to 'ayumona tomo tmalʉ, panto mo i'mi to hosa ne tuiyatuila ci mamespingi, zou litiya 'o ongkosi; la momhino tatposa ci yʉteʉ 'o lasi hioa. la anana'o m'ohkuyu to hamo; isi paavi to nooe'oca 'o 'tohʉngʉsi, poa tmaayaezoyʉ to e'e to poolo.
at'inghi, 'o hamo isi ieni to piepiyasi ho paavneni a'to 'e moumsʉ'eonʉsi. 'o seilei isi so'eusoya 'e acʉcʉhʉ, ac'ʉhʉ to nomsʉ'eonʉ ci 'tohʉngʉ to hamo lasi yaeza peelʉi so'eusoya.
os'o ta'sokoeva na 'tohʉngʉmu hoci mi'usnuhe nomo kuzo, ciha na ma'mamhocni ho cofkoya ci himngonghi to kilisto, totiski to 'eva ne moso noa pa'hipepecvazi to moezʉezʉhʉ ci fkoi.
'o meoino long isicu topeohneni; 'aeno 'o ohola yainca fkoi noana'o, 'o ongkosi zou 'akuma hocieno satan, la maspepecvai ta yatatiskova. mo noa topeohneni ta ceoa; isi yaeza topehneni 'o soskuskunusi.
mo mayo to tonʉ, yonto tuhcu to ahoi yuansou ho hioa 'o meoino taunona'vʉ, i'hozi no poa ma'peu 'emo afu'u yonta ceoa ci cou. isi eucufna 'e cou ho teyaineni uacoua 'e moso alolongʉ no poyave hon'a yaansoua ci yuansou.
os'o cohivi 'o lako yoni 'aeno 'o lasi yoni bihonte to satan. leako meot'ʉt'ʉcʉ a'o, ac'ʉhʉ ne ohsi opcoza to hupa to satan 'omo meot'ʉcʉ ho 'akasi a'o ci 'antipa, yaeza o'aosko teongasi na singkoosu no mi'usnu a'o.
os'o cohivi na 'atutumzo ho ina thi'ciasu; at'inghi na a'ʉmtʉsi ma miko atngaso! os'o cohivi ihe ekuzkuzoa tola mainca couyutaya; a'ʉmtʉsi o'as'a a'ʉmtʉ couyutaya. ma 'oahngʉ to satan!
