Jon 1:4 - Yesus Aqa Anjam Bole

⁴ Anjam a segi ŋambile qa utru. Ŋambile di puloŋ bul. Deqa ŋambile dena tamo uŋgasari naŋgi suwantnjreqnu.

Jon 1:4 Iomraidhean Croise

Matyu 4:16

Deqa tamo uŋgasari ambruqsi unub qaji naŋgi puloŋ kobaquja unqab. Tamo uŋgasari padalo gam dauryosib ambruqsi unub qaji naŋgi puloŋ dena suwantnjrqas.”

Luk 2:32

Kristus aqa riaŋ na tamo uŋgasari kalil sawa isa isaq di unub qaji naŋgi suwantnjrqas. Ino segi tamo uŋgasari Israel naŋgi dego a na bosim naŋgi suwantnjrimqa naŋgo ñam kobaqas.”

Jon 11:25

Onaqa Yesus na minjej, “E segi subq na tigelo qa utru. E segi ŋambile sqajqa utru. Tamo a e qa aqa areqalo siŋgilatosim moiqas di uŋgum. A ŋambile sqas.

Jon 12:35

Onaqa Yesus na minjrej, “Puloŋ a nuŋgo ambleq di sokiñalaysim niŋgi olo uratŋgwas. Puloŋ a nuŋgo ambleq endi unu. Deqa niŋgi puloŋ di osib puloŋq na laqniye. Yimqa ambruiŋgwasai. Tamo ambruq na laqnu qaji a ambruq di sosim qabitqas kio? Di a qalieqasai.

Jon 12:46

E puloŋ bulosim mandamq aiem. Deqa tamo uŋgasari kalil e qa naŋgo areqalo siŋgilatqab qaji naŋgi ambruq di sqasai.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 3:19

Qotei na tamo naŋgi di peginjrqas di aqa utru agiende. Puloŋ a mandamq ainaqa tamo naŋgi ambru qa arearetnjroqnej. Naŋgi puloŋ qa arearetnjrosaioqnej. Di kiyaqa? Naŋgi kumbra uge uge yoqneb deqa.

Jon 5:21

Ijo Abu na tamo moreŋo qaji naŋgi olo ŋambile enjroqnsiqa subq na tigeltnjreqnu. Deqa e Qotei aqa Ŋiri e kamba dego ijo segi areqalo na tamo naŋgi ŋambile enjreqnum.

Jon 5:26

Ijo Abu a segi ŋambile qa utru. E aqa Ŋiri. A na e siŋgila ebej deqa e dego ŋambile qa utru.

Jon 8:12

Yesus a uŋa degsi minjnaq gileqnaqa a na tamo uŋgasari naŋgi olo endegsi minjrej, “E mandam endeqa puloŋ. Tamo a e daurbqas di a ambruq di walwelqasai. A suwaŋoq di walweloqnsim ŋambile gaigai sqas.”

Jon 9:5

E mandamq endi sosimqa e mandam endeqa puloŋ unum.”

Aposel 26:23

Agi Qotei aqa medabu o qaji tamo naŋgi nami anjam endegsib neŋgreŋyeb, ‘Kristus a jaqatiŋ koba osim moiqas. Moisimqa tamo kalil qa namoosim olo subq na tigelqas. Osim Juda tamo ti sawa bei bei qaji tamo naŋgi ti ambruq di soqnibqa naŋgi anjam minjroqnimqa naŋgi are bulyosib ambru uratosib suwaŋoq boqnqab.’”

1 Korin 15:45

Agi Qotei aqa anjam bei nami endegsib neŋgreŋyeb unu, “Adam namij a mandam qaji ŋambile osi soqnej.” Ariya Adam bunuj a bunuqna bosiqa a segi Mondor ti sosiqa tamo uŋgasari naŋgi laŋ qaji ŋambile enjrej. Adam bunuj di Kristus.

Efesus 5:14

Suwaŋ dena iŋgi qudei boleq ateqnaqa iŋgi di suwaŋobuleqnu. Agi anjam bei endegsi unu, “Ni tamo ŋeiejunum qaji ni olo subq na tigel. Yim Kristus a na ni suwaŋ emqas.”

Kolosi 3:4

Kristus a segi nuŋgo ŋambile qa utru. Mondoŋ a laŋ goge dena boleq dimqa niŋgi dego a koba na Qotei aqa riaŋ ti wala ti boleq dqab.

1 Jon 1:1

Anjam ŋambile unu qaji a nami soqnej. Iga Anjam deqa mare mare laqnum. Anjam di iga quoqnem. Gago ŋamdamu na unoqnem. Gago baŋ na dego ojoqnem.

1 Jon 1:2

Ŋambile di boleq donaqa iga unem. Iga ŋambile deqa mare mare laqnum. Ŋambile di gaigai sqas. Nami ŋambile di aqa Abu wo sosiqa boleq donaqa iga unem. Deqa iga a qa niŋgi merŋgeqnum.

1 Jon 5:11

Kumbra dena Qotei na iga osorgej, aqa anjam bole. Qotei na iga ŋambile gaigai sqajqa marsiq iga ŋambile egej. Ŋambile di aqa utru Qotei aqa Ŋiri aqaq di unu.

Uli Anjam 22:1

Ariya laŋ aŋgro dena ya bei osorbej. Ya di ŋambile qa ya. Ya di tulaŋ riaŋosiq qunuŋ bulej. Ya di Qotei wo Kaja Du wo naŋgo awo jaram kobaq dena bosiq qure aqa gam koba dauryosiq sumoqnej.

Uli Anjam 22:16

E Yesus. E na ijo laŋ aŋgro qariŋyo-numqa niŋgi e qa loueqnub qaji niŋgi qa aisiq anjam endi palontosiq merŋgwo. E Mandor Koba Devit aqa leŋq dena ŋambabem qaji. E Devit aqa Aŋgro. Nebeqa laqnaqa burbas bunuj oqeqnu dego kere e minjaleqnum.”