'e hpʉhpʉngʉ cis'a yaa poa mongoi a'o ci hi'hioa, te a'ʉmtʉs'a sonac'oa! teeno o'te anana'o yuyafo 'emo maica ci hi'hioa, at'inghi namo himhohioa ho epohpoho ci cou tena ku'kuici!
ko'koeno, os'o ʉmnʉahe hoci mevaho mevcongʉ 'emo tuvcongʉ ci mon'a foinana ci mamespingi, yaa 'o'okoa, aʉt'ʉca na iachi emoo, poa o'te yaa 'eo'eongʉ no pohcinghi 'ola mihango a'to ci cou.
i'ola ngoe to ngotohva ci soskuskunu, ntela einva 'o iachi tauke, ci tehes'a 'o'emamzi no cou ho ekuzkuzoa na ongko to hamo ho i'o lamza hia mo'ma'cohio.
yainenu nate hia atʉkca 'e iachi, la ma'cocofkoya, tvaezoya no asusucza na emoo, ma'to'usnu to cou, meo'uzo to vcongʉ, tees'ala noa eaknuesa 'o e'e to hamo.
la poa suuseoseolʉ na e'e, poa o'te yaa 'eongʉ no eayaezoya no mocmo ci cou. maicac'o, i'ola mihango suu ci cou, maica ho uk'a ci lahe elʉa ci lato peis'epo, iachi ma'kokoe'i ho uk'a na e'e.
e'vono maica, mioc'o engha botngonʉ ci cou 'ola peis'ofeihni to lahe hia 'aʉnpʉnpʉ ci peipeis'ausna, 'amaknocu i'mi to lahe peipeis'ausna ho elʉ no ekuzkuzoa 'e so'emio.
