mi'o no'ayumonʉ ta nsouhe, na suu miko no'ayumonʉ ta nsou'u, akoeva no poa a'sʉftonʉ tmucni hin'i, ko'ko poa cohivneni ta yatatiskova ho osko popeoskuna a'o, yaeza cohivi ho osko ngohia hin'i, mais'a ho lako ngohia a'o.
teto acʉhʉ boemi no o'aisi feʉ'sa no yʉteʉ ci sapci ho psoevoveiya na psoevohngʉ to nooe'oca; i'omo i'mi to nooe'oca - i'o seilei - ci psoevohngʉ isi aezuha a'to, poa mi'u'usnu no mi'ausnasi na a'to ho poa yaa asuhcu tofsi'i ci psoevohngʉ.
i'omoso mainca ci hamo. 'aeno maezo i'omo boemi to tiskova ho psoetiskovi 'e 'to'tohʉngʉto ci hamo; isi poa bohngʉ no psoevohngʉ to hamo a'to, psoe'usna to sapci to iesu kilisto.
isi ngohia to hamo a'to, i'mi to mengumisi, isi pafi no 'auesiesi ci 'ʉteʉ ho yonghu ci ta'usni na a'to. 'e amohamo eni ho i'o nooe'oca iesu kilisto tesi'sio,
at'inghi i'ola noyʉcʉ to e'e to hamo ci cou, na mi'usnu to hamo ci himngonghi micu a'sʉftonʉ. i'ola mainca pano nsou to hamo, nte maito peipeis'ausna to iesu kilisto na h'oyunsova; maicac'o, tetoeno peelʉi pahsansana ho yainca, mitocu yaa nsou to hamo.
temueno aiti, mo mainenu na lasi hia ngohia a'to to amopepe! ac'ʉha no yainca zou 'o'oko to hamo na a'to; a'ʉmtʉsi, 'aeno a'ʉmtʉ 'o'oko to hamo a'to. ho lahe ko'ko o'te honga ta yata hpʉhpʉngʉ a'to, mo maica ho o'a ihe honga 'o hamo.
i'o os'o engha ci himngonghi 'aeno: teto asansano mee'ofeihni to mashʉyʉ to hamo. 'e ohmula asonghoza talʉi ci mashʉyʉ 'aeno: temula poa taiconeni ta h'oyunsovamu 'e mashʉyʉ eni.
inala toʉlʉi na yʉsʉsi ci cou te a'ʉmtʉ ʉm'ʉmnʉ! te meelʉ bonʉ to beahci to evi no nsou, a'vinano te meelʉ emomzo to phingi to hosa ho yʉmeʉmʉ to 'ayumonasi.
talʉi, mi'o yac'ʉ ta yafana ta phingi ho tmo'totokʉ; hoci panomo tmalʉ ta fihngau'u ci cou ho maavo ta phingi, te'o toehungneni bonʉ. tesi yaeza toehungneni bonʉ a'o.
