hoci zou, 'upena hoci o'te taa'uzva a'o, 'antemueno maka taa'uzva 'e hi'hioa'u, temueno ko'ko peelʉi asansana ho mio a'ʉmtʉ no'ayumonʉ ta nsou'u 'o amo, mi'o maezo no'ayumonʉ to nsou to amo.>
mi'o no'ayumonʉ to nsou to amo, 'o amo mo no'ayumonʉ ta nsou'u, o'a osko taa'uzva? 'e os'o mi'usneni muu ho engha ci e'e, o'a mo i'mi ta iachi'u. mamo i'mi tamo yonta nsou'u ci amo isi invonva hioa 'o hi'hioasi.
hoci mo'u o'te yonta taicohe ho hioa 'o o'amocu ohola ahta hioa ci hi'hioa, uk'a ci tehe nama kuisi. na a'ʉmtʉsi, ohecu aiti 'o o'u hioa, ihec'on'a sʉ'nova a'o, yaeza sʉ'nova 'o amo'u.
na eni ohsi ahoza hioa to iesu ci po'e, ohsi hioa to hosa ta kaana ne ngalilaya. na eni isi pa'teni na psoevohngʉsi; 'o tesisi mo acʉhʉ tmaa'uzo to iesu.
at'inghi te'o meelʉ tuyafo tamo asuhcuhe yaa tonʉ to yohane ci 'akasi, 'ai'ecueno hi'hioa'u. 'ai'o isieno toveineni a'o to amo'u ho poa aepʉngneni ci hi'hioa. 'e hi'hioa eni te peelʉicu 'akasi ho isi popeoskuna to amo a'o.
pantomo mainca ci coufalisai: panto h'unasi ci cou ihe yainca: <'e cihi cimo yaa kuisi ci cou teeno ahtu meelʉ peismi tamo maica ci po'e?> micu i'mi tan'e ho yupa 'eehcʉvho.
imu yaeza cohivi 'o counazalo ci iesu; 'o hamo mo mainenu na hiasi ieni to seilei ho ito meoino tonʉ ho hoyuha to feangosi, poa smaingabo ta mauhpʉhpʉngʉ, peihcocoyʉ to ʉmnʉ ci hi'hioa, aotothoma 'o isi atʉkca no 'akuma ci cou. 'amoeno maica ho isi no'upi to hamo.
<'oahngʉ'u ta 'isolaelu, temu talʉi 'e e'e'u. na 'emo cofkoya ci hi'hioa to counazalo iesu, isi na'na asansana 'o hamo isi ieni to isi hi'hioa ci po'e, taunona'vʉ ci tonʉ, h'unasi ci hi'hioa, mi'usnu muu ho epa'teni. 'e hi'hioa eni imu iachia cohivi, maica homo esmi ta taicomu.
