maica hola le'aʉt'ʉcʉ peisu 'o yuta, ihe ta'unano isi eutotaveiya to iesu ho poa mhino note tititha ci macucuma hote meesi, hocieno poa mahafo no macucuma ho aangaezneni tomo thi'cia ci cou.
zou cihi cila ma'po'ʉ'ʉmtʉ ci cou; 'o conosi emoo la acʉhʉ m'ohkuyu to hamo, la asngʉcʉ to'usnu tola thi'cia ci couyutaya, a'vinano asno'zonʉ mi'usnu to hamo ho 'inoli.
mi'usnu tomo atngaso ta maitan'e ci cou, tekola engahva ho o'te poa bitano. nala ta'usni teav'a toe'ocneni ta o'ate peelʉi noe'oci ci yupasʉ, la noe'ocʉ tomo mofi ta at'otngaso ci macucuma ho poa titheni a'to ci hamo.
la mouhmʉskʉ 'o hamo; o'atesi ahta ta'payo'a na ohmula hioaneni ci hi'hioa ho ina himngonghi, 'aeno i'mi to lamu hia o'te tosvo to'usnu to mocmo ci sinto.
inalasi hia baito to amohamo, i'ola cofkoya ho uk'a heo'tʉ ci singkoo 'aeno: aʉt'ʉcʉ tola 'atutumzo ci 'o'oko ho itola tuvcongʉ ci mamespingi, ayʉca 'e iachi ho o'te poa uv'ohneni no tokuzo ta hpʉhpʉngʉ.
maanat'ohaesa'u, hoci panonte mainca mi'o yaa singkooa, ho o'te peelʉi honga no peipeis'ausnasi, cuma na koasi ʉmnʉ? tesieno peelʉi to'usni tamo maica ci singkoosi:
namo cihi cimo atngaso ci cou aiti 'e iachi nanat'ot'ohaesa homo aviovio, sʉmcʉ na 'tohʉngʉsi ho o'te cumasa, teeno ahta peelʉi yainca isi ngohia 'o hamo?
hoci panonte mainca , ho asʉsʉ'no no iachi nanat'ot'ohaesa, 'amicu meknuyu; ho o'a isieno maka ngohia 'e isi teolʉi ci nanat'ot'ohaesa, mante mainenu hoci himngonghi no o'a isi teolʉi ci hamo?
