. Iha feto ida mak tuur ahi Maromak nia Oan nee, i nia Oan moris tuir lei relijiaun Judeu nian.

Efezu 3:8

Hosi Maromak nia povu santu hotu-hotu nebee fiar, hau mak kiik liu. Maski nunee, Maromak foo fiar mai hau para foo hatene ba ema nebee laos Judeu, kona ba Kristu nia laran diak mai ita nebee ita sukat la too.

Kolose 1:19

Buat hotu-hotu nebee iha Nai Maromak nia Aan, iha mos iha Kristu, tanba Maromak hakarak hanesan nee.

Kolose 2:3

Kristu deit mak bele halo ita sai matenek hodi komprende Maromak nia dalan. Tanba matenek nee hanesan rikusoin nebee subar hela iha Nia.

Kolose 2:9

Kristu sai ema. Maski nunee, maibee buat hotu-hotu nebee iha Nai Maromak, iha mos iha Kristu.

1 Timóteo 3:16

Segredu nebee Maromak foo sai ona mai ita kona ba Jesus Kristu, diak teb-tebes. Segredu nee mak nee: Jesus Kristu fila aan sai ema. Maromak nia Espiritu hatudu katak, Jesus nee loos duni. Maromak nia anju sira mos haree Nia. Ema foo sai kona ba Nia too iha nasaun-nasaun. Iha mundu tomak, ema fiar ona ba Nia. Nai Maromak hasae ona Nia ba lalehan hodi foti aas Nia naran.

Ebreu 1:3

Maromak nia Oan hanesan loloos Maromak, Nia hatudu sai Maromak nia kbiit ho naroman nabilan nian, i Nia liafuan iha kbiit boot. Ho Nia liafuan nee Nia tane nafatin buat hotu-hotu iha lalehan ho iha rai. Nia mak loke dalan para Maromak bele hamoos ema nia sala. Hotu tiha Nia sae ba lalehan hodi tuur iha Maromak Aas Liu nia sorin kuana.

Ebreu 1:5

Nai Maromak hatete ba Nia Oan nunee: “O Hau nia Oan.” Maromak mos dehan, “Hau nee Nia Aman, Nia mak Hau nia Oan.” Maibee Nai Maromak nunka koalia nunee kona ba anju sira.

Ebreu 10:5

Tanba nee, bainhira Jesus Kristu mai iha mundu, Nia hatete ba Nai Maromak nunee: “Ita Boot lakohi para ema lori oferta i oho animal sai sakrifisiu ba Ita Boot. Nee mak Ita Boot foo isin lolon mai Hau atu Hau mak sai sakrifisiu.

Ebreu 2:11

Bainhira Jesus hamoos ema ida nia sala, ema nee sai Maromak nia oan. Nunee Jesus ho ema sira nebee Nia halo moos ona nee, hotu-hotu nia Aman ida deit. Nee mak Jesus la moe bolu ita dehan, imi nee Hau nia alin.

Ebreu 5:5

Kristu mos nunee. Nia laos foti Nia Aan rasik sai nai-lulik boot, maibee Nai Maromak mak foti Nia para kaer kargu boot nee. Maromak dehan, “O Hau nia Oan. Iha loron ida nee Hau deklara sai katak Hau nee O nia Aman.”

1 João 4:14

Ami rasik haree ona Maromak nia Oan, i ami foo sasin katak, Nai Maromak haruka Nia Oan mai para salva ema iha mundu nee.

1 João 4:9

Nai Maromak hatudu Nia domin nunee: Nia haruka nia Oan mane mesak mai iha mundu para ita bele hetan moris rohan-laek.

2 João 1:7

Ohin loron bosok-teen barak lao lemo-lemo lori lia falsu dehan, Jesus Kristu moris iha mundu nee la hanesan ema. See mak koalia nunee, nia bosok-teen, i nia kontra Kristu.

Apokalipse 19:13

Nia hatais hena nebee habokon tiha ho raan. Ema temi Nia naran “Maromak nia Liafuan”.

Apokalipse 21:3

Depois hau rona lian makaas ida sai hosi kadeira ukun nee dehan, “Haree baa! Hahuu agora Nai Maromak nia hela fatin iha ema sira nia leet. Nia hela hamutuk ho sira. Nia sai sira nia Maromak i sira sai Nia povu. Maromak rasik hela hamutuk ho sira.