Rom 2:8 - Yesus Aqa Anjam Bole

⁸ Ariya tamo qudei naŋgi naŋgo segi jejamu qa are qaloqnsib deqa naŋgi anjam bole gotraŋyoqnsib kumbra uge uge dauryeqnub. Deqa Qotei a tamo naŋgi deqaji qa minjiŋ oqimqa awai ugedamu enjrqas.

Rom 2:8 Iomraidhean Croise

Rom 1:18

Iga qalie, Qotei a laŋ goge di sosiqa aqa minjiŋ boleq ateqnu. A na tamo uŋgasari a qoreiyoqnsib kumbra uge uge yeqnub qaji naŋgi awai uge enjreqnu. Naŋgo kumbra uge dena naŋgi Qotei aqa anjam bole olo tenteqnub.

Rom 10:16

Ariya tamo uŋgasari kalil naŋgi anjam bole di qusib dauryosaieqnub. Agi naŋgi qa Aisaia a nami endegsi marej, “O Tamo Koba, tamo yai naŋgi gago anjam di qusib naŋgo areqaloq di siŋgilateqnub?”

Rom 15:18

E iŋgi bei qa merŋgwasai. Kristus a ijo baŋ na wau yeqnu qaji deqa segi niŋgi saiŋgwai. A na ijo medabu siŋgilatetboqnsiqa ijo baŋ na wau bole bole yeqnu. A na e siŋgila ebeqnaqa e maŋwa gargekoba yeqnum. Qotei aqa Mondor na dego e siŋgilatbeqnaqa e waueqnum. Kristus a kumbra kalil di yeqnu. Di kiyaqa? A na sawa bei bei qaji naŋgo are tigeltetnjrimqa naŋgi Qotei aqa anjam dauryqajqa deqa. Utru deqa e Jerusalem dena wau utru atsim Kristus aqa anjam bole mare mare laqnsim gilsim torei Ilirikum sawaq dia diŋtem.

Rom 6:17

Bole, nami niŋgi une aqa wau tamo soqneb. Ariya bini Qotei na niŋgi osiq aqa anjam aqa sorgomq di atej unub deqa niŋgi nuŋgo are miligiq na aqa anjam dauryeqnub. Qotei a kumbra degyej deqa iga a qa tulaŋ areboleboleigeqnu.

Rom 9:22

Qotei a segi dego kumbra di yeqnu. A na aqa minjiŋ boleq atimqa tamo kalil naŋgi aqa siŋgila kobaquja unsib qalieqajqa deqa a kumbra di yeqnu. Qotei a tamo qudei naŋgi qa minjiŋ oqetnjreqnu deqa naŋgi padalqa tariŋeqnub. Ariya Qotei na naŋgi urur padaltnjrosaieqnu. A naŋgi qa tariŋsokobaiyeqnu.

1 Korin 11:16

O was qu, tamo bei a ijo anjam deqa ŋiriŋosim gotraŋyqas di a endegsi poiyem. Iga kumbra bei dauryosaieqnum. Qotei aqa tamo uŋgasari qure qure kalilq di unub qaji naŋgi dego kumbra bei dauryosaieqnub.

2 Korin 12:20

Di kiyaqa? E niŋgi qa ulaeqnum. E niŋgi qa bosiy nuŋgo kumbra unsiy e niŋgi qa areboleboleibqas kio sai kio? Niŋgi dego ijo kumbra unsib niŋgi e qa areboleboleiŋgwas kio sai kio? E deqa ulaeqnum. E niŋgi qa bosiy nuŋgo kumbra endegsi unqai kio? Niŋgi anjam na qoteqnub. Niŋgi nuŋgo was naŋgi qa are ugeiŋgeqnu. Niŋgi minjiŋ oqeqnu. Niŋgi pupoeqnub. Niŋgi nuŋgo was qudei naŋgi misiliŋnjreqnub. Niŋgi yomueqnub. Niŋgi diqeqnub. Niŋgi Qotei aqa wau ugeugeiyeqnub. E degsi unqai kio?

Galesia 5:20

gisaŋ qotei qa louoqa, gumaniŋoqa, was bei jeutoqa, ŋiriŋoqa, was bei aqa iŋgi iŋgi qa maulyoqa, minjiŋ oqoqa, are ugeoqa, ino segi jejamu qa are qalsim anjam na qotoqa, was naŋgi potoaiyeltnjroqa,

Filipai 1:17

Ariya tamo qudei naŋgi naŋgo segi ñam soqtqajqa deqa are qaloqnsib Kristus aqa anjam mare mare laqnub. Naŋgi tamo aqaryainjrqajqa deqa are qalosaieqnub. E tonto talq endi soqnit naŋgi ijo are olo ugetetbqajqa deqa are qaloqnsib anjam mare mare laqnub.

Filipai 2:3

Niŋgi nuŋgo segi jejamu qa are qalaib. Niŋgi nuŋgo segi ñam soqtqa are qalsib wauaib. Niŋgi nuŋgo segi ñam aguq atoqnsib endegsib are qaloqniye, “Ijo Kristen was qudei naŋgo kumbra tulaŋ boledamu. Naŋgo kumbra dena ijo kumbra buŋyejunu.”

2 Tesalonaika 1:8

Ariya Yesus a mandamq aisim tamo naŋgi Qotei qaliesai qaji naŋgi ti tamo naŋgi gago Tamo Koba Yesus aqa anjam bole dauryqa urateqnub qaji naŋgi ti ŋolawotnjrqas.

Taitus 3:9

Ariya tamo qudei naŋgi nanari anjam maroqnsib laŋa laŋa ŋiriŋoqnsib anjam na qotoqnsib laqnub. Naŋgo moma naŋgo ñam qa ti Moses aqa dal anjam qa ti laŋa laŋa maroqnsib anjam na qoteqnub. Naŋgi anjam di marqajqa tulaŋ arearetnjreqnu. Iga qalie, anjam dena iga aqaryaigwa keresai. Deqa Taitus, ni tamo deqaji naŋgo anjam di quetnjraim. Torei urat.

Hibru 10:27

Iga degyqom di iga Qotei qa ulaugetosim a gago une qa pegigwa bati qa tariŋoqnqom. Pegigwa bati deqa Qotei na aqa jeu tamo kalil naŋgi ojeleŋosim ŋamyuo kaŋkaŋ kobaq di breinjrqas. Ŋamyuo di agi Qotei na atej unu.

Hibru 11:8

Abraham a dego Qotei qa aqa areqalo siŋgilatej deqa Qotei na metonaqa a Qotei aqa anjam dauryosiqa mandam bei Qotei na a yqajqa minjej qaji deq gilej. A sawa qabitqas kio di a qalieosaisosiqa gilej.

Hibru 5:9

Qalieosiq deqa a Qotei aqa anjam torei dauryekritej. Deqa Qotei na a giltosiq minjej, “Ni atra tamo kobaquja unum. Agi Melkisedek a nami atra tamo kobaquja soqnej dego kere.” Qotei na Yesus degsi minjej deqa Yesus na tamo kalil Qotei aqa anjam dauryeqnub qaji naŋgi oqas. Naŋgi oqajqa utru agi Yesus qujai. Deqa naŋgi ŋambile gaigai sqab.

Jems 3:14

Ariya niŋgi tamo qudei naŋgi qa laŋa are ugeiŋgim nuŋgo segi ñam soqtqa are qaloqnqab di niŋgi areqalo bole ti powo ti sqa keresai. Niŋgi nuŋgo kumbra uge deqa areboleboleiŋgaiq. Niŋgi areboleboleiŋgwas di niŋgi gisaŋ kumbra dauryosib Qotei aqa anjam bole olo ugetqab.

Jems 3:16

Niŋgi quiye. Tamo qudei naŋgi tamo qudei naŋgi qa are ugeinjreqnaqa naŋgo segi ñam soqtqa are qaleqnub. Deqa naŋgi so ugeq di sosib kumbra uge uge yeqnub.

1 Pita 3:1

Dego kere niŋgi uŋgasari niŋgi dego nuŋgo tamo naŋgo sorgomq di soqniye. Ariya niŋgi qudei nuŋgo tamo naŋgi Qotei aqa anjam dauryosaiabqa di uŋgum niŋgi anjam bei minjraib. Niŋgi naŋgo ŋamgalaq di kumbra bole bole yibqa naŋgi unsibqa dena naŋgi are bulyqab.

1 Pita 4:17

Iga Qotei aqa segi aŋgro tiŋtiŋ unum. Ariya iga pegigwajqa bati agi jojomqo. Qotei a namoqna iga pegigwas. Deqa iga qalieonum, tamo naŋgi Qotei aqa anjam bole gotraŋyeqnub qaji naŋgo une qa Qotei na awai tulaŋ ugedamu enjrqas.

Uli Anjam 14:10

Wain di Qotei aqa minjiŋ siŋgila koba. Qotei a nami wain di ya ti bulyosai. Deqa tamo bei aqa lanjaqsi baŋqsi wagme juwaŋ aqa toqor oqas di aqa une deqa Qotei na a pegiyosimqa aqa segi minjiŋ gambaŋq di qamsim anaiyim uyqas. Uysimqa Qotei aqa laŋ aŋgro naŋgi Kaja Du ombla na naŋgo ŋamgalaq dia ŋamyuo na ti meniŋ yuo na ti jaqatiŋ koba oqnsim sqas.

Uli Anjam 16:19

Ariya mimiŋ di brantosiqa Babilon qure koba tulaŋ niñaqyosiqa potoqalubtej. Qure qure kalil dego mimiŋ dena padaleleŋeb. Babilon aqa kumbra tulaŋ ugedamu. Aqa kumbra deqa Qotei a are qalsiqa wain siŋgila koba gambaŋq di qamsiq Babilon anaiyonaq uysiq nanariej. Wain di Qotei aqa minjiŋ koba.