Rom 1:8 - Yesus Aqa Anjam Bole

⁸ Mati e niŋgi anjam endegsi merŋgwai. Niŋgi Yesus Kristus qa nuŋgo areqalo siŋgilatejunub deqa tamo uŋgasari naŋgi niŋgi qa saosib laqnabqa sawa sawa kalilq dia tamo naŋgi queqnub. E deqa are qaloqnsim deqa Yesus Kristus aqa ñam na ijo Qotei biŋiyeqnum.

Rom 1:8 Iomraidhean Croise

Matyu 24:14

Yim naŋgi sawa sawa kalil keretoqnsib Qotei a tamo uŋgasari naŋgo Mandor Koba sosiq naŋgi taqatnjreqnu anjam bole di mare mare laqnib tamo uŋgasari kalil naŋgi quoqnqab. Ariya bunuqna diŋo bati brantqas.”

Luk 2:1

Bati deqa Rom naŋgo mandor koba Sisar Ogastus a marej, “Iga na tamo uŋgasari sawa sawa kalilq di unub qaji naŋgo ñam sisiyqom.”

Aposel 11:28

Bei aqa ñam Agabus. Naŋgi Antiok qureq bonabqa Qotei aqa Mondor na Agabus aqa medabu siŋgilatetonaqa a tigelosiqa marej, “Bunuqna sawa sawa kalilq dia naŋgi mam koba oqab.” Onaqa bunuqna Rom naŋgo mandor koba Klodius aqa bati brantonaqa mam koba di aiej.

Aposel 28:22

Deqa ni segi na ino anjam mergim iga quqwom. Iga qalieonum, sawa sawa kalilq dia tamo uŋgasari naŋgi Yesus aqa anjam bunuj di misiliŋyeqnub.” Juda tamo kokba naŋgi na Pol degsib minjeb.

Rom 10:18

Ariya e niŋgi endegsi nenemŋgwai. Israel naŋgi Kristus aqa anjam bole di nami quosai kio? Sai. Naŋgi quoqneb. Agi Qotei aqa anjam endegsi unu, “Qotei aqa anjam di gilsiq sawa sawa kalil keretonaqa tamo uŋgasari kalil naŋgi quoqneb.”

Rom 16:19

O was qu, e qalie, niŋgi Qotei aqa anjam geregere dauryosib laqnub. Laqnab tamo kalil naŋgi nuŋgo kumbra deqa queqnub. Deqa e niŋgi qa tulaŋ areboleboleibeqnu. Ariya e niŋgi endegsi merŋgwai. Niŋgi kumbra bole yqajqa geregere qalieosib kumbra uge yqajqa aŋgro kiñilala bul nanariosib soqniye.

Rom 6:17

Bole, nami niŋgi une aqa wau tamo soqneb. Ariya bini Qotei na niŋgi osiq aqa anjam aqa sorgomq di atej unub deqa niŋgi nuŋgo are miligiq na aqa anjam dauryeqnub. Qotei a kumbra degyej deqa iga a qa tulaŋ areboleboleigeqnu.

1 Korin 1:4

Qotei a Kristus Yesus aqa baŋ na niŋgi qa are tulaŋ boleiyosiq gereinjrej. Deqa e bati gaigai niŋgi qa are qaloqnsim ijo Qotei biŋiyeqnum.

2 Korin 2:14

Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul.

Efesus 1:15

E endegsi quem. Niŋgi Tamo Koba Yesus qa nuŋgo areqalo siŋgilatoqnsibqa Qotei aqa tamo uŋgasari kalil naŋgi qalaqalainjreqnub.

Efesus 1:16

Deqa e Qotei pailyoqnsimqa e gaigai niŋgi qa are qaloqnsim Qotei biŋiyeqnum.

Efesus 3:21

Deqa Qotei aqa segi tamo uŋgasari kalil naŋgi Kristus Yesus aqa ñam na Qotei aqa ñam bati gaigai soqtoqnsib gilsi gilsib diŋo bati itqab. Bole.

Efesus 5:20

Kumbra bole kio uge kio nuŋgoq di brantoqnimqa, uŋgum, niŋgi bati gaigai gago Tamo Koba Yesus Kristus aqa ñam na Qotei biŋiyoqniye.

Filipai 1:11

O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Filipai 1:3

E bati gaigai niŋgi qa are qaloqnsim deqa e ijo Qotei biŋiyeqnum.

Kolosi 1:3

Bati aqo Timoti wo pailyoqnsimqa iga niŋgi qa are qaloqnsim deqa iga gaigai gago Tamo Koba Yesus Kristus aqa Abu Qotei biŋiyeqnum.

1 Tesalonaika 1:2

Iga gaigai niŋgi qa are qaloqnsim deqa Qotei biŋiyeqnum. Osim nuŋgo ñam gaigai maroqnsim pailyeqnum.

1 Tesalonaika 2:13

Iga Qotei aqa anjam niŋgi merŋgeqnam niŋgi quoqnsib endegsib marosaioqneb, “Anjam di mandam tamo naŋgo anjam.” Niŋgi degsib marosaioqneb. Niŋgi quoqnsib maroqneb, “Bole, anjam di Qotei aqa anjam tiŋtiŋ.” Niŋgi degsib maroqneb deqa Qotei aqa anjam di nuŋgo are miligiq di siŋgila na waueqnu. Di kiyaqa? Niŋgi Kristus qa nuŋgo areqalo siŋgilateqnub deqa. Deqa iga gaigai niŋgi qa are qaloqnsim Qotei biŋiyeqnum.

2 Tesalonaika 1:3

O was qu, iga gaigai niŋgi qa are qaloqnsim deqa Qotei biŋiyeqnum. Iga kere degyeqnum. Di kiyaqa? Nuŋgo areqalo Yesus qa siŋgilateqnub qaji di tulaŋ kobaqujaeqnu. Niŋgi segi segi na nuŋgo Kristen was qu naŋgi qalaqalainjreqnub. Nuŋgo kumbra di dego tulaŋ kobaqujaeqnu.

2 Timoti 1:3

Ijo moma utru naŋgi nami kumbra tiŋtiŋ na Qotei aqa wau ojoqneb dego kere e bini kumbra qujai dena Qotei aqa wau ojeqnum. Ijo are miligiq di e qalieonum, e Qotei aqa ŋamgalaq di une bei saiqoji. E qolo ti qanam ti Qotei pailyoqnsim ni qa are qaloqnsim Qotei biŋiyeqnum.

Filemon 1:4

Bati e ijo Qotei pailyoqnsimqa e ni qa are qaloqnsim deqa e Qotei biŋiyeqnum.

Hibru 13:15

Deqa iga bati gaigai Yesus aqa ñam na Qotei aqa ñam soqtoqnqom. Iga kumbra degyoqnqom di iga Qotei atraiyobuloqnqom. Od, bati gaigai iga gago medabu na Qotei aqa ñam soqtoqnqom.

1 Pita 2:5

Niŋgi dego tal aqa ai bul ŋambile unub. Qotei na niŋgi aqa segi tal sqa marsiq deqa aqa Mondor aqa siŋgila na niŋgi gereiŋgeqnu. Yim niŋgi aqa segi atra tamo boledamu sosib Yesus Kristus aqa ñam na nuŋgo segi jejamu Qotei atraiyoqnib a niŋgi qa tulaŋ arearetoqnqajqa deqa.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.