Jems 3:13 - Yesus Aqa Anjam Bole

¹³ Nuŋgo ambleq di tamo qudei naŋgi areqalo bole ti powo ti unub kio? Tamo deqaji qudei naŋgi sosibqa naŋgo walwel bole yoqnebe. Naŋgi diqoqnsib naŋgo segi ñam soqtoqnaib. Naŋgi areqalo bole ti powo ti sosib kumbra bole bole yoqnebe. Yim tamo naŋgi naŋgo kumbra di unsib marqab, “Naŋgi tamo bole.”

Jems 3:13 Iomraidhean Croise

Matyu 11:29

Niŋgi e qa geregere qalieosib ijo anjam aqa sorgomq di soqniye. Di kiyaqa? E na tamo naŋgi lawo kumbra enjroqnsim ijo segi ñam aguq ateqnum. Deqa niŋgi e qa qalieabqa iŋgi bei na niŋgi gulube eŋgwasai. Niŋgi aqaratqab.

Matyu 21:5

“Niŋgi na nuŋgo medabu waqtosib Saion qure qaji naŋgi endegsib minjriye, ‘Niŋgi uniye. Nuŋgo Mandor Koba a nuŋgoq beqnu. A are lawo na beqnu. A areqalo minjiŋ saiqoji. Deqa a donki du quraq di awoosiq beqnu.’”

Matyu 5:5

“Tamo uŋgasari naŋgo segi ñam aguq ateqnub qaji naŋgi dego tulaŋ areboleboleinjreme. Di kiyaqa? Mondoŋ Qotei na mandam kalil osim naŋgi enjrqas.

Matyu 7:24

Osiqa Yesus a olo anjam endegsi minjrej, “Tamo a ijo anjam endi qusim dauryqas di a tal gereiyo qaji tamo bul sqas. Tal gereiyo qaji tamo a areqalo powo ti deqa a na tal utru atqa osimqa tal ai sub bogeleŋosim guma koba aieleŋosim meniŋ qura iteleŋqas.

1 Korin 6:5

Niŋgi nuŋgo kumbra deqa jemaiŋgwajqa deqa e na anjam endi niŋgi merŋgonum. Nuŋgo ambleq di powo tamo bei unu kio? Soqnim Kristen was bei a was bei qa anjam soqnim powo tamo dena naŋgo anjam pegiyqa kere kio?

2 Korin 10:1

Tamo qudei naŋgi e qa yomuosib endegsib mareqnub, “Pol a iga koba na sosiqa a aqa segi ñam aguq atoqnsiqa laesoqnej. Ariya a sawa isaq di sosiqa a anjam siŋgila na neŋgreŋyosiq iga qa ŋiriŋeqnu.” Tamo qudei naŋgi e qa degsib yomueqnub. Ariya niŋgi mati Kristus aqa kumbra qa are qaliye. A aqa segi ñam aguq atoqnsiqa tamo uŋgasari naŋgi lawo kumbra osornjroqnej. Deqa niŋgi ijo anjam endeqa geregere are qaliye.

2 Korin 8:24

Deqa niŋgi na was aiyel naŋgi di kumbra bole enjroqniye. Yim Kristen tamo uŋgasari kalil naŋgi nuŋgo qalaqalaiyo kumbra di unsib marqab, “Bole.” Osib qalieqab, e nuŋgo kumbra bole qa naŋgi minjreqnum di e anjam bole minjreqnum.

Galesia 5:23

lawo na soqa, gago segi jejamu taqatosim areqalo namij dauryqa uratoqa. O was qu, iga kumbra bole deqaji yoqnqom di dal anjam na iga getentgwa keresai.

Galesia 6:1

O was qu, nuŋgo ambleq di tamo bei a une bei atim unsibqa niŋgi Qotei aqa Mondor dauryeqnub qaji niŋgi na tamo di lawo na osib aqa kumbra gereiyetiye. Ariya niŋgi geregere ŋam atsib soqniye. Satan a na niŋgi dego uneq waiŋgimqa niŋgi uloŋo uge.

Galesia 6:4

Tamo kalil naŋgi naŋgo segi segi wau geregere peleiyoqnebe. Osib naŋgo wau bole kio sai kio di naŋgi qalieqab. Tamo a degyqas di a aqa segi kumbra qa areboleboleiyqas. Ariya a aqa segi kumbra ti tamo bei aqa kumbra ti turtosim peleiyaiq.

Efesus 4:2

Osib niŋgi Kristen tamo uŋgasari naŋgo sorgomq di geregere sosibqa naŋgi lawo kumbra enjroqniye. Naŋgi niŋgi une bei eŋgibqa niŋgi kamba olo naŋgi qa urur minjiŋ oqaiq. Niŋgi olo naŋgi qalaqalainjroqnsib gulube naŋgi na niŋgi eŋgeqnub qaji di qoboiyetnjroqniye.

Filipai 1:27

Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub.

Kolosi 3:12

Qotei a niŋgi aqa segi tamo uŋgasari sqa marsiq giltŋgej deqa a na niŋgi tulaŋ qalaqalaiŋgeqnu. Deqa niŋgi kumbra endegyoqniye. Niŋgi nuŋgo Kristen was naŋgi qa duloqnsib kumbra bole bole enjroqniye. Osib niŋgi nuŋgo segi ñam tentoqnsib tamo naŋgi lawo na gereinjroqniye. Tamo qudei naŋgi na niŋgi une bei eŋgibqa niŋgi kamba olo naŋgi qa urur minjiŋ oqaiq.

1 Timoti 4:12

Tamo qudei naŋgi ni qa mareqnub, ni aŋgro kiñala. O Timoti, tamo naŋgi dena ino ñam ugetetmaib. Ni kumbra bole segi yoqnimqa Kristen tamo naŋgi na ni numoqnsib daurmoqnqab. Ino anjam maro na ti ino walwel na ti ni kumbra bole segi yoqne. Osim qalaqalaiyo kumbra dauryoqnsim Qotei qa ino areqalo siŋgila-toqnsim Qotei aqa ŋamgalaq di tamo bole une saiqoji soqne.

1 Timoti 6:11

Ariya Timoti, ni Qotei aqa tamo deqa ni kumbra uge kalil deqaji torei qoreiyosim taqat ate. Osim ni kumbra tiŋtiŋ yoqnsim Qotei aqa kumbra dauryoqnsim a qa ino areqalo siŋgilatoqnsim tamo naŋgi qalaqalainjroqne. Osim ni gulube kalil qa siŋgila na tigeloqnsim tamo uŋgasari naŋgi lawo kumbra enjroqne.

2 Timoti 2:25

Ni na Qotei aqa wau tamo naŋgi minjrimqa naŋgi lawo na tamo naŋgi Qotei aqa anjam gotraŋyeqnub qaji naŋgo areqalo tingitetnjroqnebe. Yimqa Qotei na naŋgo are bulyetnjrimqa naŋgi aqa anjam bole poinjroqnim dauryoqnqab.

Taitus 3:2

Niŋgi tamo qudei naŋgi misiliŋ anjam minjroqnaib. Osib anjam na qotoqnaib. Gaigai lawo na sosib tamo uŋgasari kalil naŋgi kumbra bole enjroqniye.” O Taitus, ni na tamo uŋgasari naŋgi anjam degsim minjroqne.

Hibru 13:5

Niŋgi silali qa mamaulŋgaiq. Niŋgi endegsib maroqniye, “Iga silali ti iŋgi ti yala eqnum di kere.” Agi Qotei na iga segi segi endegsi mergej, “E ni uratmqasai. E ni qoreimqasai dego.”

Jems 1:21

Deqa kumbra uge uge jigat kalil gaigai nuŋgoq di branteqnu qaji di niŋgi taqal waiyoqniye. Osib nuŋgo segi ñam aguq atoqnsib Qotei aqa anjam a nami nuŋgo are miligiq di atej unu qaji di niŋgi ojesoqniye. Ojesqab di Qotei a nuŋgo qunuŋ oqas.

Jems 2:18

Ariya tamo bei a endegsi marqas, “Tamo qudei naŋgi Kristus qa naŋgo areqalo siŋgilateqnub. Ariya tamo qudei naŋgi olo kumbra bole bole yeqnub.” Degsi marimqa e na kamba minjqai, “Ni Kristus qa ino areqalo siŋgilatqa maronum. Ariya ni kumbra bole bei babtosaieqnum. Deqa e kiersiy qalieqai, ni Kristus qa ino areqalo siŋgilateqnum? E qalieqa keresai. Ariya e Kristus qa ijo areqalo siŋgilatoqnsiy kumbra bole dego turtsiy yoqnqai di ni e nubsim merbqam, ‘Bole, ni Kristus qa ino areqalo bole siŋgilateqnum.’”

Jems 3:1

O ijo was qu, nuŋgo ambleq di tamo gargekoba naŋgi Qotei aqa anjam plaltqa wau ojaib. Di kiyaqa? Mondoŋ tamo peginjrqa batiamqa Qotei na iga anjam plalto tamo gago wau di geregere tenemtosim iga pegigwas.

Jems 3:17

Ariya tamo naŋgi Qotei aqaq dena areqalo bole ti powo ti eqnub qaji naŋgi kumbra tulaŋ boledamu yeqnub. Naŋgi kumbra jigat dauryosaieqnub. Naŋgi lawo na sosib tamo naŋgi jiŋga na gereinjroqnsib naŋgi qa duloqnsib kumbra bole bole enjreqnub. Naŋgi na tamo kalil naŋgi turtnjroqnsib kumbra qujai enjreqnub. Naŋgi gisaŋoqnsib laŋa babaŋ na kumbra bole dauryosaieqnub. Naŋgi bole dauryeqnub.

1 Pita 1:15

Qotei a gaigai aqa segi kumbra boleq di sosiq dauryeqnu. Deqa niŋgi dego nuŋgo jejamu osib Qotei yekritosib aqa kumbra boleq di sosib walweloqniye. Utru deqa Qotei na niŋgi aqa segi tamo sqa marsiq niŋgi metŋgej.

1 Pita 2:12

Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

1 Pita 2:9

Ariya Qotei na niŋgi giltŋgej deqa niŋgi aqa segi tamo uŋgasari tiŋtiŋ unub. Niŋgi aqa atra tamo dego sosib a ombla mandor kokba tigelejunub. Osib niŋgi aqa segi kumbra boleq di sosib walweleqnub. Niŋgi aqa segi tamo sqa marsiq giltŋgej deqa niŋgi aqa kumbra bole kalil deqa mare mare laqnub. Nami niŋgi ambruq di soqneb deqa Qotei na niŋgi metŋgonaqa niŋgi ambru uratosib suwaŋoq beleŋeb. Suwaŋ di tulaŋ bolequja.

1 Pita 3:4

Deqa niŋgi nuŋgo are miligi walatqa are qaloqniye. Are miligi aqa wala agiende. Niŋgi are bole na sosibqa tamo uŋgasari kalil naŋgi lawo na gereinjroqniye. Are miligi aqa wala di Qotei aqa ŋamgalaq di tulaŋ boledamu. Wala di ugeqa keresai.