Rom 1:13 - Yesus Aqa Anjam Bole

¹³ O was qu, niŋgi endegsib qalieoiye. Bati gargekoba e bosiy niŋgi nuŋgwajqa are qaleqnum. Ijo areqalo agiende. Tamo uŋgasari sawa bei beiq di unub qaji naŋgo ambleq dia e waueqnamqa naŋgi are bulyoqnsib Yesus qa naŋgo areqalo siŋgilateqnub dego kere nuŋgo ambleq dia dego wauoqnitqa niŋgi qudei are bulyoqnsib Yesus qa nuŋgo areqalo siŋgilatoqnqab. Ariya wau gargekoba na gam getentetbeqnu deqa agi unum.

Rom 1:13 Iomraidhean Croise

Jon 12:24

Niŋgi quiye. E bole merŋgwai. Wit yago breiyibqa mandamq aisim moiqasai di a laŋa sqas. Ariya moiqas di a olo qoqi oqsim gei gargekoba ateleŋqas.

Jon 15:16

“Niŋgi na e giltbosai. E na niŋgi ijo segi qa osim giltŋgem. Osim niŋgi wau eŋgem. Yimqa niŋgi gilsib gei koba ateleŋoqnibqa nuŋgo gei bole gaigai sqas. Deqa niŋgi ijo ñam na iŋgi bei qa ijo Abu pailyqab di a na eŋgwas.

Jon 4:36

Tamo naŋgi iŋgi meli gentoqnsib koroiyoqnsib awai eqnub. Naŋgo awai agiende. Naŋgi ŋambile gaigai sqab. Deqa tamo naŋgi iŋgi yageqnub qaji ti tamo naŋgi iŋgi meli genteqnub qaji ti koba na areboleboleinjrqas.

Aposel 1:15

Bati bei tamo uŋgasari 120 Yesus qa naŋgo areqalo siŋgilateb qaji naŋgi koroosib sonabqa Pita a naŋgo ambleq di tigelosiqa minjrej,

Aposel 14:27

Aisib Yesus aqa tamo uŋgasari naŋgi koroinjrsibqa naŋgi aiyel qure qureq dia laqnsibqa Qotei na naŋgi aqaryainjreqnaqa naŋgi kumbra kalil yoqneb qaji deqa naŋgi sainjroqneb. Sainjroqnsib endegsib minjroqneb, “Qotei na sawa bei bei qaji tamo naŋgi dego gam waqtetnjreqnaqa naŋgi are bulyoqnsib Yesus qa naŋgo areqalo siŋgilateqnub.”

Aposel 15:12

Pita a na naŋgi anjam degsi minjrnaqa naŋgi kalil aqa anjam di qusibqa naŋgi mequmesoqneb. Onaqa Barnabas wo Pol wo naŋgi kamba tigelosib Qotei na nami naŋgi aiyel siŋgilatnjreqnaqa naŋgi sawa bei bei qaji tamo naŋgo ambleq dia maŋwa gargekoba yoqneb deqa naŋgi sainjrnab queb.

Aposel 19:21

Bati bei Qotei aqa Mondor na Pol areqalo yonaqa a endegsi marej, “E Masedonia sawa ti Akaia sawa ti dia walweloqnsiyqa dena aisiy Jerusalem qureq di brantqai.” Osiqa marej, “Di koboamqa e Jerusalem uratosiy gilsiy Rom qure dego unqai.”

Aposel 28:14

Dia iga Kristen tamo qudei naŋgi itnjrem. Itnjrnamqa naŋgi na mergonabqa iga bati 7-pela naŋgi koba na soqnem. Sosimqa naŋgi olo uratnjrsimqa siŋga na walwelosim Rom qureq di brantqa marsim aiem.

Rom 1:12

Ijo areqalo agiende. E niŋgi qa bosiy niŋgi Yesus qa nuŋgo areqalo siŋgilateqnub qaji di unsiyqa dena ijo are siŋgilatqai. Ariya niŋgi dego e Yesus qa ijo areqalo siŋgilateqnum qaji di unsibqa dena nuŋgo are siŋgilatqab. Gam dena e ti niŋgi ti are siŋgilatosim sqom.

Rom 11:25

O was qu, niŋgi segi powo koba ti unub niŋgi degsib are qalaib. Niŋgi degaib deqa e na uli anjam bei niŋgi endegsi merŋgwai. Israel tamo uŋgasari qudei naŋgo areqalo geteŋnjrejunu. Naŋgi degsib soqnib sawa bei bei qaji tamo uŋgasari Qotei na nami giltnjrej naŋgi di kalil eleŋekritosim kereamqa bati deqa a na Israel tamo uŋgasari kalil naŋgo areqalo dego waqtetnjrimqa naŋgi olo are bulyqab.

Rom 7:1

O was qu, e na anjam endi niŋgi tamo dal anjam qalie unub qaji niŋgi merŋgwai. Tamo a moiosaisoqnimqa dal anjam na a taqatoqnqas. Ariya a moiim dal anjam na a olo taqatqasai. Niŋgi di qaliesai kio?

1 Korin 1:10

Ariya was qu, e gago Tamo Koba Yesus Kristus aqa ñam na niŋgi siŋgila na endegsi merŋgwai. Niŋgi kalil areqalo qujaitosib anjam qujai maroqniye. Niŋgi anjam bei bei qa ŋiriŋosib pupoaib. Niŋgi areqalo qujai ti sosib koba na geregere soqniye.

1 Korin 10:1

O was qu, niŋgi ijo anjam endeqa geregere poiŋgem. Nami Moses aqa bati qa gago moma kalil naŋgi wadau sawaq di sonabqa Qotei a laŋbi na naŋgi gam osornjroqnej. Bati di naŋgi Yuwal Lent di gentosib mandam boleq aisib walwelosib gileb.

1 Korin 12:1

Ariya was qu, Qotei aqa Mondor a na iga siŋgila segi segi egeqnaqa iga wau ojeqnum. E deqa niŋgi merŋgit quiye.

1 Korin 14:20

O was qu, niŋgi aŋgro kiñilala naŋgi bulosib nanariosib walwelaib. Niŋgi tamo bole bole naŋgi bulosib areqalo bole na walweloqniye. Niŋgi qalie, aŋgro mom naŋgi kumbra uge qa poinjrosaieqnu. Deqa niŋgi kumbra uge kalil qa aŋgro mom naŋgi bulosib nanariosib soqniye.

1 Korin 14:26

Deqa was qu, niŋgi Qotei louqa korooqnsibqa niŋgi endegyoqniye. Niŋgi kalil segi segi wau ti deqa niŋgi qudei louoqniye. Niŋgi qudei Qotei aqa anjam plaltoqniye. Niŋgi qudei Qotei aqa uli anjam ubtoqniye. Niŋgi qudei meŋ bulyosib qure utru segi segi naŋgo anjam maroqniye. Niŋgi qudei qure utru segi segi naŋgo anjam aqa damu poiŋgim bulyosib palontoqniye. O was qu, nuŋgo wau segi segi dena niŋgi na Kristen tamo uŋgasari naŋgi siŋgilatnjroqniye.

1 Korin 9:2

Tamo qudei naŋgi mareqnub, “Pol a Yesus aqa anjam maro tamo bolesai.” Naŋgi degsib mareqnub di uŋgum. Niŋgi segi e qa qalie. E nami Tamo Koba Yesus aqa anjam niŋgi merŋgeqnam qusib are bulyeb. Dena niŋgi qalieeb, e Tamo Koba Yesus aqa anjam maro tamo bole.

2 Korin 1:8

O was qu, iga Esia sawaq di sosimqa gulube kobaquja item. Gulube dena iga ugeugeigosiqa gago siŋgila tulaŋ buŋyej. Deqa iga endegsi are qalem, gulube dena iga moiotgwas. O was qu, niŋgi di qalieqajqa deqa e anjam endi neŋgreŋyonum.

2 Korin 2:14

Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul.

Galesia 3:15

O was qu, e mandam tamo naŋgo kumbra qa niŋgi endegsi merŋgwai. Tamo bei a moiqa osimqa aqa aŋgro naŋgi qa are qalsim aqa ñoro kalil naŋgo baŋq di uratqa osim deqa a anjam bei neŋgreŋyosim di naŋgo baŋq di uratqas. Deqa aqa anjam neŋgreŋyqo qaji di tamo bei na olo taqal atqa keresai. Anjam bunuj bei dego olo totoryosim neŋgreŋyqa keresai.

Galesia 6:18

O was qu, gago Tamo Koba Yesus Kristus a niŋgi qa are boleiyosim nuŋgo qunuŋ taqatoqneme. Bole.

Filipai 1:22

E mandamq endia sosiyqa e tamo uŋgasari gargekoba naŋgi aqaryainjroqnqai. Ariya e gam kie dauryqai? Di e qaliesai.

Filipai 4:17

Niŋgi na e silali ebqajqa e deqa are qalosaieqnum. Niŋgi kumbra bole bole yoqnibqa Qotei na olo kamba niŋgi kumbra bole eŋgwajqa e deqa are qaleqnum.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

1 Tesalonaika 2:18

Iga niŋgi qa olo bqajqa are koba unu. E Pol e segi bati gargekoba niŋgi qa olo bqajqa yeqnam Satan na gam getentetgoqnej.

1 Tesalonaika 4:13

Ariya was qu, tamo uŋgasari nami moreŋeb qaji naŋgi mondoŋ kumbra kie turqab di niŋgi qalieqajqa deqa merŋgwom. Tamo uŋgasari Qotei qaliesai qaji naŋgi subq na tigelqa bati qa tariŋosaieqnub. Deqa naŋgo was bei a moiqas di naŋgi tulaŋ are ugeinjrqas. Ariya niŋgi degsib tulaŋ are ugeiŋgaim deqa anjam endi merŋgwom.

2 Tesalonaika 2:7

Niŋgi qalie, bini Qotei aqa dal anjam gotraŋyo qaji tamo di a ulioqnsiq waueqnu. Ariya a wauoqnimqa gam getentejunu qaji tamo di Qotei na taqal waiyim Satan aqa tamo kobaquja di a boleq dqas.

2 Timoti 4:17

Ariya Tamo Koba Yesus a segi na e taqbosiqa siŋgila ebej. Deqa e anjam pegiyo tamo aqa ulatamuq dia tigelosimqa Yesus aqa anjam bole mareqnamqa sawa bei bei qaji tamo naŋgi quoqneb. Qotei na e aqaryaibosiqa bauŋ juwaŋ naŋgo medabuq dena e osiq taqal waibej.