Rom 11:7 - Yesus Aqa Anjam Bole

⁷ Deqa iga kiersi marqom? Iga endegsi marqom. Israel naŋgi tamo bole une saiqoji sqajqa waukobaeqnab ugeinjroqnej. Ariya naŋgi qudei Qotei na aqa segi qa marsiq giltnjrej deqa naŋgi aqa ŋamgalaq di tamo bole une saiqoji unub. Ariya naŋgi qudei naŋgo areqalo geteŋnjrejunu.

Rom 11:7 Iomraidhean Croise

Luk 13:24

“Niŋgi siraŋme kiñalaq dena miligiq gilqajqa wauoiye. Niŋgi quiye. Tamo gargekoba naŋgi miligiq gilqajqa wauoqnib ugeinjroqnqas.

Jon 12:40

“Qotei a naŋgo ŋamdamu getentetnjrej. A naŋgo are miligi dego getentetnjrej. Deqa naŋgi naŋgo ŋamdamu na Qotei aqa kumbra bei unqa keresai. Naŋgi naŋgo are miligiq na Qotei aqa anjam dego poinjrqa keresai. Deqa naŋgi are bulyosib e qa bqa keresai. Deqa e na naŋgi olo boletnjrqasai.”

Rom 10:3

Qotei a iga tamo bole une saiqoji qa mergeqnu aqa kumbra di naŋgi qaliesai. Deqa naŋgi naŋgo segi siŋgila na tamo bole une saiqoji sqajqa are qaleqnub. Deqa naŋgi Qotei aqa sorgomq di sosib a segi na naŋgi aqaryainjrimqa naŋgi tamo bole une saiqoji sqajqa olo urateqnub.

Rom 11:25

O was qu, niŋgi segi powo koba ti unub niŋgi degsib are qalaib. Niŋgi degaib deqa e na uli anjam bei niŋgi endegsi merŋgwai. Israel tamo uŋgasari qudei naŋgo areqalo geteŋnjrejunu. Naŋgi degsib soqnib sawa bei bei qaji tamo uŋgasari Qotei na nami giltnjrej naŋgi di kalil eleŋekritosim kereamqa bati deqa a na Israel tamo uŋgasari kalil naŋgo areqalo dego waqtetnjrimqa naŋgi olo are bulyqab.

Rom 11:5

Dego kere bini Qotei a tamo quja quja segi eleŋej unub. A naŋgi qa are boleiyonaq kumbra dena a na naŋgi giltnjrej.

Rom 3:9

Deqa iga kiersi marqom? Iga Juda tamo deqa iga na tamo qudei naŋgi buŋnjreqnum degsi marqom e? Iga degsi marqasai. Agi e niŋgi merŋgonum, iga Juda tamo ti Grik tamo naŋgi ti iga kalil une ti unum. Une na iga kalil kabutgejunu.

Rom 6:15

Iga olo dal anjam aqa sorgomq di sosai deqa iga kierqom? Qotei a iga qa are tulaŋ boleiyej kumbra di aqa sorgomq di iga unum. Deqa uŋgum, iga une yoqnqom e? Sai.

Rom 9:18

Deqa was qu, iga endegsi qalieonum. Qotei a tamo bei qa are boleiyqa are soqnim a tamo deqa are boleiyqas. Ariya a tamo bei aqa areqalo getentqa are soqnim di a getentqas.

Rom 9:23

Di kiyaqa? Aqa areqalo agiende. Tamo uŋgasari kalil naŋgi aqa riaŋ ti aqa siŋgila ti unsib qalieqajqa deqa. Ariya Qotei a tamo qudei naŋgi qa are tulaŋ boleiyeqnu. Deqa a na naŋgi so bole ti ñam koba ti enjrqajqa atej unu. Di dego tamo uŋgasari kalil naŋgi unsib qalieqajqa deqa Qotei a naŋgi qa tariŋsokobaiyeqnu.

1 Korin 10:19

Sulum atrainjro qaji iŋgi iŋgi di atraiyqa iŋgi bole e degaib. E degsi marosai. Sulum naŋgi di qotei bole e degaib. E degsi marosai.

2 Korin 3:14

Israel naŋgo areqalo geteŋnjresoqnej deqa naŋgi dal anjam namij sisiyoqneb di naŋgi anjam aqa utru poinjrosaioqnej. Naŋgi nami degsib soqneb agi bini unub. Naŋgo areqalo gara mutu na kabutobulejunu. Tamo bei na gara di taqal atqa keresai. Kristus aqa wau na segi Qotei na gara di olo taqal ateqnu.

2 Korin 4:4

Mandam endeqa qotei gisaŋ Satan a na tamo uŋgasari Kristus qa naŋgo areqalo siŋgilatosaieqnub qaji naŋgo areqalo getentejunu deqa Kristus aqa anjam bole naŋgo are miligiq aiqa keresai. Deqa naŋgi Kristus aqa suwaŋ unosaieqnub. Kristus a segi Qotei. A segi ñam koba ti unu.

Efesus 1:4

Tulaŋ nami Qotei a mandam atosaisosiqa a na iga Kristus beteryqajqa marsiq giltgej. Yim iga aqa segi kumbra boleq di sosim aqa ŋamgalaq di une saiqoji sqajqa deqa.

Efesus 4:18

Naŋgo qalie ti powo ti tulaŋ ambruejunu. Naŋgi tulaŋ nanarioqnsib laqnub. Naŋgo are miligi geteŋejunu. Deqa Qotei aqa ŋambile naŋgoq di sosai.

Filipai 1:18

Ariya tamo naŋgi areqalo bole na Kristus aqa anjam mare mare laqnub kio naŋgi areqalo uge na mare mare laqnub kio di uŋgum. Naŋgi kalil Kristus aqa anjam mare mare laqnub deqa e tulaŋ areboleboleibeqnu.

Hibru 12:17

Niŋgi qalie, Iso a bunuqna aqa abu aqa iŋgi iŋgi di olo oqajqa marnaqa Qotei na a saidyej. Deqa a akamugetej. Ariya aqa kumbra yej qaji di a olo uratosim are bulyqajqa gam saiiyej.

1 Pita 1:2

Tulaŋ nami Qotei Abu a niŋgi qa qalieosiq deqa niŋgi aqa segi tamo uŋgasari sqa marsiqa niŋgi giltŋgej. Qotei aqa Mondor Bole a na niŋgi Qotei aqa segi kumbra boleq di atimqa niŋgi nuŋgo jejamu Qotei yekritosib Yesus Kristus aqa anjam geregere dauryosib sqajqa deqa osiqa niŋgi aqaryaiŋgej. Yim Yesus aqa leŋ na niŋgi yansŋgimqa niŋgi Qotei aqa ŋamgalaq di une saiqoji sqajqa deqa. Qotei a niŋgi qa are tulaŋ boleiyimqa niŋgi geregere lawo na soqniye.