hocisi poa peiskuisi tamo coni ta mcoosu, te yuyafi! hoci uk'a namo conci mcoo ho yʉmeʉmʉ no hpʉhpʉngʉ to hamo, te ʉmnʉhe nomo noemʉhʉ na mcoo ho noa to'ayumoneni ne vooecʉvcana.
'emo maica ci cou o'a mo i'mi ta natʉ'ca no ceoceona no hmuyu, o'amo i'mi no poc'ou ta cou, maezo o'amo h'unano i'mi no 'tohʉngʉ ta hahocngʉ ho yayo, mamo i'mi to hamo ho yayo.
isicu poa bʉkngʉ to hamo si mcoo hin'i, poa yatunga na 'tohʉngʉhin'i, ci tes'a teolʉ si mcoo hin'i, ma'sansano na 'tohʉngʉhin'i. ko'ko isi yainca to hamo: o'a tehin'i miezuhu mi'usnu a'o, poa aotothomneni a'o na hin'i.
'emo maica ci cou homo o'te tmaa'uzo, mo maica ho isi poa bʉkngʉ ta hicu ta hpʉhpʉngʉ na mcoo no 'tohʉngʉhe, poa o'te bohngʉ no tiskova ta fukuin; 'e fukuin isi engha 'omo natʉ'ca 'o psoevohngʉ to kilisto, 'o kilisto 'aeno a'ʉmtʉsi mi'ausna to hamo.
at'inghi, 'omo i'mi ne pepe ci moutʉs'ʉ mo piyo cila humzi: 'o ahoisi zou cofkoya, 'o cnguhusi zoucu moususeomʉ, luaeinva, nanghia, nongcʉngci to himngonghi, meelʉ beahci nomo atngaso ci ʉmnʉ, o'ala ma'cachi, o'amo me'ʉ'ʉmnʉ.
teto 'aveoveoyʉ to amohamo to nooe'oca iesu kilistoto! i'mi to uk'a noca'cʉ'hi ci himcocoveoisi, ieni to mcoi ho smoevovei to iesu kilisto, pafeni a'to 'emo faeva ci nsou, poa yaa yoayokeo ci ta'usni a'to.
