Rom 8:16 - Yesus Aqa Anjam Bole

¹⁶ Qotei aqa Mondor a segi gago are miligiq di waueqnu deqa iga endegsi boleq di mareqnum, bole, iga Qotei aqa aŋgro unum.

Rom 8:16 Iomraidhean Croise

Matyu 5:9

“Tamo uŋgasari jeu turyoqnsibqa lawo kumbra boleq ateqnub qaji naŋgi dego tulaŋ areboleboleinjreme. Di kiyaqa? Qotei a naŋgi qa olo marqas, ‘Naŋgi ijo segi aŋgro bole.’

Luk 20:36

Naŋgi laŋ aŋgro bul laŋa sqab. Deqa Qotei na naŋgi subq na tigeltnjrimqa naŋgi aqa segi aŋgro bole sqab. Deqa naŋgi olo moreŋqa keresai.

Jon 1:12

Ariya tamo uŋgasari qudei naŋgi a areiyeb. Tamo uŋgasari naŋgi di aqa ñam qa naŋgo areqalo siŋgilateb qaji. Onaqa a na naŋgi giltnjrej. Yim naŋgi Qotei aqa aŋgro sqajqa deqa.

Aposel 5:32

Iga gago segi ŋamdamu na Yesus aqa kumbra di unoqnsim deqa mare mare laqnum. Qotei aqa Mondor Bole na dego Yesus aqa kumbra deqa mare mare laqnu. Qotei na tamo uŋgasari aqa anjam dauryeqnub qaji naŋgi aqa Mondor di enjreqnu.”

Rom 8:14

Tamo uŋgasari kalil Qotei aqa Mondor na naŋgi gam osornjreqnaq walweleqnub qaji naŋgi Qotei aqa aŋgro tiŋtiŋ unub.

Rom 8:19

Di kiyaqa? Qotei a nami aqa aŋgro naŋgi boleq atqajqa bati atej. Iŋgi iŋgi kalil Qotei a nami ateleŋej qaji naŋgi bati di unqajqa deqa tariŋoqnsib unub. Iŋgi iŋgi naŋgi di taroqnsib ŋam atoqnsib endegsib nenemeqnub, “Bati gembu bati di brantqas?”

Rom 8:23

Iŋgi iŋgi kalil di naŋgi segi akamosai. Iga Qotei aqa Mondor ejunum deqa iga dego akamoqnsim unum. Qotei na aqa Mondor iga namo egej. Iga Qotei aqa aŋgro unum deqa iga dego jaqatiŋ oqnsim akamoqnsim unum. Mondoŋ Qotei na iga aqa segi aŋgro qa boleq na endegsi marqas, “Naŋgi ijo aŋgro kalil.” O was qu, bati di brantqajqa deqa iga tariŋoqnsim unum. Bati di brantimqa Qotei na gago jejamu bulyetgosim jejamu bunuj egwas.

Rom 8:26

Iga siŋgila saiqoji unum deqa Qotei aqa Mondor a dego iga aqaryaigeqnu. Iga iŋgi kie qa pailyqajqa di iga geregere qaliesai. Deqa Qotei aqa Mondor a segi na iga aqaryaigwa osiqa iga qa pailyeqnu. A akamoqnsiq boleq na marosaieqnu.

Rom 9:26

E nami sawa bei bei qaji tamo naŋgi endegsi minjrem, ‘Niŋgi ijo tamo sai.’ Ariya bunuqna e na naŋgi olo endegsi minjrqai, ‘Niŋgi ijo segi aŋgro unub. Agi e Qotei ŋambile unum qaji.’”

Rom 9:8

Anjam di aqa utru agiende. Tamo naŋgi mandam tamo naŋgo leŋ na ŋambabeb qaji naŋgi Qotei aqa aŋgro tiŋtiŋ sai. Tamo naŋgi Qotei aqa anjam nami marej qaji di qusib bole qa marsib naŋgo areqaloq di siŋgilatqab qaji naŋgi segi Abraham aqa aŋgro tiŋtiŋ sqab.

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

2 Korin 1:22

Osiqa aqa segi toqor egsiqa gago are miligiq di atej unu. Aqa toqor di aqa Mondor Bole. Mondor di a na iga namo egej deqa iga qalieonum, bunuqna iŋgi iŋgi kalil a na iga egwa marej qaji di olo egwas.

2 Korin 5:5

Qotei a segi na iga ŋambile di oqajqa gam gereiyetgej. Osiqa aqa Mondor Bole iga egej. Mondor di Qotei na iga namo egej deqa iga qalieonum, bunuqna iŋgi iŋgi kalil a na iga egwa marej qaji di olo egwas.

2 Korin 6:18

Osiy e nuŋgo Abu soqnit niŋgi ijo segi aŋgro tiŋtiŋ sqab.’ Tamo Koba Qotei siŋgila koba ti unu qaji a degsi marej.”

Galesia 3:26

Niŋgi kalil Kristus Yesus qa nuŋgo areqalo siŋgilatosib a beteryejunub deqa niŋgi Qotei aqa aŋgro tiŋtiŋ unub.

Galesia 4:6

Deqa bini niŋgi Qotei aqa aŋgro tiŋtiŋ unub. Agi a na aqa Ŋiri aqa Mondor qariŋyonaqa a gago are miligiq aiej. Aiej deqa iga Qotei metoqnsim endegsi minjeqnum, “O ni gago Abu.”

Efesus 1:13

Niŋgi sawa bei bei qaji tamo uŋgasari niŋgi dego Qotei aqa anjam bole queb. Anjam bole agiende. Qotei a Kristus aqa wau na niŋgi eleŋej. Niŋgi Kristus qa nuŋgo areqalo siŋgilatosib deqa a beteryesonab Qotei na aqa anjam nami marej qaji di dauryosiq aqa toqor niŋgi eŋgej. Deqa niŋgi aqa segi tamo uŋgasari unub. Toqor di agi Qotei aqa Mondor Bole.

Efesus 4:30

Niŋgi na Qotei aqa Mondor Bole are gulube yaib. Mondor di Qotei aqa segi toqor. Mondor di a na niŋgi eŋgej. Deqa niŋgi qalieonub, niŋgi aqa segi tamo uŋgasari tiŋtiŋ unub. Mondoŋ Qotei na niŋgi awaiŋgosim sawa boleq di atim bati deqa niŋgi so bole gaigai sqab. Niŋgi di qalieqajqa deqa Qotei na aqa Mondor Bole niŋgi eŋgej.

1 Jon 3:1

Bole, gago Abu Qotei a na iga tulaŋ qalaqalaigeqnu! A na iga aqa segi aŋgro tiŋtiŋ sqa marsiq iga giltgej. Deqa iga bole qalieonum, iga Qotei aqa aŋgro bole. Tamo naŋgi mandamq endi unub qaji naŋgi Qotei qa qaliesai. Deqa naŋgi iga qa dego qaliesai.

1 Jon 3:10

Iga kiersi qalieqom, tamo di a Qotei aqa aŋgro? Tamo di a Satan aqa aŋgro? Iga endegsi qalieqom. Tamo naŋgi kumbra tiŋtiŋ yosaieqnub qaji naŋgi Qotei aqa aŋgro sai. Tamo naŋgi Qotei aqa aŋgro naŋgi qalaqalainjrosaieqnub qaji naŋgi dego Qotei aqa aŋgro sai.

1 Jon 3:2

O ijo kadoi bole, bini iga Qotei aqa segi aŋgro tiŋtiŋ unum. Ariya mondoŋ iga kiersi sqom di iga qalieosaiunum. Ariya iga qalie, Kristus a olo bamqa iga a unsimqa iga a bul sqom.

1 Jon 4:13

Iga kiersi qalieqom, Qotei a gagoq di beteresonaqa iga kamba dego a beteryejunum? E marqai. Qotei na aqa Mondor iga egej dena iga qalieonum.

1 Jon 5:10

Tamo bei a Qotei aqa Ŋiri qa aqa areqalo siŋgilatqas di aqa Ŋiri qa anjam dego aqa are miligiq di siŋgilatim sqas. Ariya tamo bei a Qotei aqa anjam aqa areqaloq di siŋgilatqasai di a na Qotei aqa ñam ugetosim Qotei a gisaŋ tamo qa minjobulqas. Di kiyaqa? A Qotei aqa Ŋiri qa anjam Qotei na iga mergeqnu qaji di aqa areqaloq di siŋgilatosai deqa.

Uli Anjam 21:7

Tamo a Satan ombla qotsim siŋgilaqas di e na iŋgi iŋgi kalil di laŋa yqai. E aqa Qotei sqai. A ijo aŋgro sqas.