Matyu 6:2 - Yesus Aqa Anjam Bole

² “Tamo uŋgasari iŋgi iŋgi saiqoji unub qaji di ni na aqaryainjrqa osimqa gisaŋ tamo naŋgi kumbra yeqnub di ni degyaim. Gisaŋ tamo naŋgi dena tamo uŋgasari iŋgi iŋgi saiqoji unub qaji naŋgi aqaryainjrqa oqnsib tamo qudei naŋgi qariŋnjreqnab gul anjamosib namoeqnab tamo kalil naŋgi na naŋgi unjroqnsib naŋgo ñam soqteqnub. Tamo naŋgi di Qotei tal miligiq dia, gam kokbaq dia kumbra degyeqnub. Deqa niŋgi quiye. E bole merŋgwai. Qotei a tamo naŋgi di awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere.

Matyu 6:2 Iomraidhean Croise

Matyu 15:7

“Niŋgi gisaŋ tamo. Agi Qotei aqa medabu o qaji tamo Aisaia a nami niŋgi qa keretsiqa anjam endegsi marej,

Matyu 16:3

Nobqolo laŋbi na seŋ getenteqnaqa ambrueqnaqa niŋgi mareqnub, ‘Laŋbi tuluqo. Seŋ lentqo. Deqa jagwa awa ti bqas.’ Od, niŋgi laŋ unoqnsib dena endegsi poiŋgeqnu, ‘Sawa boleqas. Sawa ugeqas.’ Ariya Qotei aqa maŋwa bini branteqnaqa niŋgi di unoqnsib utru poiŋgosaieqnu.

Matyu 22:18

Onaqa Yesus a naŋgo areqalo uge di poiyonaqa minjrej, “Niŋgi gisaŋ tamo. Kiyaqa niŋgi e anjam bei grotitqa qusib niŋgi e ojqajqa deqa gisaŋbeqnub?

Matyu 23:5

Kumbra kalil Farisi naŋgi yeqnub qaji di tamo naŋgi unoqnsib naŋgo ñam soqtoqnqajqa deqa yeqnub. Deqa naŋgi Qotei aqa dal anjam mutu qudei pepa kiñilalaq dia neŋgreŋyoqnsibqa lopo miligiq di jigeleŋoqnsib naŋgo lanjaq dia gara ñeŋgi na qosisib laqnub. Naŋgo gara jugo mutuq dia dego naŋgi gara burbur neŋgreŋ ti wala bole bole tontoqnsib walweleqnub.

Matyu 23:6

Naŋgi goio kokba bati qa giloqnsibqa tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib naŋgo ñam soqtetnjrqajqa deqa naŋgi areboleboleinjreqnu. Qotei tal miligiq dia dego naŋgi tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib biŋinjrqajqa deqa naŋgi areboleboleinjreqnu.

Matyu 24:51

Deqa aqa tamo koba a na wau tamo di ugeugeiyosim qalsim gisaŋ tamo naŋgo so sawaq waiyim aiqas. Sawa dia tamo naŋgi tulaŋ akamkobayoqnsib pailoqnsib naŋgo jaqatiŋ qa qalagei anjam atoqnqas.”

Matyu 5:18

Deqa niŋgi quiye. E bole merŋgwai. Laŋ ti mandam ti koboosaisoqnimqa Qotei aqa dal anjam mutu kiñala bei koboqasai bolesai. Qotei aqa dal anjam aqa mutu kalil degsib soqnib iŋgi iŋgi kalil brantqab.

Matyu 6:16

Osiqa Yesus a olo anjam endegsi minjrej, “Niŋgi ya uratosib qurieŋqa marsibqa gisaŋ tamo naŋgi qurieŋeqnub niŋgi degyaib. Gisaŋ tamo naŋgi qurieŋoqnsibqa ulatamu ugeinjreqnaqa tamo uŋgasari naŋgo ŋamdamuq di laqnabqa unjroqnsib naŋgo ñam soqteqnub. Deqa niŋgi quiye. E bole merŋgwai. Tamo naŋgi kumbra degyeqnub qaji Qotei na awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere.

Matyu 6:3

Deqa ni degyaim. Ni tamo uŋgasari iŋgi iŋgi saiqoji unub qaji naŋgi aqaryainjrqa osimqa baŋ qonaŋ na ulitsim aqaryainjrimqa baŋ wo a qalieqasai.

Matyu 6:5

Osiqa Yesus a olo anjam endegsi minjrej, “Niŋgi Qotei pailyqa osibqa gisaŋ tamo naŋgi pailyeqnub degsib pailyaib. Gisaŋ tamo naŋgi Qotei pailyqa oqnsib tamo uŋgasari naŋgo ŋamgalaq dia tigeleqnab unjroqnsib naŋgo ñam soqteqnub. Tamo naŋgi di Qotei tal miligiq dia, qure ambleq dia, gam kokba qalaq dia kumbra degyeqnub. Deqa niŋgi quiye. E bole merŋgwai. Qotei a naŋgi awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere.

Matyu 7:5

Ni gisaŋ tamo. Ni mati ŋampaŋ kobaquja ino segi ŋamgalaq di unu qaji di taqal waiysim ŋamdamu suwaŋmimqa ariya degam ŋam ñeŋgi kiñala ino was aqa ŋamgalaq di unu qaji di geregere unsim taqal waiyete.

Mak 12:39

Naŋgi bati gaigai Qotei tal miligiq dia tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib biŋinjrqajqa deqa naŋgi kumbra degyeqnub. Naŋgi goio kokba bati qa giloqnsibqa tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib naŋgo ñam soqtetnjrqajqa deqa naŋgi kumbra degyeqnub.

Mak 7:6

Onaqa Yesus na kamba minjrej, “Niŋgi gisaŋ tamo. Babaŋ na niŋgi tamo bole. Ariya nuŋgo are miligi uge. Agi Qotei aqa medabu o qaji tamo Aisaia a nami niŋgi qa anjam endegsi neŋgreŋyej unu, ‘Tamo naŋgi di naŋgo medabu na ijo ñam soqteqnub. Ariya naŋgo are miligi e qa sosai.

Luk 11:41

Deqa iŋgi iŋgi kalil nuŋgo are miligiq di unu qaji di niŋgi eleŋosib tamo iŋgi iŋgi saiqoji unub qaji naŋgi enjroqniye. Niŋgi kumbra degyibqa nuŋgo iŋgi iŋgi kalil milalesqas.

Luk 11:43

“O Farisi tamo, niŋgi tulaŋ padalougetqab. Di kiyaqa? Niŋgi Qotei tal miligiq dia tamo ñam ti naŋgo awo jaramq dia awooqnibqa tamo uŋgasari naŋgi na niŋgi nuŋgoqnsib biŋiŋgwajqa deqa niŋgi areboleboleiŋgeqnu. Niŋgi koro sawaq dia dego tamo uŋgasari naŋgo ŋamdamuq dia laqnibqa naŋgi na niŋgi nuŋgoqnsib nuŋgo ñam soqtetŋgsib baŋ ojetŋgoqnqajqa deqa niŋgi areboleboleiŋgeqnu.

Luk 12:33

Deqa niŋgi kumbra endegyiye. Niŋgi nuŋgo ñoro kalil qariŋyosib silali osib tamo iŋgi iŋgi saiqoji unub qaji naŋgi di jeisi enjriye. Osib silali jugwajqa quŋ ugeosaieqnu qaji di gereiyiye. Osib laŋ qure qa iŋgi iŋgi eleŋosib di jigeleŋoiye. Iŋgi iŋgi di koboqa keresai. Bajiŋ tamo naŋgi bosib oqasai. Sisimbiŋ na ugetqasai. Iŋgi iŋgi di gaigai sqas.

Luk 12:56

Niŋgi gisaŋ tamo. Niŋgi mandam ti laŋ ti unoqnsib dena niŋgi poiŋgeqnu, ‘Sawa ugeqas. Sawa boleqas.’ Ariya kiyaqa Qotei aqa kumbra bini branteqnu qaji di niŋgi unoqnsib utru poiŋgosaieqnu?”

Luk 13:15

A degsi marnaqa Tamo Koba Yesus na kamba minjej, “Niŋgi gisaŋ tamo. Niŋgi yori bati gaigai nuŋgo bulmakau ti donki ti joqsib giloqnsib ya anainjreqnub.

Luk 20:46

“Dal anjam qalie tamo naŋgi kumbra uge uge yoqnsib laqnub. Deqa niŋgi na naŋgo kumbra uge di geregere tenemtoqniye. Tenemtsib naŋgo kumbra di dauryaib. Naŋgo kumbra uge agi ubtsiy merŋgwai. Naŋgi bati gaigai koro sawaq dia gara jugo olekokba jugoqnsib laqnibqa tamo uŋgasari naŋgi na naŋgi unjrsib naŋgo ñam soqtetnjrsib baŋ ojetnjroqnqajqa deqa naŋgi gara walaosi laqnub. Naŋgi bati gaigai Qotei tal miligiq dia tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib biŋinjrqajqa deqa naŋgi areboleboleinjreqnu. Naŋgi goio kokba bati qa giloqnsibqa tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib naŋgo ñam soqtetnjrqajqa deqa naŋgi areboleboleinjreqnu.

Luk 6:24

“Ariya niŋgi bini ñoro koba ti unub qaji bunuqna niŋgi gulube oqab. Di kiyaqa? Nuŋgo are boletetŋgwajqa iŋgi agi niŋgi mandamq endia ekritonub.

Luk 6:42

Kiyaqa ino segi ŋamgalaq dia ŋampaŋ kobaquja soqnimqa tentosim ino was minjqam, ‘Was, e ino ŋamgalaq dia ŋam ñeŋgi kiñala unonum di osiy taqal waiyetmqai’? Ŋampaŋ kobaquja ino segi ŋamgalaq di unu qaji di ni unosai. Ni gisaŋ tamo. Ni mati ŋampaŋ kobaquja ino segi ŋamgalaq di unu qaji di taqal waiysim ŋamdamu suwaŋmimqa ariya degam ŋam ñeŋgi kiñala ino was aqa ŋamgalaq di unu qaji di geregere unsim taqal waiyete.”

Jon 13:29

Judas a na naŋgo silali jugwajqa quŋ taqatoqnej. Deqa naŋgi are qaleb, Judas a gilsim yori bati aqa iŋgi iŋgi awaiyqajqa deqa kio Yesus na degsi minjej. Naŋgi qudei are qaleb, Judas a gilsim iŋgi awaiyosim tamo iŋgi iŋgi saiqoji unub qaji naŋgi anainjrqajqa deqa kio Yesus na degsi minjej.

Jon 5:41

“E mandam tamo naŋgoq dena ñam koba oqajqa e deqa are qalsim anjam endi marosaieqnum.

Jon 5:44

Niŋgi nuŋgo segi was naŋgoq dena ñam koba oqajqa are qaleqnub. Ariya Qotei a segi qujai unu. Niŋgi aqaq dena ñam koba oqajqa are qalosaieqnub. Niŋgi kumbra degyeqnub deqa niŋgi kiersib e qa nuŋgo areqalo siŋgilatqab? Di keresai.

Jon 7:18

Tamo bei aqa segi areqalo na anjam marqas di a aqa segi ñam soqtqa osim deqa anjam marqas. Ariya Qotei agi e qariŋbej qaji aqa ñam e soqtqa osim deqa anjam mareqnum. Deqa e tamo bole. E gisaŋ tamo sai.

Aposel 10:2

Kornilius a Qotei aqa kumbra dauryoqnej qaji. Deqa tamo uŋgasari kalil a ombla tal qujaiq di soqneb qaji naŋgi a ti bati gaigai Qotei aqa sorgomq di soqneb. Juda tamo uŋgasari naŋgi iŋgi iŋgi saiinjreqnaqa a naŋgi silali na aqaryainjroqnej. A bati gaigai Qotei pailyoqnej.

Aposel 10:4

Onaqa Kornilius na laŋ aŋgro di koqyosiqa tulaŋ ulaugetosiq minjej, “O Tamo Koba, ni kiyaqa ijoq bonum?” Onaqa laŋ aŋgro dena minjej, “Qotei a gaigai ino pail queqnu. Juda tamo uŋgasari naŋgi iŋgi iŋgi saiinjreqnaqa ni na naŋgi aqaryainjreqnum. Ino kumbra di Qotei a unoqnsiq deqa a ni qa tulaŋ areboleboleiyeqnu.

Aposel 11:29

Kristen tamo uŋgasari naŋgi Agabus aqa anjam di qusibqa naŋgi naŋgo segi segi silali soqnej qaji di koroiyosib Kristen was qu Judia sawaq di soqneb qaji naŋgi aqaryainjrqa osibqa silali qariŋyonab naŋgoq aiej.

Aposel 24:17

“Ariya e sawa bei beiq dia wauosim laqnamqa wausau qudei koboonaqa agi Jerusalem aiem. Yesus aqa tamo uŋgasari sawa bei beiq di so qaji naŋgi na silali koroiyosib ebnabqa osi aisim Juda naŋgi mam soqneb deqa enjrem. Silali qudei osi aisim Qotei dego atraiyem.

Aposel 9:36

Jopa qureq dia uŋa bei soqnej aqa ñam Tabita. A Yesus dauryoqnej qaji. Grik anjam na aqa ñam Dorkas. A uŋa bolequja. A gaigai kumbra tulaŋ boledamu yoqnsiqa tamo uŋgasari iŋgi iŋgi saiqoji soqneb qaji naŋgi lueinjroqnsiq iŋgi anainjroqnej.

Rom 12:8

A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.

1 Korin 13:3

E ijo iŋgi iŋgi kalil eleŋosiy tamo iŋgi iŋgi saiqoji unub qaji naŋgi jeisiy enjrqai kio e ijo segi jejamu osiy jeu tamo naŋgo baŋq di atitqa naŋgi na osib ŋamyuo na koitqab kio ariya e qalaqalaiyo kumbra dauryqasai di ijo kumbra kalil dena e yala aqaryaibqa keresai.

Galesia 2:10

Osib naŋgi anjam qujai segi aqo aiyel endegsib mergeb, “Gago ambleq endia Kristen tamo qudei naŋgi iŋgi iŋgi tulaŋ saiqoji unub. Deqa niŋgi naŋgi qa are walŋgaiq. Niŋgi naŋgi dego aqaryainjroqniye.” Onaqa iga naŋgi odnjrem. Di kiyaqa? Iga nami tamo iŋgi iŋgi saiqoji unub qaji naŋgi aqaryainjrqajqa are koba soqnej agi bini degsim unum.

Efesus 4:28

Bajiŋ tamo naŋgi olo bajiŋaib. Naŋgi naŋgo segi baŋ na wauoqnsib dena iŋgi iŋgi oqnsib tamo iŋgi qa truqueqnub qaji naŋgi aqaryainjroqnebe.

1 Tesalonaika 2:6

Iga wauoqnem di niŋgi ti tamo uŋgasari qudei ti na gago ñam soqtetgwajqa deqa iga wauosai.

1 Timoti 6:18

Deqa niŋgi kumbra bole bole yoqnsib tamo uŋgasari naŋgi aqaryainjroqniye. Osib gaigai nuŋgo iŋgi iŋgi jeioqnsib tamo uŋgasari iŋgi iŋgi qa truqueqnub qaji naŋgi olo enjroqniye. Niŋgi marqab, silali di iŋgi bole. Degaib. Iŋgi bole agi was naŋgi geregereinjrqajqa kumbra. O Timoti, ni na tamo naŋgi mandam qa silali ti ñoro ti ejunub qaji naŋgi degsim minjroqne.

Filemon 1:7

Od, was, ni na Qotei aqa segi tamo uŋgasari kalil naŋgi tulaŋ qalaqalainjreqnum. Ino kumbra dena ni na naŋgo are tulaŋ siŋgilatetnjreqnum. E ino kumbra deqa qusim dena ijo are latetbqoqa e tulaŋ areboleboleibqo.

Hibru 13:16

Ariya niŋgi na tamo uŋgasari naŋgi kumbra bole bole enjroqniye. Naŋgi iŋgi qudei qa truquoqnibqa niŋgi na aqaryainjroqniye. Niŋgi kumbra di urataib. Niŋgi kumbra degyoqnqab di niŋgi Qotei atraiyobuloqnqab. Yim Qotei a nuŋgo kumbra deqa tulaŋ areboleboleiyoqnqas.

1 Pita 4:11

Nuŋgo ambleq di tamo bei a anjam palontqa wau osimqa a Qotei aqa anjam geregere palontoqneme. Nuŋgo ambleq di tamo bei a tamo naŋgi aqaryainjrqajqa wau osimqa Qotei na a siŋgila yimqa a siŋgila dena wauoqneme. Yimqa wau kalil niŋgi yeqnub qaji di tamo naŋgi unsibqa Yesus Kristus aqa ñam na Qotei aqa ñam tulaŋ soqtoqnqab. Yesus Kristus a bati gaigai ñam koba ti siŋgila ti sqas. Bole.