sila hia me'ʉ'ʉmnʉ ci cou, ma aueva iseivha simo subkongʉ ta mcoosu ci ehti no evi, teeno buhsansano te yainenu ho 'iseafa na mo subkongʉ no nat'ohaesa ci yompuhu.
hola covnʉ, mo'ula esmi to sokoeva to fozu ci chumu, sokoeva to yaksai, sokoeva to couyutaya ho itola i'mi to couyafana, panto maezo sokoeva to mahohosa. sokoeva to maepuepuhu, sokoeva to etʉpʉ, ho i'o sokoeva to ihe hioa to menanat'ohaesa.
homoeno maica, mi'usnu tola potfʉngʉ to oko to hamo, hukoacumai 'o hmuyu to esvʉta to hamo - 'ai'oeno 'omo poa cofkoya to kuisisi ci hmuyu, a'vinano aokoe'iya 'o piepiya no mengumi, teeno yainenu 'emo maica ci cou? ta'to'tohʉngva. o'ates'aeno anana'o tiou note so'ecvʉha ci patvovei?
mioc'on'a mongoi ta emzo ci ceonʉ. 'emo maica ci cou 'anate peelʉi poa miovei, i'momhomʉ ma'vovei; maica ho ihe i'vaha spica to zuuzika 'o oko to hamo, apa'ta aokoe'iya.
mo emio 'o mahtuyaecihi, i'o a'a'ausnahe aʉlʉ mais'a <'o av'u lasi ooveia 'o ohsi teavta>, maezo mais'a <'o feʉ'ʉ cu 'afeunga toʉlʉi, mo yuovei to lingki ho tmaifeifei'i.>
