Rom 3:4 - Yesus Aqa Anjam Bole

⁴ O was qu, iga degsi marqasai. Iga endegsi marqom. Tamo kalil naŋgi gisaŋ tamo. Ariya Qotei a segi qujai gisaŋ tamo sai. A anjam bole segi gaigai mareqnu. Agi Qotei aqa anjam bei nami endegsib neŋgreŋyeb unu, “O Qotei, ni gaigai kumbra tiŋtiŋ na e pegibeqnum. Ariya tamo qudei naŋgi na ni pegimqa maribqa ni na olo naŋgi buŋnjrsim ni une saiqoji sqam.”

Rom 3:4 Iomraidhean Croise

Matyu 11:19

Ariya e Tamo Aŋgro bosimqa iŋgi ti wain ti uyeqnamqa tamo naŋgi e nuboqnsib mareqnub, ‘Niŋgi uniye. Yesus a qunjaŋ ani. A wain uyo ani. A takis o qaji tamo ti une tamo ti naŋgi koba na walweleqnub.’ Tamo naŋgi e qa misiliŋ anjam degsib mareqnub. Ariya niŋgi Qotei aqa wau unqab di niŋgi poiŋgwas, Qotei a qalie bole.”

Luk 20:16

E niŋgi merŋgwai. A bosim naŋgi ñumsim moiotnjrqas. Osim aqa wau di olo yainjrsim tamo qudei naŋgo baŋq di uratetnjrimqa naŋgi na taqatqab.” Yesus a na naŋgi yawo anjam degsi minjrnaqa naŋgi qusib kamba minjeb, “Wau taqato tamo naŋgo kumbra di tulaŋ uge. Naŋgi kumbra deqaji yaib.”

Jon 3:33

Tamo naŋgi Yesus aqa anjam ojeqnub qaji naŋgi a qa naŋgo areqalo siŋgilatoqnsib mareqnub, “Bole, Qotei a anjam bole qa utru.” Naŋgi degsib mareqnub.

Rom 11:1

Deqa e niŋgi endegsi nenemŋgwai. Qotei na aqa segi tamo uŋgasari agi Israel naŋgi qoreinjrsiq torei walinjrej e? Sai. E dego Israel tamo. E Abraham aqa moma. E Benjamin aqa leŋ.

Rom 11:11

Deqa was qu, e niŋgi endegsi nenemŋgwai. Israel naŋgi ululoŋeb deqa naŋgi torei padalqab e? Sai. Bole, naŋgi Qotei qoreiyeb deqa Qotei a olo sawa bei bei qaji tamo uŋgasari naŋgi eleŋeqnu. Ariya Israel naŋgi Qotei aqa kumbra di unsibqa are ugeinjrim aqaq olo bqajqa deqa are qalsiq sawa bei bei qaji tamo uŋgasari naŋgi eleŋeqnu.

Rom 3:31

Iga maronum, iga Yesus qa gago areqalo siŋgilatqajqa kumbra di tulaŋ boledamu. Ariya iga degsi maronum dena iga olo dal anjam taqal ateqnum e? Sai. Iga Qotei aqa dal anjam olo siŋgilateqnum.

Rom 6:15

Iga olo dal anjam aqa sorgomq di sosai deqa iga kierqom? Qotei a iga qa are tulaŋ boleiyej kumbra di aqa sorgomq di iga unum. Deqa uŋgum, iga une yoqnqom e? Sai.

Rom 6:2

Sai. Iga moiobulem deqa iga une aqa kumbra uratem. Deqa iga kiersim olo une yoqnqom?

Rom 7:13

Deqa e kiersi marqai? Dal anjam bole dena e lubsiq moiotbej degsi marqai e? Sai. Une na e moiotbej. Dal anjam bej dena une a gam itosiqa e moiotbej. Qotei a odonaqa une a kumbra degyej. Di kiyaqa? Qotei a endegsi are qalej, une a boleq dimqa iga unsim qalieqom, bole, une a tulaŋ ugedamu. Gam dena dal anjam a une aqa kumbra boleq atej. Une aqa kumbra di tulaŋ ugedamu.

Rom 7:7

E maronum, nami dal anjam a na gago miligiq dia areqalo uge uge tigelteqnaqa iga une yoqnem. Deqa iga kiersi marqom? Dal anjam a une tamo bulej e? Sai. Dal anjam a une tamo bulosai. Dal anjam a na ijo une e osorbeqnu. Osorbosai qamu e une poibosai qamu. Agi dal anjam a marej, “Ni ino was aqa iŋgi iŋgi qa mamaulmaiq.” Degsi marosai qamu mamaul kumbra di kumbra uge e degsi poibosai qamu.

Rom 9:14

Qotei a kumbra degyej deqa iga kiersi marqom? Qotei a kumbra uge yej degsi marqom e? O was qu, iga degsi marqasai.

1 Korin 6:15

Nuŋgo segi segi jejamu di Kristus aqa jejamu qujai. Di niŋgi qaliesai kio? Deqa e Kristus aqa jejamu di osiy sambala uŋa aqa jejamuq di betertqai di kumbra bolesai.

2 Korin 1:18

Qotei a na aqa segi anjam kalil dauryeqnu deqa e dego anjam bole segi niŋgi merŋgeqnum. Deqa e laŋa odoqnsim olo saidosaieqnum.

Galesia 2:17

Ariya iga Kristus qa gago areqalo siŋgilateqnum gam dena iga Qotei aqa ŋamgalaq di tamo bole une saiqoji unum. Deqa tamo qudei naŋgi iga endegsib mergwab, “Niŋgi sawa bei bei qaji tamo naŋgi bulosib deqa niŋgi une ti unub.” Naŋgi iga degsib mergibqa iga kamba endegsi minjrqasai, “Od, Kristus na iga uneq breigej unum.” Iga degsi minjrqasai.

Galesia 2:21

Qotei a iga qa are tulaŋ boleiyej aqa kumbra di e ugeugeiyqasai. Iga Moses aqa dal anjam dauryqom gam dena iga Qotei aqa ŋamgalaq di tamo bole une saiqoji so qamu Kristus a laŋa moiej qamu.

Galesia 6:14

Ariya e ijo segi ñam soqtqa keresai. E tamo bei aqa ñam dego soqtqa keresai. E Yesus Kristus aqa ñam segi soqtqai. A ŋamburbasq di moiej e deqa segi areboleboleibeqnu. Kristus a ŋamburbasq di moiej aqa wau dena mandam qa kumbra kalil ijo areqaloq di unu qaji di moiobuleb. E segi dego ŋamburbasq di moiobulem deqa e olo mandam qa kumbra dauryqa keresai.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

Taitus 1:2

E na naŋgi aqaryainjritqa naŋgi ŋambile qa tariŋoqnsib sqajqa deqa e waueqnum. Ŋambile di agi Qotei na naŋgi enjrimqa naŋgi ŋambile gaigai sqab. Tulaŋ nami Qotei a iŋgi iŋgi kalil atosaisosiqa a na ŋambile di iga egwajqa marej. A bole marej. A gisaŋosaieqnu.

Hibru 6:18

Deqa Qotei aqa kumbra aiyel unu. A na aqa anjam di Abraham minjej. Osiqa aqa anjam di siŋgilatej. Aqa kumbra aiyel di unu deqa a na aqa anjam di olo bulyqa keresai. A gisaŋqa keresai dego. Deqa iga tamo uŋgasari Qotei aqa areq gileqnum qaji iga aqa anjam deqa are qaloqnsim gago are siŋgilatoqnsim iŋgi bole bole Qotei a nami iga egwa marej qaji di oqajqa tariŋesqom.

1 Jon 5:10

Tamo bei a Qotei aqa Ŋiri qa aqa areqalo siŋgilatqas di aqa Ŋiri qa anjam dego aqa are miligiq di siŋgilatim sqas. Ariya tamo bei a Qotei aqa anjam aqa areqaloq di siŋgilatqasai di a na Qotei aqa ñam ugetosim Qotei a gisaŋ tamo qa minjobulqas. Di kiyaqa? A Qotei aqa Ŋiri qa anjam Qotei na iga mergeqnu qaji di aqa areqaloq di siŋgilatosai deqa.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

Uli Anjam 3:7

Yesus a na e degsi merbsiqa olo endegsi merbej, “Filadelfia qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsim neŋgreŋyosim aqaq qariŋye, ‘E Yesus. E Qotei aqa tamo bole tiŋtiŋ. E kumbra bole qa utru. Devit a nami mandor koba soqnej dego kere e kamba aqa wau osim Qotei aqa tamo uŋgasari naŋgi taqatnjreqnum. E siraŋ bei waqtqai di tamo bei na getentqa keresai. E getentqai di tamo bei na waqtqa keresai. E na anjam endi ni qa qariŋyonum.