Rom 1:3 - Yesus Aqa Anjam Bole

³ Qotei aqa anjam bole di aqa segi Ŋiri aqa anjam. Aqa Ŋiri a tamo bulyosiqa Devit aqa leŋ dena ŋambabej.

Rom 1:3 Iomraidhean Croise

Matyu 1:1

Endi Yesus Kristus aqa moma naŋgo ñam kalil. Yesus Kristus a Devit aqa leŋ. Devit a Abraham aqa leŋ.

Matyu 1:16

Jekop a Josep aqa abu. Josep a Maria aqa gumbuluŋ. Maria aqa miligiq na Yesus ŋambabej. Agi naŋgi a qa mareqnub, a Kristus.

Matyu 1:6

Jesi a Mandor Koba Devit aqa abu. Ariya Devit a Solomon aqa abu. Solomon aqa ai agi nami Uria aqa ŋauqali soqnej.

Matyu 12:23

Deqa tamo uŋgasari kalil naŋgi Yesus aqa siŋgila di unsibqa naŋgi tulaŋ prugeleŋosib maroqneb, “Tamo di Devit aqa Ŋiri kio?”

Matyu 15:22

Gilsiq di sonaqa Kenan qaji uŋa bei a sawa dia soqnej. Sosiqa a Yesus aqa areq bosiqa siŋgila na pailyosiq minjej, “O Tamo Koba, Devit aqa Ŋiri, ni e qa are ugeimeme. Mondor uge na ijo aŋgro sebiŋ a tulaŋ ugeugeiyoqnsiq jaqatiŋ koba yeqnu.”

Matyu 26:63

Onaqa Yesus a torei mequmej. A anjam bei yala marosai. Deqa atra tamo gate na olo nenemyej, “Qotei ŋambile gaigai unu qaji aqa ñam na e ni nenemmqai, ni Kristus e? Ni Qotei aqa Ŋiri e? Ni e merbe.”

Matyu 27:43

A segi mareqnu, ‘E Qotei qa ijo areqalo siŋgilatejunum. E segi Qotei aqa Ŋiri.’ Aqa anjam di boleamqa Qotei na a aqaryaiyim ŋamburbas uratosim mandamq aiem.”

Matyu 3:17

Unnaqa laŋ goge dena Qotei a anjam marnaqa tamo uŋgasari naŋgi aqa kakoro queb. A endegsi marnaq queb, “Di ijo aŋgro qujai. E na a tulaŋ qalaqalaiyeqnum. E a qa tulaŋ areboleboleibqo.”

Matyu 9:27

Onaqa Yesus a qure di uratosiq a olo walwelosiq gileqnaqa tamo aiyel ŋamdamu geteŋnjro qaji naŋgi gam na Yesus dauryosib giloqneb. Naŋgi giloqnsib leleŋoqnsib Yesus minjoqneb, “O Devit aqa Ŋiri, ni iga qa are ugeimeme.”

Luk 1:35

Onaqa laŋ aŋgro na minjej, “Qotei aqa Mondor Bole a ni qa aisimqa Tamo Koba Qotei aqa siŋgila ni emqas. Deqa a ino leŋq dena ŋambabosimqa aqa so tulaŋ boledamu sqas. Deqa a Qotei aqa kumbra ti sqas. Naŋgi a qa maroqnqab, ‘A Qotei aqa Ŋiri.’

Luk 1:69

Qotei aqa wau tamo Devit aqa leŋ dena tamo bei ŋambabqas. A tamo siŋgila koba sqas. Qotei na a giltqo deqa a na iga eleŋam iga padalqasai.

Jon 1:14

Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru.

Jon 1:34

Qotei a na e degsi merbonaqa e tamo di unsimqa marem, ‘Bole, tamo di a Qotei aqa Ŋiri.’”

Jon 1:49

Onaqa Nataniel a Yesus aqa anjam di qusiqa minjej, “O Qalie Tamo Koba, ni degsi maronum deqa e poibqo, ni Qotei aqa Ŋiri. Ni Israel naŋgo Mandor Koba.”

Jon 10:30

Aqo ijo Abu wo iga tamo qujai.”

Jon 10:36

Ariya ijo Abu a segi na e giltbosiqa qariŋbonaq mandamq aiem. Deqa e maronum, ‘E Qotei aqa Ŋiri.’ E degsi maronumqa niŋgi kiyaqa merbonub, ‘Ni Qotei aqa sawa osim maronum, “E segi Qotei?” ’

Jon 20:28

Onaqa Tomas a na Yesus minjej, “O Yesus, endego e poibqo, ni ijo Tamo Koba. Ni ijo Qotei dego.”

Jon 20:31

Niŋgi ijo anjam endi sisiyosib Yesus qa nuŋgo areqalo siŋgilatosib a bole Kristus Qotei aqa Ŋiri degsi poiŋgwajqa deqa e na anjam endi neŋgreŋyonum. Yimqa niŋgi Yesus aqa ñam na ŋambile gaigai sqab.

Jon 5:25

“Niŋgi quiye. E bole merŋgwai. Bati bei brantqas agi brantqo. Deqa tamo uŋgasari moreŋo qaji naŋgi ijo kakoro qusib dena naŋgi ŋambile oqab. Di kiyaqa? E Qotei aqa Ŋiri deqa.

Jon 7:42

Kristus a Devit aqa leŋ dena ŋambabosim aqa qure utru Betlehem dena bqas. Nami Qotei aqa anjam degsib neŋgreŋyeb unu.”

Aposel 2:30

Nami Qotei na Devit minjej, ‘Mondoŋ ino leŋ naŋgi paraosibqa dena tamo bei ŋambabqas. Amqa e na tamo di giltitqa ni mandor koba unum dego kere a kamba ino sawa osim Mandor Koba sqas.’ Qotei na nami Devit anjam degsi minjej. Osiqa aqa anjam di siŋgilatosiqa olo minjej, ‘E ijo anjam di uratqasai. E dauryqai.’ Devit a Qotei aqa medabu o qaji tamo bole. Deqa kumbra Qotei na mondoŋ yqas qaji di Devit a nami qalieej. Osiqa Kristus qa endegsi marej, ‘Bunuqna a subq na tigelqas.’ Osiqa marej, ‘Qotei na Kristus moio qureq di uratqasai. Aqa jejamu dego subq di uratim qusaqasai.’

Aposel 3:13

Abraham, Aisak, Jekop, gago moma kalil naŋgi ti naŋgo Qotei a na aqa wau tamo Yesus laŋ qureq osi oqsiq ñam kobaquja yej. Deqa Yesus aqa siŋgila na tamo di boleosiq walwelqo. Yesus qujai di niŋgi na osib jeu tamo naŋgo baŋq di ateb. Onaqa Pailat na Yesus osim tonto talq dena oqeq atqajqa merŋgonaqa niŋgi na saidosib urateb.

Aposel 8:36

Onaqa naŋgi gam dauryosib giloqnsib gam qalaq di ya bei sonaq unsibqa Itiopia tamo dena Filip minjej, “Ni une. Ya agide. Iŋgi bei na e getentbqa keresai. Deqa ni e yansbe.”

Rom 1:9

E ijo are miligi siŋgilatsim deqa e Qotei aqa wau ojoqnsim aqa Ŋiri aqa anjam bole palontosim laqnum. Qotei a segi qalie, bati gaigai e pailyqa oqnsim niŋgi qa are qaleqnum.

Rom 4:1

Abraham a iga bul mandam tamo. A gago moma utru. Deqa iga a qa kiersi marqom?

Rom 9:3

Ijo areqalo koba agiende. Qotei na e taqal waibim Kristus na e qoreibosim ijo was qu agi Jekop aqa leŋ naŋgi olo kamba eleŋqajqa deqa e are koba qaleqnum. Osim deqa e gaigai Qotei pailyeqnum.

Rom 9:5

Naŋgo moma utru naŋgi nami ñam koba ti soqneb. Naŋgoq dena Kristus a ŋambabej. Kristus a segi Qotei. A iŋgi iŋgi kalil naŋgo gate. Deqa iga bati gaigai aqa ñam soqtoqnqom. Bole.

1 Korin 1:9

Niŋgi Qotei aqa Ŋiri gago Tamo Koba Yesus Kristus a ombla areqalo qujaitosib sqajqa deqa Qotei na niŋgi metŋgej. Kumbra kalil Qotei a nami niŋgi eŋgwajqa marej qaji di a na eŋgwas.

1 Korin 10:18

Niŋgi Israel naŋgo kumbra qa are qaliye. Israel naŋgi atra bijalq dia damu koitoqnsib oto bei oqnsib Qotei atraiyeqnub. Osib olo oto bei oqnsib uyeqnub. Naŋgo kumbra dena naŋgi Qotei koba na korooqnsib uyeqnub.

Galesia 4:4

Ariya bati Qotei a nami atej qaji di brantonaqa a na aqa Ŋiri Yesus qariŋyonaq mandamq aiej. Aisiq aqa ai na ŋambabtonaqa a tamo brantosiqa dal anjam aqa sorgomq di soqnej.

1 Tesalonaika 1:10

Mondoŋ Qotei aqa Ŋiri a laŋ qureq dena olo bqas deqa bini niŋgi a qa tariŋoqnsib unub. A moinaqa Qotei na olo subq na tigeltej. Di Yesus a segi qujai. A na iga eleŋej deqa mondoŋ Qotei aqa minjiŋ oqwa bati boqnimqa iga aqa minjiŋ di turqasai. Iga so bole gaigai sqom.

1 Timoti 2:5

Iga qalie, Qotei a segi qujai Qotei bole. Kristus Yesus a segi qujai tamo uŋgasari naŋgi ti Qotei ti naŋgo ambleq di tigelesosiqa yeba waiyej unu.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

2 Timoti 2:8

Ni gaigai Yesus Kristus qa are qaloqne. Yesus Kristus a moisiq olo subq na tigelej. A Mandor Koba Devit aqa leŋ. Aqa anjam bole agi e palontosim laqnum.

1 Jon 1:3

Iga Anjam di gago ŋamdamu na unoqnem. Iga a quoqnem. Deqa iga a qa niŋgi dego merŋgeqnum. Yim niŋgi qusibqa iga ti areqalo qujaitosim sqajqa deqa. O was qu, iga gago Abu Qotei wo aqa Ŋiri Yesus Kristus wo naŋgi ti koba na areqalo qujaitosim unum.

1 Jon 3:23

Qotei aqa dal anjam agiende. Iga aqa Aŋgro Yesus Kristus aqa ñam qa gago areqalo siŋgilatosim gago Kristen was naŋgi qalaqalainjroqnqom. Qotei aqa dal anjam di a na nami iga mergnaq quem.

1 Jon 3:8

Satan a nami une atsiq boqnej agi bini degsi unu. Deqa tamo a une atoqnqas di a Satan aqa tamo sqas. Ariya Qotei aqa Ŋiri a Satan aqa wau kobotqa bej.

1 Jon 4:15

Tamo bei a endegsi marqas, “Yesus a Qotei aqa Ŋiri.” Degsi marqas deqa Qotei na a beteryesqas. Yimqa a na kamba dego Qotei beteryesqas.

1 Jon 5:1

Yesus a segi Kristus. Tamo kalil degsib maroqnsib Yesus qa naŋgo areqalo siŋgilateqnub qaji naŋgi Qotei aqa aŋgro tiŋtiŋ unub. Tamo kalil Abu Qotei qalaqalaiyeqnub qaji naŋgi na aqa aŋgro naŋgi dego qalaqalainjreqnub.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

1 Jon 5:5

Tamo yai naŋgi mandam endeqa siŋgila gotraŋyoqnsib siŋgila na tigelejunub? E niŋgi merŋgwai. Tamo naŋgi Yesus a Qotei aqa Ŋiri degsib maroqnsib a qa naŋgo areqalo siŋgilateqnub qaji naŋgi segi mandam endeqa siŋgila gotraŋyoqnsib siŋgila na tigelejunub.

2 Jon 1:7

Niŋgi quiye. Tamo gargekoba naŋgi iga gisaŋgwa maroqnsib mandam endia laqnub. Yesus Kristus a tamo bulyosiq mandamq aiej anjam di naŋgi olo saideqnub. Tamo deqaji naŋgi gisaŋ tamo. Naŋgi Kristus jeuteqnub.

Uli Anjam 2:18

Yesus a na e degsi merbsiqa olo endegsi merbej, “Taiataira qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E Qotei aqa Ŋiri. Ijo ŋamdamu ŋam puloŋ bul puloŋeqnu. Ijo siŋga minjaleqnu. Bras geregere ñomyeqnab minjaleqnu dego kere. E na anjam endi ni qa qariŋyonum.