Ester 7:10 - Biblia Tetun Dili

¹⁰ Entaun sira tara Amaan iha ai-riin nebee nia rasik harii hodi tara mate Mordekai. Oho hotu tiha, liurai nia laran mos malirin.

Ester 7:10 Iomraidhean Croise

Jenesis 40:22

Maibee ema ida toma konta liurai nia paun nee, sira tara mate tiha nia, tuir loloos José nia koalia.

Ester 2:1

Kleur-kleur liurai Ahasuweros nia hirus komesa para. Maibee nia sei hanoin nafatin nia kaben Vasti, ho nia hahalok sira nee, i ho nia surat dekretu nebee foo hatene kona ba nia kastigu.

Ester 5:14

I Amaan nia kaben Seres, ho nia kolega sira hotu, koalia dehan, “Se nunee, ami hatoo ami nia hanoin ida nunee: haruka ema harii ai-riin ida ho nia naruk metru 22. Tuir mai, iha aban dadeer-saan husu ba liurai para haruka ema tara tiha Mordekai iha ai-riin nee too mate. I tuir mai, bainhira baa haan hamutuk ho liurai, o nia laran bele hakmatek, tanba o nia problema ho Mordekai hotu ona.” Entaun Amaan simu ho diak sira nia hanoin nee, i nia haruka ema harii ai-riin nee, para nia bele tara mate Mordekai iha nebaa.

Ester 7:7

Liurai hirus teb-tebes. I nia hamriik sai tiha husik hela sira. Nia lao ba iha palasiu nia jardin hodi hanoin atu halo saida. Maibee Amaan haree katak liurai atu kastigu nia, tanba nee, nia hakarak hela nafatin iha nebaa hodi husu ba Ester para salva nia.

Ester 7:8

Iha festa nee, Ester toba hela iha kadeira naruk, tuir sira nia kultura. Momentu nee liurai mos fila hosi jardin ba fali iha festa nee, i nia haree Amaan monu ba Ester i kaer hela Ester nia ain hodi husu ba liurai nia kaben salva nia. Haree nunee, liurai mos hakilar dehan, “Hei! Ema ida nee demais liu ona! Nia bele brani hakarak toba ho hau nia kaben iha hau nia uma nee!” Rona liurai koalia nunee, nia funsionariu sira taka tiha Amaan nia oin ho hena. Nee hanesan sinal katak nia tenki mate.

Ester 8:7

I liurai Ahasuweros foo hatene ba Ester ho Mordekai dehan, “Nee loos, maibee nia susar mak nee: se iha ona surat dekretu nebee sai ona uza liurai nia naran no tau marka hosi liurai nia kadeli karimbu, entaun, orden nee la bele muda no dada fila fali. Maibee ema hatene ona katak hau haruka ema tara mate tiha ona Amaan. I hau mos entrega tiha ona Amaan nia riku-soin hotu iha Ester nia liman, tanba Amaan inimigu ho povu Judeu i halo planu para halo rahun sira hotu. I hau mos entrega tiha ona liurai nia kadeli karimbu ba Mordekai. Nunee imi bele hakerek saida deit, tuir imi nia hakarak kona ba problema ho ema Judeu sira. Para imi hatene, bainhira imi hakerek surat ruma uza liurai nia kadeli karimbu, entaun, ema la bele dada fila fali. Tanba ida nee, ho hau nia orden mos hanesan.”

Ester 9:14

Liurai simu Ester nia pedidu ho diak, i nia foo orden iha sidade Suzan para ema tara tiha Amaan nia oan mane nain sanulu nee nia mate isin.