Jems 3:17 - Yesus Aqa Anjam Bole

¹⁷ Ariya tamo naŋgi Qotei aqaq dena areqalo bole ti powo ti eqnub qaji naŋgi kumbra tulaŋ boledamu yeqnub. Naŋgi kumbra jigat dauryosaieqnub. Naŋgi lawo na sosib tamo naŋgi jiŋga na gereinjroqnsib naŋgi qa duloqnsib kumbra bole bole enjreqnub. Naŋgi na tamo kalil naŋgi turtnjroqnsib kumbra qujai enjreqnub. Naŋgi gisaŋoqnsib laŋa babaŋ na kumbra bole dauryosaieqnub. Naŋgi bole dauryeqnub.

Jems 3:17 Iomraidhean Croise

Matyu 23:28

Niŋgi sub di bul. Deqa tamo uŋgasari naŋgi na niŋgi nuŋgoqnsib mareqnub, ‘Naŋgi tamo bole.’ Ariya nuŋgo are miligi gisaŋ kumbra ti dal anjam gotraŋyqajqa kumbra ti dena maqejunu. Deqa niŋgi tulaŋ padalougetqab.”

Matyu 5:8

“Tamo uŋgasari naŋgo are miligiq di jiga bei saiqoji unub qaji naŋgi dego tulaŋ areboleboleinjreme. Di kiyaqa? Mondoŋ naŋgi Qotei aqa ulatamu unqab.

Matyu 5:9

“Tamo uŋgasari jeu turyoqnsibqa lawo kumbra boleq ateqnub qaji naŋgi dego tulaŋ areboleboleinjreme. Di kiyaqa? Qotei a naŋgi qa olo marqas, ‘Naŋgi ijo segi aŋgro bole.’

Luk 21:15

Di kiyaqa? E segi na nuŋgo medabu siŋgilatetŋgsiy areqalo eŋgitqa niŋgi kamba anjam minjroqnqab. Minjroqnibqa naŋgi na anjam bei nuŋgo jejamuq di qametŋgwa yoqnib ugeinjroqnqas.

Luk 6:36

Nuŋgo Abu a gaigai tamo naŋgi qa duloqnsiqa naŋgo une kobotetnjreqnu. Deqa niŋgi dego Qotei aqa kumbra di dauryosib tamo kalil naŋgi qa duloqnsibqa naŋgo une kobotetnjroqniye.

Jon 1:14

Anjam di a tamo yusiqa gago ambleq di soqnej. Onaqa iga aqa ñam koba ti aqa siŋgila ti di unem. Aqa ñam agiende. A segi qujai Qotei aqa Ŋiri. A iga qa are tulaŋ boleiyeqnu. A segi anjam bole qa utru.

Jon 1:47

Onaqa Nataniel a walwelosiq Yesus aqa areq beqnaqa unsiqa a qa marej, “Niŋgi uniye. Tamo di a Israel tamo bolequja. A gisaŋ anjam marosaieqnu.”

Aposel 11:24

Barnabas a tamo tulaŋ bolequja. Qotei aqa Mondor aqaq di sonaqa a siŋgila ti wauoqnej. Aqa areqalo kalil Yesus qa siŋgilatsiq soqnej. Deqa a Qotei aqa anjam mareqnaqa tamo uŋgasari gargekoba naŋgi quoqnsib are bulyoqnsib Tamo Koba Yesus qa naŋgo areqalo siŋgilatoqneb.

Aposel 9:36

Jopa qureq dia uŋa bei soqnej aqa ñam Tabita. A Yesus dauryoqnej qaji. Grik anjam na aqa ñam Dorkas. A uŋa bolequja. A gaigai kumbra tulaŋ boledamu yoqnsiqa tamo uŋgasari iŋgi iŋgi saiqoji soqneb qaji naŋgi lueinjroqnsiq iŋgi anainjroqnej.

Rom 12:18

Niŋgi ŋiriŋ ti qoto ti uratiye. Gam soqnimqa niŋgi gaigai tamo kalil naŋgi koba na are qujaitosib soqniye.

Rom 12:9

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

Rom 15:14

O was qu, ijo are miligiq di e qalieonum, niŋgi kumbra bole gaigai yeqnub. Niŋgi tulaŋ powo koba ti unub deqa niŋgi segi segi na Qotei aqa tamo uŋgasari naŋgi gam bole osornjreqnub.

1 Korin 12:8

Qotei aqa Mondor na tamo qudei naŋgi siŋgila enjreqnu deqa naŋgi areqalo bole babtoqnsib tamo uŋgasari naŋgi minjreqnub. Mondor qujai dena tamo qudei naŋgi siŋgila enjreqnaqa naŋgi Qotei aqa qalie bole babtoqnsib tamo uŋgasari naŋgi osornjreqnub.

2 Korin 10:1

Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 6:6

Iga gaigai kumbra bole jiga saiqoji dauryeqnum. Iga Qotei qa qalie bole unum. Iga urur minjiŋ oqosaieqnu. Iga na tamo uŋgasari naŋgi kumbra bole enjreqnum. Iga Qotei aqa Mondor Bole aqa siŋgila oqnsim unum. Iga na tamo kalil naŋgi qalaqalaiyo kumbra osornjreqnum. Iga laŋa medabu na naŋgi qalaqalainjrosaieqnum.

2 Korin 7:11

Niŋgi geregere are qaliye. Are gulube Qotei na niŋgi eŋgej qaji dena niŋgi siŋgilatŋgej deqa niŋgi are bulyosib agi kumbra bole bole yeqnub. Are gulube dena Qotei na nuŋgo are tigeltetŋgonaqa niŋgi nuŋgo une gereiyosib tamo qujai une yej qaji di a ŋiriŋteb. Osib niŋgi Qotei ulaiyosib aqa sorgomq di soqneb. Qotei na nuŋgo are tigeltetŋgej deqa niŋgi iga qa are koba qaleqnub. Osib niŋgi tamo qujai une yej qaji di aqa une olo gereiyetqa dego are qaleqnub. Niŋgi segi na nuŋgo une di gereiyqajqa are qaleqnub. Nuŋgo kumbra dena iga qalieonum, bole, niŋgi une saiqoji.

2 Korin 9:10

O was qu, Qotei a na tamo naŋgi saga yago enjreqnaqa naŋgi breiyeqnub. A na tamo naŋgi bem enjreqnaqa naŋgi uyeqnub. Dego kere a na niŋgi iŋgi iŋgi keretsim eŋgoqnimqa niŋgi iŋgi iŋgi kere na sqab. Sosib dena niŋgi Qotei aqa tamo uŋgasari naŋgi aqaryainjroqniye. Yim tamo naŋgi saga yago breiyeqnab dena iŋgi koba oqeleŋeqnu dego kere nuŋgo kumbra bole di tulaŋ kobaoqnqas.

Efesus 5:9

Suwaŋ a na kumbra endeqaji babteqnu. Tamo naŋgi suwaŋoq di unub qaji naŋgi kumbra bole bole yeqnub. Naŋgi kumbra tiŋtiŋ dauryeqnub. Naŋgi anjam bole mareqnub.

Filipai 1:11

O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Filipai 4:8

Ariya was qu, e anjam qujai bei unu. Anjam agiende. Niŋgi gaigai kumbra endeqa are qaloqniye. Kumbra bole ti kumbra tiŋtiŋ ti kumbra jiga saiqoji deqa ti kumbra Qotei a tulaŋ qalaqalaiyeqnu qaji deqa ti kumbra tamo naŋgi yeqnab iga unoqnsim deqa areboleboleigeqnu qaji kumbra deqa ti kalil are qaloqnsib soqniye.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

1 Tesalonaika 2:7

Bole, iga Kristus aqa wau tamo deqa iga na niŋgi endegsi merŋgwa kere, “Niŋgi na silali iŋgi iŋgi qa iga aqaryaigiye.” Ariya iga degosai. Iga niŋgi koba na aŋgro kiñilala bul lawo soqnem. Ai naŋgi na naŋgo aŋgro mom naŋgi muŋgum anainjreqnub dego kere iga nuŋgo ai bul sosim niŋgi geregereiŋgoqnem.

1 Timoti 5:21

O Timoti, Qotei ti aqa laŋ aŋgro naŋgi ti Kristus Yesus ombla na naŋgo ŋamgalaq dia e siŋgila na anjam endegsi ni mermqai. Wau kalil e ino baŋq di atem qaji di ni geregere taqatosim wauoqne. Ni na ino was naŋgi ti tamo kokba ti naŋgi segi gereinjroqnaim. Ni tamo kalil naŋgi turtnjrsim gereinjroqnime.

2 Timoti 2:24

Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe.

Taitus 1:15

Tamo uŋgasari Qotei aqa ŋamgalaq di une saiqoji unub qaji naŋgi mareqnub, “Iŋgi iŋgi kalil Qotei na atej qaji di jiga saiqoji.” Osib uyeqnub. Ariya tamo uŋgasari kumbra jigat dauryoqnsib Kristus qa naŋgo areqalo siŋgilatosaieqnub qaji naŋgi mareqnub, “Iŋgi iŋgi kalil Qotei na atej qaji di jigat.” Osib uyqa urateqnub. Di kiyaqa? Naŋgo areqalo ti naŋgo are miligi ti di tulaŋ jigat deqa.

Taitus 3:2

Niŋgi tamo qudei naŋgi misiliŋ anjam minjroqnaib. Osib anjam na qotoqnaib. Gaigai lawo na sosib tamo uŋgasari kalil naŋgi kumbra bole enjroqniye.” O Taitus, ni na tamo uŋgasari naŋgi anjam degsim minjroqne.

Hibru 12:11

Bole, Qotei na iga tingitgwa maroqnsiq gulube egeqnaqa dena iga areboleboleigosaieqnu. Iga dena are gulubeigeqnu. Ariya bunuqna gulube dena iga tingitgimqa iga kumbra bole dauryqajqa geregere qalieosim siŋgilaqom. Osim deqa iga are lawo na sqom.

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

Jems 1:17

Iŋgi bole bole kalil iga eleŋeqnum qaji di tulaŋ boledamu. Iŋgi iŋgi kalil di laŋ goge dena branteqnaq iga laŋa eleŋeqnum. Qotei Abu riaŋ ti unu qaji a na iŋgi iŋgi di qariŋyeqnaqa gagoq aieqnu. Qotei Abu a kumbra bulbulyosaieqnu. A seŋ qunuŋ bul sai. Agi seŋ qunuŋ a olekobaoqnsiqa olo truqueqnu. Qotei a degyosaieqnu.

Jems 1:5

Nuŋgo ambleq di tamo bei a powo qa truquosimqa a Qotei pailyem. Yimqa Qotei na a powo yqas. Niŋgi qalie, Qotei a gaigai tamo kalil naŋgi iŋgi bole bole enjreqnu. Naŋgi pailyeqnab a naŋgi qa olo ŋiriŋosaieqnu.

Jems 2:13

Tamo bei a tamo naŋgi qa dulqasai di mondoŋ tamo peginjro batiamqa Qotei a kamba tamo deqa dulqasai. Ariya tamo bei a tamo naŋgi qa dulqas di mondoŋ tamo peginjro batiamqa Qotei a tamo deqa kamba dulosim aqa une kobotetqas.

Jems 2:4

O was qu, niŋgi kumbra degyeqnub deqa niŋgi nuŋgo segi areqalo na tamo naŋgi laŋa peginjreqnub. Agi niŋgi tamo ñam ti naŋgi kumbra bole enjroqnsib olo tamo ñam saiqoji naŋgi kumbra uge enjreqnub. Nuŋgo areqalo uge dena niŋgi tamo naŋgi laŋa peginjreqnub. Niŋgi tamo kalil naŋgi turtnjroqnsib kumbra qujai enjroqnqab di kere.

Jems 3:15

Niŋgi degyqab di niŋgi powo bole ti sqasai. Niŋgi powo uge ti sqab. Powo deqaji laŋ goge dena bosai. Di mandam qaji powo. Di gago areqalo namij aqa powo. Powo di aqa abu Satan a segi.

Jems 4:8

Niŋgi Qotei jojomyoqnibqa a kamba dego niŋgi jojomŋgoqnqas. O une tamo, niŋgi quiye. Tamo naŋgi naŋgo baŋ yansoqnsib jiga koboteqnub dego kere niŋgi nuŋgo are miligi gereiyoqnsib bulyoqniye. Niŋgi qudei areqalo aiye aiyelteqnub. Deqa niŋgi nuŋgo areqalo uge di olo uratoqnsib nuŋgo are miligi yansoqniye.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 2:1

Niŋgi ŋambile bunuj eb deqa niŋgi kumbra uge kalil uratiye. Gisaŋ anjam ti maqu kumbra ti are uge ti yomu anjam ti kalil di niŋgi torei uratekritiye.

1 Pita 2:18

O kaŋgal tamo, nuŋgo wau qa gate naŋgi na niŋgi taqatŋgoqnibqa niŋgi naŋgo sorgomq di sosibqa naŋgo anjam geregere dauryoqniye. Wau qa gate agi niŋgi kumbra bole eŋgeqnub qaji naŋgo anjam segi dauryoqnaib. Wau qa gate qudei niŋgi ugeugeiŋgeqnub qaji naŋgo sorgomq di dego soqniye.

1 Jon 3:18

O ijo aŋgro kalil, niŋgi quiye. Iga laŋa anjam maro na segi Kristen tamo naŋgi qalaqalainjrqom di keresai. Iga naŋgi bole qalaqalainjrsim kumbra bole bole enjroqnqom.

1 Jon 3:3

Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.