'e e'e eni te peelʉi taa'uzva. os'o tata'za hociko ep'opnanfa 'emo maica ci hi'hioa, ko'ko poa asno'zonʉ peismi nomo ʉmnʉ 'omo tmaa'uzo to hamo ci cou; 'emo maica ci hi'hioa mo yonghu, koa ʉmnʉ ta cou.
'e tposʉ eni isi tposi 'o isi paavi to iesu kilisto. 'o hamo ho isi faeni to iesu kilisto 'e isi paavneni, tesi poa eʉsvʉtneni to masososkuskunusi 'o tec'u yuyafo ci hi'hioa tamo nanʉhtʉ ci hie. isi popeoskuna to kilisto 'o tensi ho mi'usni 'o soskuskunusi ci yohane ho pa'teni 'e hi'hioa eni,
mi'o i'vaho tmalʉ tomo i'mi ne pepe ci fihngau isi yainca: mo yut'ingi 'o seilei: <'aeno a'ʉmtʉ! tehecu peiseʉpngi na peihtutumzo hocu amiocni, maica na beahci no lahe hi'hioa la to'ofeihni.>
maica 'o isi akoeva no hioa to hamo isi siya ta 'tohʉngʉ tamo maskʉ ci honte, poa yaa totiski ci tehe mituhci, faeni ta yuansou na tonʉ no aʉt'ʉcʉ, ac'ʉhʉ ho tac'u peiseafi na e'e to hamo.
isi mi'usni to tensi a'o ho yainca: <'e maee'e eni zou mou'ʉmtʉ ho peelʉi tae'oci. i'o moso mofi to seilei to eyongensa ci nooe'oca hamo mo popeosmuhnu to soskuskunu, eʉsvʉta ta masososkuskunusi 'o tena asansano yuyafo ci hi'hioa tamoc'o nanʉhtʉ ci hie.>
talʉi, mi'o yac'ʉ ta yafana ta phingi ho tmo'totokʉ; hoci panomo tmalʉ ta fihngau'u ci cou ho maavo ta phingi, te'o toehungneni bonʉ. tesi yaeza toehungneni bonʉ a'o.
