तुमने मोय नांय चुनों पर मैंनें तुमें चुनों है कै तुम जाऔ और भौतसे फल लाऔ और बे फल तुम में हमेसा बनो रहें और मेरौ नाम लैकें तुम जो कछू पिता ते मांगौगे तौ बू तुमें दै देगौ।
पर अब तुमें पाप ते छुटकारौ मिल चुकौ है और परमेस्वर के दास बना दये गये हो, तौ जो खेती तुम काट रये हो, तुमें परमेस्वर के प्रति सम्पूर्न समर्पन में ले जाबेगी। जाकौ अंतिम परिनाम कबऊ नांय खतम हैबे बारौ जीबन है।
चौंकि परमेस्वर नें हमें बनांयौ है, और बानें ईसू मसीह में हमारी सृस्टी जामारै करी है कै हम अच्छे काम करै, जिनै परमेस्वर नें पैहले तेई हमारे काजै तैयार करौ है।
जाते कै तुमारौ चाल-चलन बिलकुल पिरभू के जैसौ है जावै और तुम सब तरैह ते पिरभूए खुस रख सकौ। तुमारे जीबन ते हर तरह के भले काम होते जावें और परमेस्वर कौ ग्यान तुम में दिन प्रतिदिन बढ़तौ जाबै।
जो सुभ समाचार तुमारे जौरें पौहचों है और जैसौ संसार में बू वचन फल और फूल रयौ है और बढ़तोई जा रोहै, और बाई तरीका ते जा दिना बू वचन तुमनें सुनों और बाय सुनकें तुमनें पूरी सच्चाई ते परमेस्वर कि किरपा की पैचान करी बा वचन नें तुमारे भीतर बैसौई काम करौ है।
जा समै डाँट दयी जातैं, बा समै डाँट अच्छी नां लगै। पर हमें बाते दुख होतै, पर जो डाँट सहते सहते पक्के है गये हैं, बे आगें चलकै नेकी और सान्ती कौ प्रतिफल पांगे।
तुमऊ जीबते पत्थरन की नाईं आतमिक घर बनते जारे हैं, जाते तुम पुरोहितन कौ पबित्र समाज बनकें एक ऐसौ बलिदान चढ़ाऔ जो ईसू मसीह के द्वारा परमेस्वर के अपनांबे लायक है।
पर तुम लोग चुने भये वंस, राज पदधारी पुरोहितन के समाज, और पबित्र लोग और परमेस्वर की चुनी भई निज पिरजा हैं, जामारैं तुम लोगन कूं अन्धेरे में ते निकारकैं अपनी अदभुत उजीते की रोसनी में बुलायौऐ। तुम वाके गुन उजागर करौ।
अगर तुमारौ मसीह कौ नाम लैबे की बजैह ते अपमान करौ जाय और दुख उठानौ परै, तौ तुम अपने आप कूं धन्य समझौ, चौंकि जि जाकौ सबूते कै परमेस्वर की महिमा कौ आतमा तुमारे ऊपर छाया करै।