Rom 12:5 - Yesus Aqa Anjam Bole

⁵ Dego kere iga tamo uŋgasari gargekoba unum. Ariya iga kalil Kristus aqa jejamu qujai. Deqa iga segi segi kalil koba na korooqnsim jejamu qujaiq di turtejunum.

Rom 12:5 Iomraidhean Croise

Jon 17:11

“E inoq olo bqai. Deqa e mandamq endia olo sqasai. Ariya ijo segi tamo uŋgasari naŋgi mandamq endi sqab. O Abu, ino kumbra kalil boledamu. Ni segi qujai une saiqoji. Ino segi ñam koba ni na ebem qaji ñam dena ni na ijo segi tamo uŋgasari naŋgi geregere taqatnjroqnime. Amqa aqo aiyel are qujaitejunum dego kere naŋgi kamba dego are qujaitosib sqab.

Rom 12:4

Niŋgi qalie, iga kalil jejamu qujai. Ariya gago jejamu miligiq dia sarqei gargekoba unub. Naŋgi kalil wau qujai yosaieqnub. Naŋgi wau segi segi yeqnub.

1 Korin 10:17

Bem qujai unu agi Kristus aqa jejamu. Deqa iga kalil koba na korooqnsim bem qujai di uyeqnum. Deqa iga kalil Kristus aqa jejamu qujai.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 12:20

Ariya gago jejamu a degsi sosai. Gago jejamu miligiq dia sarqei gargekoba unub. Agi gago baŋ ti siŋga ti ŋamdamu ti dabkala ti kalil jejamu qujaiq di turtsib unub.

1 Korin 6:15

Nuŋgo segi segi jejamu di Kristus aqa jejamu qujai. Di niŋgi qaliesai kio? Deqa e Kristus aqa jejamu di osiy sambala uŋa aqa jejamuq di betertqai di kumbra bolesai.

Efesus 1:23

Qotei aqa segi tamo uŋgasari naŋgi Kristus aqa jejamu qujai. Kristus a na iŋgi iŋgi kalil ekritosiq tulaŋ keretejunu. Deqa a na Qotei aqa segi tamo uŋgasari naŋgi dego osiq tulaŋ keretnjrejunu.

Efesus 4:12

Iga Qotei aqa segi tamo uŋgasari unum deqa Kristus a na iga aqaryaigimqa iga aqa wau geregere ojqajqa deqa are qalsiq wau segi segi egeqnu. Kristus aqa segi tamo uŋgasari naŋgi aqa jejamu qujai unub deqa iga naŋgi qa wauetnjroqnqom. Yimqa gago wau dena naŋgi siŋgila oqnsib so bole sqab.

Efesus 4:25

Deqa niŋgi gisaŋ kumbra kalil uratekritosib anjam bole segi Kristen tamo uŋgasari naŋgi minjroqniye. Niŋgi kalil Kristus aqa jejamu qujai deqa niŋgi kumbra degyoqniye.

Efesus 5:23

Di kiyaqa? Kristus a Kristen tamo uŋgasari naŋgo gate koba unu dego kere nuŋgo tamo naŋgi dego nuŋgo gate unub. Iga kalil Kristus aqa jejamu qujai. A na iga eleŋej.

Efesus 5:30

Iga kalil Kristus aqa jejamu qujai. Iga segi segi aqa siŋga ti aqa baŋ ti unum.

Kolosi 1:24

E niŋgi aqaryaiŋgwa osim deqa e jaqatiŋ koba eqnum. E ijo jaqatiŋ deqa tulaŋ areboleboleibeqnu. E na Kristus aqa segi tamo uŋgasari naŋgi aqaryainjreqnum. Naŋgi aqa segi jejamu bul. A naŋgo gate. A na naŋgi aqaryainjrqa marsiq jaqatiŋ koba ej. Aqa jaqatiŋ di koboosaiunu. Deqa e dego tamo uŋgasari naŋgi qa osimqa ijo segi jejamuq di jaqatiŋ koba eqnum. Ijo kumbra dena e na Kristus aqa jaqatiŋ dauryosim kereteqnum.

Kolosi 2:19

Tamo deqaji naŋgi Kristus beteryosaieqnub. Ariya Kristus a gago gate. Iga aqa jejamu qujai. Iga aqa siŋga ti baŋ ti bul. A na iga siŋgilatgeqnu deqa iga kalil jejamu qujaiq di turtejunum. Qotei aqa siŋgila na iga boleoqnsim siŋgilaeqnum.