te asansana poa maica natemula hioa, maica imu cohivi zou cuma 'e hie maitan'e; zou hiesi no ntemucu i'mi no oengʉtʉ ho peihsasmome. maitan'e na to'usnu to hamo micu asuhcu cum'uhe ne mohton'a ahoi tmaa'uzo.
tec'u mon'i sucaefi 'e voecʉvcʉ, tec'u cmʉ'ho 'o tiskova. 'anateto 'aoko peis'usnu nomo voecʉvcʉ ci hi'hioa; la meua soanothʉ, ae'ayocʉ ehtothomʉ ho tenac'u tiskova.
teav'a poa peev'ov'ohneni to mav'ov'o ci lahe ti'a'ausna to cou. maica, auyusi hotena cmʉ'ho na hiesi 'atena ahtuo'te auyu yaa yutasufku; i'oisi asvʉta no meaapayo'ʉ ci la popeiskuzkuzo te yuyafo.
a'ʉmtʉs'a ʉm'ʉmnʉ 'emo mo'engho ta tposʉ tan'e! 'emo tmalʉ ta isi eyoca ho noyʉyʉcʉ ta isi tposi ci cou a'ʉmtʉs'a ʉm'ʉmnʉ! maica ho tec'u mon'i esmi 'e hiesi ta a'a'ausna tan'e.
na a'o - yohane te'o bumemeala etngoeva 'omo afu'u tmalʉ ta isi eyoca ta tposʉ tan'e ci cou: hoci panonte tmapuhngu no cuma ta e'e tan'e, 'o hamo tesi topceni ta cou tan'e 'o isi afu'a tposi ta tposʉ tan'e ci meakvo'ʉ;
at'inghi isi mi'usni a'o ho yainca: <'otes'a maica! na a'o ho suu, ho i'o 'oahngʉsu. 'ai'oeno 'o eyongensa ho i'ola afu'u meot'ʉcʉ ta e'e ta tposʉ tan'e, zouc'o acʉhʉ soskuskunu, nteko m'ohkuyu to hamo!>
os'o aiti 'omo yusuhngu to suoca'ha ci ic'o, 'o vhona to emucusi mo mʉpʉtʉ to tposʉ; 'e aavai ta tposʉ isi tangcʉngci to tposʉ, boemi to pitu ci thoomʉta.
