Ɛ̀hvìrzìyà 4:5 - Mokpwe: Bakwery (New Testament)

⁵ Irzɔ hwa arzɛ i hwɛni ndi Rzàŋgo hvɔ̀kɔ. Ndèŋgàna irzɔ hwa arzɛ jò òhvi ndi lì lòkɛ̀ lɔ̀kɔ̀, ndèŋgànà i lu hvɛ ndi lì lùhwìrzɛ̀ lɔ̀kɔ̀.

Ɛ̀hvìrzìyà 4:5 Iomraidhean Croise

Matiyò 28:19

O èŋgànɛ̀lɛ̀ rzɔ e ɛndɛ ò hwèkòmè hwe arzɛ hwe ene rze, e gbèèye hwatò ò lì hwɛ hwà-òkòwèlì hwa ami. È hwa lùhwìrzɛ̀ ò lìna la ama Tatɛ̀, ò lìna la ama e Ŋmanà, na ò lìna la Èlìŋgɛ̀ yà Wòtani.

Hwègbèèlì 10:36

Inyɔ e hwi ŋmɛ̀ndì ema Lohwɛ̀ à mà òmeya hwatò hwa Irzàyɛ̀lì. Mòŋgò ŋmɛ̀ndì, mò ma hwɛ ndi lì hvòmɛ̀nɛ̀ hweyòhwèlì hwe Ŋmɛ̀ndì mò Gbamù mò ɛ̀yɔ̀lɛ̀, ema mò ma jɛ̀ɛ̀ ò lì akeyà na Yerzù Krirztò. Mɔ̀ ndi à hwèlì Rzàŋgò ya hwatò hwa arzɛ.

Hwègbèèlì 2:36

Petrò rzìi a hwatɛ hvɛ ò lì òhwa nanù ema, “O eŋgànɛlɛ rzɔ inyɔ hwa arzɛ hwatò hwa Irzàyɛ̀lì e hwɛni lì hwiye na e jɔ̀kɛ̀ nanù ema, ò nò Yerzù ema inyɔ e ma wòmeyà ò mbarza mɔ̀ ndi à hwèlì e mɔ̀ ema Lohwɛ̀ à mà gbeyɛ, e Rzàŋgò ndèŋgànɛ̀lɛ̀ mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.”

Ròmànì 3:30

Lohwɛ̀ a hwèlì ndi Lohwà lɔ̀kɔ. O èŋgànɛ̀lɛ̀ rzɔ a ò wòwa hwatò ema hwà mà endàhwɛ̀ nàa hwatò ema hwa tɛmi ehve-ehve hwa lòkɛ̀ tɛ Yerzù Krirztò. Ŋgana hvɔ̀kɔ hvɛ mɛnɛ nanù ndi à ò wòwɛ hwatò ema hwa rza endàhwɛ̀ wɔ̀ hwa lòkɛ̀yì tɛ Yerzù Krirztò.

1 Kɔ̀rintìyà 1:13

Krirztò àkahwàwɛ̀ hwèhvàrzù na hwèhvàrzù e? Ìmba Pàwolò ndì hwà mà wòmeyà ò mbarzà ò nyòla anyu e? Ò hwèlì tɔ̀ mɔ̀kɔ wà anyù ema à mà lùhwìrzɛ̀hwɛ̀ ò lìnà là amà Pàwolò e? Ò lì ohwà è jɔ̀kɛ̀, ò rzà enjè tɔ̀ mɔ̀kɔ.

1 Kɔ̀rintìyà 1:2

Nà tìleya ndi ŋmèmba mò hwatò hwa Lohwɛ̀ ema mò hwèlì ò mbowà ndɛnɛ̀ yà Kɔ̀rintò. Inyɔ ema è hwɛ̀lɛ̀hwɛ̀yi nà Lohwɛ̀ ò lì hwɛ hwatò hwa eni hwa wòtani. À è gbèyi wòrzaŋgi èhwanja e ahviyànɛ nà Yerzù Krirztò. Nànù mɛnɛ hvɛ ndi à hvɔ̀rzì hwatò hwa arzɛ o èki ya arzɛ ema hwa kanɛ̀ o lìna la ama Rzàŋgo Yerzù Krirztò. È Rzàŋgo ya awu nà è yà arzù.

1 Kɔ̀rintìyà 12:13

Nànù mɛnɛ hvɛ ndi e hwèlì na irzɔ hwa arzɛ e hwɛ ndi ŋga wònyà Yudà o tɔ̀ hwaŋga ema hwa rza enje wònyà Yudà tɔ̀ e hwɛ ndi ŋga hwàkòmì tɔ̀ e hwaà wònjà irzɔ hwa arzɛ i lùhwìrzɛ̀hwɛ̀ ndi na èlìŋgɛ̀ yà wòtani, o tenì ya èŋge nyo ya ahvɔ̀kɛ. Ndèŋgana Lohwɛ̀ à mà jo rzòòkɛ èŋge èlìŋgɛ̀ yà wòtani mɛnɛ o tenì ya mèèmà me arzu.

1 Kɔ̀rintìyà 12:5

O hwèlì hvɛ nyayi na nyayi ja ŋgàna o lì gbeyà e Rzàŋgo ndi, molemilemi mo Lohwà ndi i gbèeyà.

1 Kɔ̀rintìyà 8:6

Ndi irzɔ i hwi nanù ema, ò hwèlì ndi Lohwà lɔ̀kɔ. Tatɛ̀ ema à wèki hwema hwe arzɛ, Mɔ̀ ndeŋgatɛ irzɔ i hwèlì lòŋgɛ. Ò hwèlì hvɛ ndi Rzàŋgo hvɔ̀kɔ, Yerzù Krirztò, lì akeyà nà Mɔ̀ ndi Lohwɛ̀ à wèki hwèmà hwe arzɛ, Mɔ̀ ndeŋgatɛ irzɔ i hwèlì lòŋgɛ.

2 Kɔ̀rintìyà 11:4

Imba na ohwa ndi ene eyà nanù èhwanja mòtò a jelì tɛ rzi a e ohweyà ŋmɛ̀ndì ema mo rza enje ndi ŋmɛ̀ndì mo ama Yerzù Krirztò, ema irzɔ i hwèlì lì e ohweyà inyɔ e mo emeyà. Tɔ̀ e hwɛ ndi ema mɔ̀ à e ohwèlì tɛ ndi eyà ya lì hvomɛ̀nɛ̀ èlìŋgɛ̀ ema rzeketɛ yɔ ndi irzɔ je e ohweyà e emeyà. Tɔ̀ mòtò a e ohwèlì tɛ ŋmɛ̀ndì mò gbamù ema rzɛ̀kɛtɛ mo ndi irzɔ je e ohweyà, inyɔ e mo emeyà.

Gàletìyà 5:6

Ŋga wà endà mòtò tɔ̀ wà rzi mò endè eŋge è rza ohvi tɔ̀ eyà ò lì gbeyà nà lì hwɛ là arzu nà Krirztò. Mamɛ ema è hwèlì wòlìto è hwèlì ndi ò lì lòkɛ̀ Krirztò. Lìŋgi lì lòkɛ̀ lì àŋgàmɛ̀nɛ̀yi lì àwùlùhwɛ̀ ò è ndìŋgɛ ema jà à àwùŋmɛ̀lɛ̀nɛ̀ mɔ̀kɔ nà ɔ̀nɛyi.

Ɛ̀hvìrzìyà 4:13

Ène e o hwɛ natɛ̀ɛ na e hvonda ema irzɔ hwa arzɛ jo ò hwɛ mòtò mɔ̀kɔ ndèŋgàna na oma i lòkɛ̀ è Ŋmanà wà munyanà wa ama Lohwɛ̀ jo ò mo hwiya. I hwèlì tɛ nanù, e jo gbeyà jo ò hwɛ hwatò ema hwà mà oŋwɛ o ma i ma hwɛ nàa Krirztò ema a mo òŋwɛ.

Hvìlipìyà 2:11

Hwàto hwa arzɛ hwa o ohwa nanù ema Yerzù Krirztò ndi à hwèlì e Rzàŋgo. Aŋga nanù Lohwɛ̀ ema a hwèlì e Tatɛ̀ a o luwa èluhwe.

Hvìlipìyà 3:8

Rzeketɛ hweŋge hweyà mɛnɛ, ndi na wowi hweyà hwe arzɛ nàa eyoyo, na hwe mɛnɛni tɛ na eŋge eyà ndɛnɛ ema e hwèlì o lì hwiya Yerzù Krirztò e Rzàŋgo ya ami. Èhwànja hweŋge hweyà hwe arzɛ hwe hwèlì ndi eyoyo ndèŋgànɛ̀lɛ̀ nà hwe ɛnɛ ndi nàa mbindo aŋga nanù na hwiya Krirztò,

Tàyìtùrzì 1:1

Ìmba Pàwolò ema nà hwèlì e mògbèèlì wà ama Lohwɛ̀ nà è àpɔ̀rzìtòlò ya ama Yerzù Krirztò ndi nà tilì ene kààtì. Yerzù ndi à mà nò hvɔ̀rzɔ̀ rzìi à nò oma o lì ɛndɛ lì ètìrzɛ̀ lìlòkɛ̀ la hwatò ema Lohwɛ̀ à mà hvɔ̀rzɛ̀, nà o lì hwa oŋgowàna o lì hwiya e jɔ̀kɛ̀ lì hvomɛ̀nɛ̀ Yerzù, na o lì gbeyà na oma Lohwɛ̀ a àrzeyà.

Tàyìtùrzì 1:4

Ò wà Tàyìtùrzì ndi nà tìlèlì ene kààtì. Ò hwèlì ndi nàa è ŋmanà wà ami wà jɔ̀kɛ̀ ò lìlòkɛ̀ ema irzɔ hwa arzɛ jo ohvi. È ndèli nà ɛ̀yɔ̀lɛ̀ ema è uwɛ̀lɛ̀lɛ̀ ò mà Lohwɛ̀ è Tatɛ̀ nà Yerzù Krirztò è Mòrzùŋgèlì hwa arzu è hwɛ nà ò wà.

Hibrù 13:7

È ɔ̀ŋgɛ̀lɛ̀ hwàtimbèlì hwa anyu hwa kòhwà ema hwa mà e ohweyà Eyà ya Lohwà è ɔ̀ŋgɛ̀lɛ̀ nà oma hwà mà lìya mòŋgɛ ma awu, e hwa nɔŋge matàŋgà mà awu ndeŋgànɛ̀lɛ̀ e lòkɛ̀ na oma wɔ̀ hvɛ hwà mà lòkɛ̀.

Hibrù 6:6

È hwèlì tɛ nanù ema hwaŋga hwatò hwà mà màa lì ɛnɛ hweŋge hweyà, rzìi hwa kìnyɛ̀lɛ̀ màlòkɛ̀ ma awu, tɔ̀ mòtò a rza tanɛ lì hwa tìmbìrzɛ hvɛ o lì àyèŋgowɛ̀ o wòhwe o lì nɔ̀ŋgɔ̀ Lohwɛ̀. Nà oma hwa rzɔ̀njɛlɛ è Ŋmanà wà Mùnyanà wa ama Lohwɛ̀, e hwèlì ndi o a ɛnɛ oma hwà mà mo wòmeyà hvɛ o mbàrza. Ndeŋgànɛ̀lɛ̀ hwà mà mo gbeyà o lì oka irzɔ̀ni o worzo wo hwatò.

Jèmìrzì 2:18

Mòtò mɔ̀kɔ a no òhweyà nanù ema, “Ono mòtò a ohvi lìlòkɛ̀, ɔ̀nɛyi mɔ̀ hvɛ a gbeyà hweyà hwe gbamù.” Nà mo alàhwɛ̀ nanù ema, “O no uŋmɛ̀lɛ̀ nɛ mòtò a tànɛyi lì hwɛnɛ lìlòkɛ̀ ema a rza gbeyɛ hweyà hwe gbamù, na o uŋmɛ̀lɛ̀ lìlòkɛ̀ la ami o hweyà hwe gbamù ema na gbeyà.”

1 Pètrò 3:21

Ndeŋgànɛ̀lɛ̀ manù malìhwà mà tɛmelì ndi lìlùhwìrzɛ̀. O naŋgɛ, lìŋgi lìlùhwìrzɛ̀ lɔ ndi lì gbèyi ɔ̀ndeŋgàtɛ̀ hwatò hwa rzùŋgahwì o lì akeyà na e ŋginyà ya hwèhvùmuwèlì hwe ama Yerzù Krirztò. Lìlùhwìrzɛ̀ lì rza enje ndi o lì ulɛ la ŋmiŋgo ò nyo, ndi lì hwèlì ndi o lì emeyà o lì gbèeyà Lohwɛ̀ na ŋmèma mo rzàŋgi.

2 Pètrò 1:1

Imba Rzimɔ̀ni Pètro ema nà hwèlì è mògbèèlì nà è àpɔ̀rzìtòlò yà ama Yerzù Krirztò, nà è tìleyà ndi inyɔ hwatò ema è lòkɛ̀ Yerzù Krirztò nyayi hvɔ̀kɔ hvɛ nà oma irzɔ hvɛ ì mò lòkɛ̀. Yerzù Krirztò ndi à hwèlì Lòohwà nà Mòrzùŋgèlì hwa arzu. Mɔ̀ à tɛ̀mì ehve-ehve. Ndeŋgànɛ̀lɛ̀ mɔ̀ ndi à gbèyi ndèŋgànà irzɔ hwa arzɛ jè è mò lòkɛ̀.

Judɛ 1:20

Ndi imbùnda jà ami kòkò, inyɛ lìlòkɛ̀ là wòtani ema è hwɛni lì hwɛ ndi ò lì ɔŋgɔ ò tenì yà anyu lì ɛndɛ ò worzo. È kànɛ nanù ema è ŋginyà yà Èlìŋgɛ̀ yà Wòtani yè è timbe.

Judɛ 1:3

Imbùnda jà ami kòkò, nà hwèlì nà atàkìrzɛ̀ ò lì è tìleyà lì hvomɛ̀nɛ̀ lì rzùŋgàhwà ema Lohwɛ̀ à mà jò ŋgbɛ ò lì akeyà nà Yerzù Krirztò. Ndi o nàŋgɛ, na ɛnɛ nanù ema o lɔ̀wu nanù ema na e tìleya o lì hvomɛ̀nɛ̀ hwehvɛhvɛ hweyà. Nà e kɔ̀mɛ̀lɛ̀ nanù ema, e a alɛ̀mbɛ̀nɛ na ŋginyà e jɔ̀kɛ̀ ya ŋmɛ̀ndì mò gbamù. Mono ŋmɛ̀ndì mò gbamù mo rza àyèŋgòwɛ̀. Lohwɛ̀ à mà mo ŋgba hwatò hwa eni ŋgelì hvɔ̀kɔ o iŋgèlì ja arzɛ.