temula iachi bumemealʉ, maezo nomio to ohsila toveineni muu to seilei ho aʉt'ʉca 'e kiokai ho bumemealʉ. la aʉt'ʉca 'o kiokai to hamo - 'aeno 'o isi ieni no mcoi to iachisi oko ho peʉezeni.
hoci ma'i poha'o, 'e tengami eni tesi eʉsvʉta muu, ho lato yonta emoo to hamo ntee mainenu na teto h'oyunsova. 'e emoo eni 'aeno kiokai to no'auesiesi ci hamo, zou sʉesʉ ho totnguca ta so'emio.
la psoyaska 'e fukuin, 'upena hoci auseoseolʉ ho o'te auseoseolʉ na hie la asno'zona psoyaska, boemi no someoisa ci luaveica ho eucucufnu, kokoicʉ, poucufnu, mo'ma'cohio.
ho teeno so'ehti ta kiokai, leaʉt'ʉcʉ ta emoo to hamo, nte uk'a 'o'emamzi no koica, o'ate ʉmnʉ hoci bobitano, pak'i, voemi, youbobai, makonvosʉ no yupasʉ;
la meo'uzo tola eahahafo muu ci cou, talʉi 'o lahe e'e. lahe asngʉcva so'eʉt'ʉca na piepiyamu, maica ho noana'o tenahela mi'usneni to hamo ho epa'teni. hocimu talʉi 'ate ahtuo'te peiskakaebʉ yaahioai, hoci o'te maica, te suhcʉhcʉ na 'tohʉngʉhe, hoci maica cumanantesi koa ʉmnʉ muu?
temula taaecingia 'o mosola eahahafo muu, psoecingha muu 'o e'e to hamo ci cou, ta'voveiya mosola mainenu na niala h'oyusovahe. mainenu na hia mcoi; la yoyayaeza na nia singkoohe.
'e macicihi ho mioeno acʉhʉ yaa mav'ov'o ci mengumi ho ʉmnʉ ci le'aʉt'ʉcʉ emoo to hamo, 'atelaeno maino imu tiova to hamo ci mav'ov'o ci mengumi ho yupa fifiho.
