Matyu 6:4 - Yesus Aqa Anjam Bole

⁴ Di yawo anjam. Aqa damu endegsi unu. Ni uli na tamo uŋgasari iŋgi iŋgi saiqoji unub qaji naŋgi aqaryainjrimqa tamo kalil naŋgi qalieqasai. Ni kumbra bole di uli na yeqnam ino Abu a segi na uneqnu. Deqa a segi na ni awai bole emqas.”

Matyu 6:4 Iomraidhean Croise

Matyu 10:42

Tamo bei a endegsi are qalqas, ‘Tamo di a Yesus aqa aŋgro. Deqa e na a aqaryaiyqai.’ A degsi are qalsimqa ijo aŋgro di osim ya ulili tigsim anaiyqas di Qotei na kamba awai bole yqas. Niŋgi quiye. E bole merŋgwai. A na ijo segi aŋgro gereiyqo deqa aqa awai bole Qotei na yqo qaji di tamo bei na olo yaiyqa keresai.”

Matyu 6:18

Yimqa tamo uŋgasari naŋgi ni numoqnsib ni qurieŋeqnum di naŋgi qalieqasai. Ni kumbra bole di uli na yeqnam ino Abu a segi na uneqnu. Deqa a segi na ino ñam soqtetmosim awai bole emqas.”

Matyu 6:3

Deqa ni degyaim. Ni tamo uŋgasari iŋgi iŋgi saiqoji unub qaji naŋgi aqaryainjrqa osimqa baŋ qonaŋ na ulitsim aqaryainjrimqa baŋ wo a qalieqasai.

Matyu 6:6

Deqa ni degsim pailyaim. Ni Qotei pailyqa osimqa ino segi warum miligiq gilsim siraŋ qandimosim ino Abu uliejunu qaji a pailyimqa tamo kalil naŋgi ni numqasai. Ni kumbra bole di uli na yeqnam ino Abu a segi na uneqnu. Deqa a segi na ni awai bole emqas.

Luk 14:14

Amqa ni tulaŋ areboleboleimqas. Di kiyaqa? Naŋgi na kamba ni iŋgi anaimqa keresai. Deqa mondoŋ tamo uŋgasari kumbra bole bole yeqnub qaji naŋgi subq na tigelo batiamqa Qotei na kamba awai tulaŋ boledamu ni emqas.”

Luk 8:17

Dego kere kumbra kalil uliejunu qaji di olo boleq dqas. Iŋgi iŋgi kalil tamo naŋgi na kabutejunub qaji di dego olo boleq dimqa tamo naŋgi unsib qalieqab.

1 Korin 4:5

Qotei na tamo naŋgo une qa peginjrqa bati brantosaiunu deqa niŋgi na tamo qudei naŋgi une ti qa minjraib. Niŋgi mati tariŋesoqnibqa mondoŋ Tamo Koba Yesus a bosimqa a segi na iŋgi iŋgi kalil ambruq di uliejunub qaji di suwaŋoq di atqas. Osim tamo kalil naŋgo areqalo dego boleq atqas. Yim bati deqa Qotei a gago segi segi kumbra geregere pegiyosim mergwas.

Hibru 4:13

Iŋgi bei a Qotei qa uliqa keresai. Iŋgi iŋgi kalil Qotei na gereinjrej qaji di a na ŋam atsiq geregere uneqnu. Deqa mondoŋ a na qujai gago kumbra kalil qa iga pegigwas.

Jut 1:24

O was qu, Qotei a na niŋgi taqatŋgoqneme. Yim niŋgi uloŋqasai. Mondoŋ a na niŋgi joqsim laŋ qureq osi oqimqa niŋgi aqa riaŋ unsib une saiqoji sosib tulaŋ areboleboleiŋgim sqab.

Uli Anjam 2:23

Aqa aŋgro naŋgi dego ñumit moreŋqab. Amqa tamo uŋgasari qure kalilq dia ijo ñam qa koroosib loueqnub qaji naŋgi qalieqab, e tamo kalil naŋgo are miligi ti areqalo ti geregere unsim peleiyeqnum. Deqa niŋgi quiye. E na nuŋgo kumbra kalil geregere keretosiy nuŋgo awai dego segi segi eŋgwai.