micu psoengabo ta siliya 'o ongkosi, ahoi tan'e. 'o yane'e ihe hafa 'omo tma'congo no mav'ov'o ho i'omo mav'ov'o ci la 'aotutumzo ci cou: maito isieno cʉnghi no hicu, tensen, meaupsu'hu, acʉha hafa uhto iesu, isi macoconi poa yov'oa to iesu.
taseonasi no maikayo, ataveisi no smoevovei 'o iesu, mo ahoi mi'usnu to maliya to motala 'o iesu ho aopa'to (ohsila peteoyafa to iesu 'omo pitu ci hicu to feangosi.) i'omo piyo ci maamespingi mo uhto petelo ho ito nanghiasi, acʉha eʉsvʉta 'o ohe afu'a talʉi.
panto mon'a piyo ci maamespingi, na'nosino 'o ohola poa yov'o ci isi ta'poe'i no h'aokuv'o ho ito tma'congo hocu yov'o; ta taicohe mo no'upu 'o maliya to motala, mosola pitu ci hicu 'o ohola peteoyafa to feangosi;
homo mainca 'o e'esi maica ho ohsiso pashʉi to iesu 'e h'aokuv'o ho poa mongoi ta feango ta cou tan'e. isi siho tʉtpʉta to h'aokuv'o, upena ne isi poekotva ho seo'eisi to ekʉka, isic'o peelʉi yʉntʉha 'o ekʉka, noa popeoyʉn'ʉa to hicu.
