Rom 12:3 - Yesus Aqa Anjam Bole

³ Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

Rom 12:3 Iomraidhean Croise

Luk 18:11

Naŋgi atra tal miligiq gilsibqa Farisi tamo a namo tigelosiqa aqa segi jejamu soqtosiqa endegsi pailyej, ‘O Qotei, e tamo qudei naŋgi unub dego sai. E gisaŋ na tamo uŋgasari naŋgi silali yainjrosaieqnum. E sambala kumbra yosaieqnum. E kumbra uge bei dego yosaieqnum. E takis o qaji tamo di bul sai.

Jon 3:34

Tamo Qotei na qariŋyej qaji a Qotei aqa anjam babtosiq mergeqnu. Di kiyaqa? Qotei na aqa Mondor aqa siŋgila potosiq taqal bei segi Yesus yosai. A na aqa siŋgila kalil Yesus yekritej.

Rom 1:5

Yesus Kristus aqa wau na Qotei a iga qa are tulaŋ boleiyosiqa aqa ñam na iga aqa anjam maro tamo sqajqa deqa wau egej. Tamo uŋgasari sawa sawa kalilq di unub qaji naŋgi Yesus qa naŋgo areqalo siŋgilatosib aqa anjam dauryqajqa deqa are qalsiq wau egej.

Rom 11:20

Di bole. Ariya Qotei aqa kumbra di aqa utru agiende. Israel naŋgi Qotei qa naŋgo areqalo siŋgilatosai deqa Qotei na naŋgi giŋgeŋnjrsiqa breinjrej. Ariya niŋgi Qotei qa nuŋgo areqalo siŋgilatejunub deqa Qotei na niŋgi olo eleŋej. Di nuŋgo wau na sai. Deqa niŋgi nuŋgo segi ñam soqtosib diqaib. Niŋgi ulaoiye.

Rom 11:25

O was qu, niŋgi segi powo koba ti unub niŋgi degsib are qalaib. Niŋgi degaib deqa e na uli anjam bei niŋgi endegsi merŋgwai. Israel tamo uŋgasari qudei naŋgo areqalo geteŋnjrejunu. Naŋgi degsib soqnib sawa bei bei qaji tamo uŋgasari Qotei na nami giltnjrej naŋgi di kalil eleŋekritosim kereamqa bati deqa a na Israel tamo uŋgasari kalil naŋgo areqalo dego waqtetnjrimqa naŋgi olo are bulyqab.

Rom 12:16

Niŋgi segi segi kalil areqalo qujaitosib soqniye. Niŋgi nuŋgo segi ñam soqtqa are qalaib. Niŋgi tamo laŋaj naŋgi koba na laqajqa areboleboleiŋgem. Niŋgi nuŋgo segi ñam soqtosib endegsib maraib, “Iga segi qalie koba ti unum.” Niŋgi degaib.

1 Korin 15:10

Ariya Qotei a e qa are boleiyej deqa bini e aqa anjam maro tamo unum. A e qa are boleiyej aqa kumbra di laŋa uloŋosai. E aqa kumbra di osim siŋgila na waukobaoqnsim Qotei aqa anjam maro tamo kalil naŋgi tulaŋ buŋnjreqnum. Ariya e ijo segi siŋgila na wau di yosaieqnum. Qotei a e qa are boleiyej deqa a na e siŋgila ebeqnaqa e wau di yeqnum.

1 Korin 3:10

Qotei a e qa are boleiyosiq wau ebej deqa e tal gereiyo qaji tamo bulosim e tal gereiyqajqa qalie bole. Deqa e tal aqa utru atem. Ariya bini tamo qudei naŋgi kamba olo tal aqa ai gogeq di tal ateqnub. Ariya e na tamo kalil naŋgi endegsi minjreqnum, “Niŋgi tal ateqnub deqa niŋgi geregere atoqniye.”

1 Korin 7:17

Gam Qotei na iga segi segi dauryqa marsiq giltgej qaji di iga dauryosim sqom. Iga nami gam kie dauryosim sonamqa Qotei na iga metgej degsim olo dauryosim sqom. Anjam di agi e na Kristen tamo uŋgasari sawa sawa kalilq dia koroosib loueqnub qaji naŋgi minjre minjre laqnum.

2 Korin 10:13

Ariya iga tamo bei aqa wau qa gago segi ñam soqtqasai. Wau Qotei na egej qaji di iga olo buŋyosim tamo bei aqa wau qa gago segi ñam soqtqasai. Wau Qotei na egej qaji deqa segi gago ñam soqtqom. Wau Qotei na egej qaji agiende. Iga niŋgi Korin Kristen niŋgi qa waueqnum.

2 Korin 12:13

Kumbra e qure qureq dia Kristen tamo uŋgasari naŋgo ambleq di yeqnum qaji di e nuŋgo ambleq di dego yoqnem. Ariya kumbra qujai e nuŋgo ambleq di yosai qaji agiende. E niŋgi gulube eŋgwa uratosim deqa e niŋgi silali iŋgi iŋgi qa merŋgosaioqnem. Di e une yoqnem e? Sai. Ariya e une yoqnem bole edegosib ijo une di olo kobotetbiye.

2 Korin 12:7

Qotei na kumbra tulaŋ boledamu e osorbej. Ariya e kumbra di unsiy deqa ijo segi ñam soqtosiy diqosiy laaim deqa Qotei na gulube tulaŋ uge sil luwit bul qariŋyonaq ijo jejamuq bej. Gulube di Satan na ojsiqa dena e ugeugeibeqnu.

Galesia 6:3

Nuŋgo ambleq di tamo bei a marqas, “E ñam koba ti unum.” Ariya a ñam ti sosai. A ñam saiqoji deqa a na aqa segi jejamu gisaŋyqo.

Efesus 3:2

E are qalonum, niŋgi endegsib queb, Qotei a niŋgi qa are tulaŋ boleiyeqnu anjam di e na merŋgwajqa deqa osiq a e qa dego are boleiyosiq wau ebej.

Efesus 3:4

Ariya niŋgi anjam endi sisiyosib endegsib qalieqab, Kristus aqa anjam nami ulitesoqnej qaji di aqa utru e geregere poibeqnu.

Efesus 4:16

Iga kalil Kristus aqa jejamu qujai deqa iga qudei aqa baŋ bul. Iga qudei aqa siŋga bul. Iga qudei aqa ŋamdamu bul. Deqa a na aqa segi baŋ ti siŋga ti ŋamdamu ti jejamu ti kalil turtoqnsiqa qujaitejunu. Deqa iga kalil Kristus beteryoqnsim aqa wau geregere ojoqnsim aqa qalaqalaiyo kumbra dauryoqnqom. Kumbra dena iga boleoqnsim siŋgilaoqnqom.

Filipai 2:13

Iga qalie, Qotei a nuŋgo are miligiq di waueqnu. A segi na nuŋgo are tigeltetŋgeqnaqa niŋgi kumbra a tulaŋ areareteqnu qaji di yeqnub. A na niŋgi siŋgilatŋgeqnu deqa niŋgi kumbra di yeqnub.

Kolosi 1:29

Deqa Kristus aqa siŋgila kobaquja Qotei na e ebej qaji dena e wau koba yoqnsim unum.

Kolosi 2:13

Nami niŋgi une ti sosib deqa niŋgi kumbra uge uge yoqneb. Niŋgi nuŋgo areqalo namij aqa kumbra dauryoqneb dena nuŋgo qunuŋ moreŋesoqneb. Ariya Qotei na niŋgi olo Kristus koba na ŋambile eŋgsiqa nuŋgo une kalil kobotetŋgej.

1 Timoti 1:14

Osiqa a e qa are tulaŋ boleiyosiq ijo are tigeltetbej deqa bini e gago Tamo Koba Kristus Yesus qa ijo areqalo siŋgilatoqnsimqa tamo uŋgasari naŋgi qalaqalainjreqnum.

1 Timoti 2:15

Ariya ni na uŋgasari naŋgi minjrimqa naŋgi aŋgrotoqnsib aŋgro qa wauoqnebe. Naŋgi wau di yoqnsib gaigai Kristus qa naŋgo areqalo siŋgilatoqnsib naŋgo segi ŋambile a yekritosib aqa kumbra boleq di sosib qalaqalaiyo kumbra dauryosib kumbra bole bole yoqnebe. Yim deqa Qotei a na naŋgi oqas.

1 Timoti 2:9

E na anjam bei dego ni mermqai. Ni na uŋgasari naŋgi minjrimqa naŋgi areqalo bole na gara jigoqnebe. Naŋgi diqoqnsib naŋgo gate baŋga walatoqnaib. Osib kolilei na ti wala bole na ti naŋgo jejamu maqtosib gara wala ti jigoqnaib.

Taitus 2:12

Qotei a iga qa are tulaŋ boleiyeqnu aqa kumbra dena iga endegsi osorgeqnu. Iga Qotei qoreiyqajqa kumbra torei uratqom. Osim mandam endeqaji areqalo uge uge dego uratosim areqalo bole ti sosim kumbra bole segi dauryoqnqom. Bole, iga mandam tamo uŋgasari naŋgo ambleq endi unum. Ariya Qotei a iga qa are boleiyeqnu aqa kumbra dena iga endegsi osorgeqnu. Iga Qotei aqa kumbra segi dauryoqnqom.

Taitus 2:2

Osim tamo qeli naŋgi anjam endegsim minjroqne, “Niŋgi ya uysib nanarioqnaib. Nuŋgo kumbra geregere taqatoqnsib kumbra bole yqajqa are qaloqnsib areqalo bole dauryoqniye. Osib Qotei aqa anjam bole geregere qalieosib tamo uŋgasari naŋgi qalaqalainjroqniye. Osib gulube kalil qoboiyosib siŋgila na tigelesoqniye.” O Taitus, ni na tamo qeli naŋgi anjam degsim minjroqne.

Taitus 2:4

Osib uŋa meli naŋgi minjribqa naŋgi naŋgo tamo ti naŋgo aŋgro ti qala-qalainjroqnqab.

Taitus 2:6

Ariya ni na aŋgro meli naŋgi dego are tigeltetnjroqnimqa naŋgi naŋgo kumbra geregere taqatoqnebe.

Jems 4:6

Ariya Qotei a iga qa are tulaŋ boleiyeqnu. Deqa aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

1 Pita 1:13

Deqa niŋgi gaigai ijo anjam di dauryqajqa are qaloqnsib nuŋgo walwel geregere taqatosib soqniye. Sosib Yesus Kristus qa nuŋgo areqalo siŋgilatoqnsibqa mondoŋ a olo laŋ qureq dena brantosim kumbra tulaŋ boledamu niŋgi eŋgwajqa deqa tariŋoqnsib soqniye.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.

1 Pita 4:7

Iŋgi iŋgi kalil koboqajqa bati agi jojomqo. Deqa niŋgi areqalo bole ti sosib nuŋgo kumbra kalil geregere taqatoqniye. Niŋgi degyqab di niŋgi Qotei pailyqa oqnsib geregere pailyoqnqab.

1 Pita 5:5

O aŋgro wala, niŋgi Kristen gate naŋgo sorgomq di soqniye. Sosib niŋgi kalil nuŋgo segi ñam aguq atoqnsib Qotei aqa tamo uŋgasari naŋgo sorgomq di soqniye. Agi Qotei aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

1 Pita 5:8

Niŋgi nuŋgo segi walwel geregere taqatosib ŋam atsib soqniye. Bauŋ juwaŋ naŋgi tulaŋ leleŋoqnsib tamo ñumoqnsib uyeqnub dego kere nuŋgo jeu tamo Satan a na gaigai tamo uŋgasari naŋgi padaltnjrqajqa ŋamosiq laqnu.

3 Jon 1:9

Nami e anjam qudei neŋgreŋyosim Kristen tamo uŋgasari nuŋgo qureq di unub qaji naŋgi qa qariŋyem. Ariya Diotrefes a tulaŋ diqoqnsiqa a na tamo kalil naŋgi buŋnjrsim aqa segi ñam soqtqajqa siŋgilaeqnu. Deqa a gago anjam di quetgosaieqnu.