Filipi 4:8 - Biblia Tetun Dili

⁸ Entaun, maun-alin sira, imi tenki kuidadu didiak imi nia hanoin. Hanoin bebeik kona ba buat nebee loos, ho buat nebee iha valór. Hanoin kona ba buat diak nebee halo haksolok Maromak nia laran ho buat furak nebee foo ksolok ba ema. Saida deit mak diak loos i saida deit mak ita bele gaba, nee mak imi tenki hanoin.

Filipi 4:8 Iomraidhean Croise

Jenesis 18:19

Hau hili ona nia, hodi hanorin nia oan sira ho ema seluk atu tuir nafatin NAI Maromak nia dalan, para sira bele moris loos. Se sira tuir nunee, maka Hau sei kumpri Hau nia promesa ho Abraão.”

Mateus 22:16

Nunee sira haruka ema balu baa atu koko Jesus. Ema sira nee mak Farizeu nia eskolanti sira ho ema hosi partidu Erodes nian. Sira finji husu ba Jesus dehan, “Mestri, ami hatene katak Ita Boot ema nebee onestu i sempre hanorin Maromak nia dalan ho loloos. Ita Boot la hola ba lia ho ema seluk nia hanoin, i Ita Boot la fihir ema.

Marcos 6:20

I nia haruka soldadu sira hein João didiak. Liurai Erodes tauk no respeita hela ba João. Tanba nia hatene João nee, Nai Maromak mak haruka mai, i nia mos laran diak. Erodes gosta rona João nia koalia. Maibee dalaruma, kuandu nia rona João nia koalia, nia laran la hakmatek.

Lucas 16:15

Maibee Jesus dehan ba sira, “Iha ema nia oin, imi hatudu aan hanesan ema nebee moris loos. Maibee Nai Maromak hatene imi nia laran. Iha buat barak mak ema dehan folin boot, maibee Nai Maromak la foo folin.

Lucas 2:25

Tempu nee, iha katuas ida naran Simeão hela iha sidade Jerusalém. Nia ema ida ke moris loos i badinas halo tuir Nai Maromak nia hakarak. Nia hein hela Nai Maromak atu salva ema Israel. Nia nakonu ho Maromak nia Espiritu Santu,

Lucas 23:50

Iha ema ida naran José, hosi sidade Arimateia iha provinsia Judeia, buka dalan atu hakoi Jesus nia mate isin. Nia ema ida ke diak no moris loos, i nia hein hela Nai Maromak hatudu Nia ukun nudar Liurai. José mos membru tribunal relijiaun Judeu nian, maibee nia la konkorda ho nia kolega sira nia desizaun hodi kastigu mate Jesus.

João 7:18

Ema nebee koalia lori nia naran rasik, nia hakarak buka deit nia naran. Maibee ema nebee hakarak gaba ema nebee haruka nia nee, nia koalia onestu. I nia la lohi tuun-sae.

Apostolu sira nia Istoria 10:22

Sira hataan, “Komandante Cornélio mak haruka ami mai. Nia ema moris loos ho hamtauk ba Nai Maromak. Ema Judeu sira hotu respeita teb-tebes nia. Horiseik Nai Maromak nia anju mai haruka nia bolu senhor hodi ba iha nia uma, para nia bele rona senhor nia liafuan.”

Apostolu sira nia Istoria 22:12

Iha ema ida naran Ananias hela iha nebaa. Nia ema ida adora loloos Nai Maromak i badinas halo tuir lei nebee Nai Maromak foo ba profeta Moisés. Ema Judeu hotu-hotu iha sidade nee respeita nia.

Apostolu sira nia Istoria 6:3

Nunee, diak liu, imi hili ema nain hitu hosi imi. Buka ema nebee naran diak, matenek i Espiritu Santu mak domina nia. Depois ami sei foti sira hodi toma konta kona ba haan-hemu.

Roma 13:13

Mai ita moris loos, hanesan ema nebee moris iha naroman. La bele festa hela deit, haan-hemu too lanu arbiru tuun-sae. La bele halo seksu arbiru no nebee la iha moral. La bele istori malu, i la bele laran moras ema.

Roma 13:3

Ema nebee halo buat loos, nia sei la tauk nai ulun sira, so ema nebee halo buat aat mak tauk. Entaun se imi lakohi moris iha tauk nia laran, diak liu halo buat nebee loos, para sira bele gaba imi.

Roma 14:18

Ema nebee serbii Kristu hanesan nee, nia halo haksolok Maromak nia laran, i ema seluk mos respeita nia.

Roma 2:29

Maibee ema Judeu isin, haree hosi nia laran. I sunat nebee loos mak sunat hosi laran, nebee Maromak nia Espiritu mak halo, laos sunat iha isin deit tuir lei. Ema nebee sunat hosi laran nee, Maromak mak gaba, laos ema.

1 Korintu 4:5

Nee duni la bele julga ema seluk, tanba tempu atu tesi lia seidauk too. Hein too Nai Jesus fila fali mai hosi lalehan. Nia sei tesi ema hotu-hotu nia lia. Saida deit mak ema halo iha nakukun laran, Nia sei foo sai iha ema hotu nia oin. Too ema nia hanoin nebee segredu mos, Nia sei hatudu sai. Depois Maromak mak sei gaba ema ida-idak tuir sira nia serbisu nebee sira halo ba Nia.

2 Korintu 13:7

Ami harohan ba Maromak atu imi la bele halo sala saida deit. Ami harohan nunee laos para ema bele dehan ami nee apostolu duni, maibee tanba ami hakarak atu imi halo buat nebee diak. Se ema balu konsidera ami nee laos apostolu mos, la buat ida.

2 Korintu 6:8

Atu ema respeita ami ka hatuun ami, atu ema gaba ami ka hatete aat ami, ami la hakiduk. Maski ema bolu ami bosok-teen, ami sempre koalia lia loos, no ema fiar.

2 Korintu 8:18

Ami mos haruka maluk sarani ida tan atu akompanha Tito. Sarani sira hotu gaba nia, tanba nia badinas foo sai Novidade Diak.

2 Korintu 8:21

Ami hakaas aan atu halo buat nebee loos iha Nai Maromak nia oin ho mos iha ema nia oin.

Galasia 5:22

Maibee se ita moris tuir Espiritu Santu nia hakarak mak ita nia hahalok hanesan tuir mai nee: iha domin, laran haksolok, paz ho dame, pasiensia, laran diak, halo diak, foo laran,

Efezu 4:25

Nee duni, la bele bosok tan. Imi koalia ba malu, tenki koalia loos, tanba ita hotu hanesan isin lolon ida.

Efezu 5:9

Ema nebee moris iha naroman, nia sei halo buat diak, moris loos, i koalia loos.

Efezu 6:14

Entaun, hamriik metin baa. Kaer metin lia loos; nee hanesan imi kesi sintu iha imi nia kanotak. Moris loos; nee hanesan imi hatais besi iha hirus matan para defende aan.

Filipi 3:1

Maun-alin sira, haksolok baa, tanba imi laran ida ona ho Nai Jesus. Maski hau hakerek fali buat nebee uluk hau hakerek tiha ona, maibee hau la baruk foo hanoin dala ida tan ba imi, atu imi fiar metin nafatin.

Kolose 4:5

Bainhira imi hamutuk ho ema nebee seidauk fiar ba Kristu, hatudu hahalok diak ba sira. Iha oportunidade saida deit, uza didiak baa.

1 Tesalonika 4:12

Se imi moris nunee, imi sei la tane liman ba ema seluk, i ema nebee la fiar ba Kristu sei respeita imi.

1 Timóteo 2:2

Halo orasaun ba liurai sira ho ema hotu-hotu nebee kaer ukun, para ita bele moris hakmatek ho dame, hodi adora Maromak i halo tuir Nia hakarak.

1 Timóteo 3:11

Nunee mos ho nia feen. Nia feen tenki ema respeita, domina aan, i la bele konta ema nia vida. Ema bele fiar nia iha buat hotu-hotu.

1 Timóteo 3:4

Nia tenki hatene eduka nia familia, i nia oan sira tenki respeita i rona ba nia.

1 Timóteo 4:12

Keta husik ema ida la konsidera o tan deit o foin-sae. O tenki hatudu ezemplu diak ba ema sarani sira, liu hosi o nia koalia, o nia hahalok, o nia domin, o nia fiar ba Jesus Kristu, ho o nia moris loos.

1 Timóteo 5:10

Ema rekonhese nia hanesan ema ida ke sempre halo diak ba ema seluk. Nia tau matan ba nia oan sira ho diak, simu bainaka iha nia uma ho laran tomak, serbii sarani sira ho haraik aan, fasi sira nia ain, ajuda ema nebee iha susar laran, i sempre prontu halo buat didiak deit.

1 Timóteo 5:2

Nunee mos ho feto sira. Koalia ho sira nebee idade liu o hanesan o koalia ho o nia inan rasik. I konsidera feto foin-sae sira hanesan o nia feton. O nia laran tenki moos ba sira.

Tito 1:8

Nia hakarak simu bainaka iha uma ho laran tomak, i gosta halo buat nebee diak. Tenki ema hatene lia, sempre halo loos ka justu, laran moos i domina aan.

Tito 2:14

Nia foo aan ba mate hodi hasai ita hosi buat aat hotu-hotu, i halo ita laran moos, para sai Nia povu rasik, nebee sempre hakarak halo buat diak.

Tito 2:2

Hatete ba katuas sira atu domina aan, i hatene aan, para ema bele respeita. Sira tenki hatene lia no fiar metin ba Maromak, hadomi ema seluk ho laran tomak, i pasiensia iha terus nia laran.

Tito 2:7

Tito, o tenki halo diak ba ema iha buat hotu-hotu, hodi sai ezemplu diak ba foin-sae sira. Hanorin ho laran; la bele hanorin oin ida, halo oin seluk.

Tito 3:14

Ita nia maluk sarani sira tenki aprende hakaas aan halo diak ba ema, hodi ajuda ema nebee presiza duni. Ho nunee sarani sira nia moris sei hetan fuan.

Ebreu 11:2

Ita nia bei-ala sira nia fiar hanesan nee. Tanba nee mak Nai Maromak simu sira ho laran haksolok.

Ebreu 13:18

Halo orasaun mai ami nafatin. Ami laran metin katak ami nia laran moos, i ami sempre hakarak atu halo buat nebee loos.

Tiago 1:27

Tuir Maromak nebee loos i la iha sala mak hanesan nee: ajuda feto faluk ho oan kiak sira nebee terus, i kuidadu aan atu la bele husik mundu nia hakarak dada ita ba hahalok aat.

Tiago 3:17

Maibee matenek nebee mai hosi Maromak mak nee: moos, lori dame, laran maus, konsidera ema seluk, laran diak, foo fuan diak, gosta ajuda ema, la haree ba ema boot ka kiik, i la finjidu.

1 Pedro 1:22

Imi hamoos ona imi nia aan hodi hatudu imi nia domin loloos ba maluk sarani sira, tanba imi moris tuir buat nebee mak loos. Agora hau husu atu imi hadomi malu nafatin ho fuan ho laran,

1 Pedro 2:12

Imi tenki hakaas aan para moris loos iha ema nebee laos judeu sira nia leet. Nunee, se sira duun matak imi, sira bele haree deit imi nia hahalok diak, i bainhira Jesus fila fali mai hosi lalehan, ema sira nebee laos judeu sira sei foti aas Nai Maromak nia naran.

1 Pedro 4:8

Importante liu tan mak imi tenki hadomi malu ho laran tomak. Tanba bainhira ita hadomi malu, ita hatene foo perdaun ba ema seluk. Tanba domin taka sala barak.

2 Pedro 3:1

Maluk doben sira, ida nee hau nia surat segundu ba imi. Iha hau nia surat rua nee, hau foo hanoin ba imi kona ba buat nebee imi hatene ona, tanba hau hakarak dudu imi ba hanoin nebee mak loos.

1 João 3:18

Oan doben sira, ita la bele hadomi ita nia maluk sira ho ibun deit, maibee ita tenki hatudu ita nia domin loloos liu hosi ita nia hahalok no moris loos.

1 João 3:3

Tanba nee, ema hotu-hotu nebee hein ho laran metin atu sai hanesan Nia, sira sempre kuidadu sira nia aan para moris loos, hanesan Jesus Kristu mos moris loos.

1 João 4:1

Maluk doben sira, se ema ruma mai dehan, nia iha Nai Maromak nia Espiritu, keta tuir lai. Imi tenki koko uluk para hatene, espiritu nebee sira iha nee mai duni hosi Nai Maromak ka lae. Tanba iha mundu nee iha profeta falsu barak ona.

Rut nia Istoria 3:11

Entaun o keta tauk! Hau sei halo tuir o nia hakarak hotu. Lalika hanoin barak, tanba ema boot hotu iha sidade nee sira hatene ona dehan, o nee feto ida ke laran diak no badinas.