<'o amo'u isicu acʉha faeni a'o 'e acʉcʉhʉ. tapeoha 'o amo'u, uk'a cimo bohngʉ ta oko; tapeoha 'o oko ho inaisi 'ucia paavi ci cou, maezo uk'a cite bohngʉ to amo.
tehin'i'sola acʉhʉ tmucni. amo, tehin'i'sola no'ayumonʉ ta nsouto; totiski suu ho no'ayumonʉ ta nsou'u, tehin'i'sola acʉhʉ tmucni, akoeva no poa taa'uzveni ta yata hpʉhpʉngʉ ho zou suu namo popeosmuhnu a'o.
maanat'ohaesa, te'o boemi to ongko to nooe'oca iesu kilisto ho eucufna muu, la poa hmʉskʉ 'ola e'e, 'ote bipopaevai, la tmuteuyunu, yaa hmʉskʉ ci ta'to'tohʉngva, yaa totiski cite mituhci.
mi'usnu to micu yʉepʉngi 'o piepiya ci cou, lea'ueno o'te maezo mo'engho to moutʉs'ʉ; at'inghi o'ala mo'engho tomo tma'usnu ta hpʉhpʉngʉ ci moutʉs'ʉ, maezo o'ate'o mo'engho no moutʉs'ʉ ta tena suhcʉhcʉ cila aʉt'ʉcʉ ta hpʉhpʉngʉ.
i'omoso mainca ci hamo. 'aeno maezo i'omo boemi to tiskova ho psoetiskovi 'e 'to'tohʉngʉto ci hamo; isi poa bohngʉ no psoevohngʉ to hamo a'to, psoe'usna to sapci to iesu kilisto.
la'u m'ene to hamo to nooe'oca iesu kilisto, psoevohngʉ ci amopepe, pafi'sio no seilei na muu. 'e seilei eni tesi fii no moutʉs'ʉ muu, paavi muu ho poa bohngʉ to hamo.
o'amo anouc'o maica, os'o h'unasa hukokoakuzoa 'e acʉcʉhʉ ci hi'hioa, maica ho os'o angongohia ho mi'o bohngʉ to nooe'oca kilisto iesu. nomio to kilisto, os'o ciha 'e acʉcʉhʉ, ho ta'upa no pucu, te'o 'uciahe elʉa 'o kilisto.
i'mi tan'e, mimza mi'usnu ta afu'u cou ho psoyaska 'o kilisto, boemi ta mav'ov'o ci moutʉs'ʉ ho kokoica ho po'pa'cohivi muu, akoeva no 'ucia poa yʉepʉngi ci sinto 'emo macicihi, hafa uhto tuhcu to hamo.
te'o poa elʉ no poucufnu, meelʉ boemi no himngonghi ho tmuteuyunu, i'mi nomo bocbochio bohbohngʉ ho cmʉfeʉ ci singkoo ho honga na moumsʉ'eonʉ to hamo; 'e moumsʉ'eonʉ eni. 'ai'oeno feango to kilisto.
maicac'o, isi faeni a'to 'omo atva'esi meoisi ho atva'esa ngohia ci mengumi; ieni ta mengumi tan'e, mimu meelʉ pkaako tate koa meaapayo'ʉ ci ma'konvosʉ ta hpʉhpʉngʉ, ho tma'upu no yu'ausna to hamo.
temula yonto 'ayumona to nooe'oca - to mengumi to nooe'oca iesu kilisto ho ino hiato honga, a'cʉ'cʉnʉ ohsuhcu, no'usnu'sio to nooe'oca na psoevohngʉ, ahoi maitan'e ac'ʉhʉ no 'auesiesi! 'aamen.
ito cohivi, micu cmʉ'ho 'o oko to hamo, a'vinano pafi no toutʉs'ʉ na a'to, ko'ko poa bohngʉ to a'ʉmtʉ hamo na a'to. mito no'ayumonʉ no nsou to a'ʉmtʉ hamo. 'aeno 'ayumona to nsou to okosi iesu kilisto. zou a'ʉmtʉ hamo, 'aeno 'auesiesi ci nsou.