Filipai 1:1 - Yesus Aqa Anjam Bole

¹ E Pol. Aqo Timoti wo Kristus Yesus aqa wau tamo. Aqo aiyel na anjam endi neŋgreŋyosim niŋgi Kristus Yesus aqa segi tamo uŋgasari kalil Filipai qureq di unub qaji niŋgi ti nuŋgo gate ti nuŋgo wau tamo naŋgi qa ti qariŋyonum.

Filipai 1:1 Iomraidhean Croise

Mak 13:34

Niŋgi ijo anjam endi poiŋgwajqa deqa yawo anjam bei endegsi merŋgwai. Tamo kobaquja bei a sawa isaq gilqa osimqa aqa wau tamo naŋgo baŋq di aqa tal ti iŋgi iŋgi ti uratetnjrsimqa naŋgi wau segi segi enjrqas. Osim aqa wau tamo bei minjqas, ‘Ni siraŋmeq di tigelesosim geregere ŋam atoqne.’

Jon 12:26

Tamo bei a ijo wau yqa osimqa a e daurbem. Yimqa qure e sqai qaji di ijo wau tamo a dego e ombla sqas. Tamo bei a ijo wau yoqnqas di ijo Abu na a ñam kobaquja yqas.”

Aposel 1:20

Ariya Yesus aqa tamo uŋgasari 120 naŋgi koroesonabqa Pita na olo minjrej, “Devit a nami Qotei louqa buk miligiq di Judas qa endegsi neŋgreŋyej, ‘Aqa tal laŋa sqas. Aqa tal tamo bei na olo oqasai.’ Osiqa olo Judas qa endegsi neŋgreŋyej, ‘A Kristus aqa wau ojoqnej. Ariya tamo bei na olo wau di ojqas.’ Devit a nami Judas qa degsi neŋgreŋyej.

Aposel 20:28

O ijo was niŋgi nuŋgo segi segi jejamu geregere taqatosib Qotei aqa tamo uŋgasari naŋgi dego geregere taqatnjroqniye. Qotei aqa tamo uŋgasari naŋgi kaja bul. Qotei na aqa segi Ŋiri Yesus Kristus aqa leŋ na naŋgi awainjrej. Deqa niŋgi na naŋgi geregere taqatnjroqnsibqa naŋgo mandor bole soqniye. Wau di Qotei aqa Mondor na niŋgi eŋgej.

Aposel 9:13

Onaqa Ananaias na kamba Yesus minjej, “O Tamo Koba, tamo gargekoba naŋgi e merbeqnub, ‘Sol a na Jerusalem dia Yesus aqa tamo uŋgasari naŋgi tulaŋ ugeugeinjreqnu.’ Naŋgi e degsib merbeqnub.

Rom 1:1

E Pol. E Kristus Yesus aqa wau tamo. E aqa anjam maro tamo sqajqa deqa metbej. Osiqa e Qotei aqa anjam bole marsim laqajqa deqa giltbej.

Rom 1:7

Qotei a na niŋgi tamo uŋgasari Rom qureq di unub qaji niŋgi tulaŋ qalaqalaiŋgeqnu. A na niŋgi metŋgej deqa niŋgi aqa segi tamo uŋgasari unub. O was qu, e anjam endi neŋgreŋyosim niŋgi qa qariŋyonum. Gago Abu Qotei wo Tamo Koba Yesus Kristus wo naŋgi aiyel niŋgi qa are tulaŋ boleinjrimqa niŋgi lawo na soqniye.

1 Korin 16:10

Ariya Timoti a niŋgi qa bamqa niŋgi a osib geregereiyiye. Yim a ulaqasai. A niŋgi koba na are lawo na sqas. Niŋgi quiye. Timoti a e ombla wau qujai. Aqo aiyel Tamo Koba Yesus aqa wau ojeqnum.

2 Korin 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa wau oje.” Onaqa e Qotei aqa areqalo di dauryosim agi e Yesus aqa wau ojeqnum. Niŋgi Korin qureq dia Qotei qa loueqnub qaji. Aqo gago was Timoti wo anjam endi neŋgreŋyosim niŋgi ti Qotei aqa segi tamo uŋgasari kalil Akaia sawaq di unub qaji naŋgi qa ti qariŋyonum.

Galesia 1:10

Niŋgi kiersib are qaleqnub? E anjam endi neŋgreŋyonum di mandam tamo naŋgi e qa boleqajqa kio Qotei a e qa boleqajqa kio deqa neŋgreŋyonum e? Mandam tamo naŋgi e qa boleqajqa deqa e waueqnum e? Niŋgi quiye. Mandam tamo naŋgi e qa boleqajqa deqa e waueqnum qamu e Kristus aqa wau tamo bolesai qamu.

Galesia 3:26

Niŋgi kalil Kristus Yesus qa nuŋgo areqalo siŋgilatosib a beteryejunub deqa niŋgi Qotei aqa aŋgro tiŋtiŋ unub.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Efesus 1:1

E Pol. Kristus Yesus na e qariŋbej deqa e aqa anjam marsim laqnum. Qotei aqa segi areqalo na e merbej, “Ni ijo Aŋgro Yesus aqa anjam marsim laqne.” Onaqa e Qotei aqa areqalo di dauryosim agi e Yesus aqa anjam marsim laqnum. E na anjam endi neŋgreŋyosim niŋgi tamo uŋgasari Efesus qureq di unub qaji niŋgi qa qariŋyonum. Niŋgi Qotei aqa segi tamo uŋgasari tiŋtiŋ unub. Niŋgi Kristus Yesus geregere dauryeqnub.

Efesus 1:15

E endegsi quem. Niŋgi Tamo Koba Yesus qa nuŋgo areqalo siŋgilatoqnsibqa Qotei aqa tamo uŋgasari kalil naŋgi qalaqalainjreqnub.

Efesus 6:24

Tamo kalil gago Tamo Koba Yesus Kristus qalaqalaiyqa uratosaieqnub qaji naŋgi qa Qotei a are boleiyeme.

Filipai 2:19

Tamo Koba Yesus a na e odbimqa sokiñala e Timoti qariŋyit a niŋgi qa gilqas. Gilsim olo puluosim e qa bosim nuŋgo kumbra qa e saibqas. Yim e qusiy are siŋgilatqai.

Filipai 2:5

Niŋgi Kristus Yesus aqa areqalo ojsib dauryoqniye.

Filipai 3:12

Bole, e Kristus aqa kumbra di torei dauryekritosaiunum. Ariya e gaigai kumbra di ojqajqa siŋgila na waueqnum. Nami Kristus a na e osiqa giltbej deqa bini e kamba Kristus aqa kumbra di ojqajqa siŋgila na waueqnum.

Filipai 3:3

Ariya iga Israel tamo tiŋtiŋo unum. Agi iga Qotei aqa aŋgro unum. Iga muluŋ bole aio qaji. Deqa iga Qotei aqa Mondor aqa siŋgila na Qotei qa louoqnsim Kristus Yesus aqa ñam soqteqnum. Iga qalie, tamo naŋgo jejamu na kumbra dauryqab kumbra dena naŋgi aqaryainjrqa keresai bolesai.

Filipai 3:8

E Juda naŋgo kumbra uratqa segi marosai. E mandam qa kumbra kalil dego uratqa maronum. E ijo Tamo Koba Kristus Yesus qa bole qalieonum. Ijo qalie di tulaŋ bolequja e degsi unonum. Deqa e qalieonum, mandam qa kumbra kalil di qalam jiri bul. Deqa e Kristus segi dauryqajqa are unu. E mandam qa kumbra kalil di uratekritosiy Kristus segi ojqai.

1 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi Abu Qotei wo Tamo Koba Yesus Kristus wo naŋgi aiyel taqnjrejunub. Qotei a niŋgi qa are boleiyimqa niŋgi lawo na soqniye.

1 Tesalonaika 2:2

Niŋgi qalie, iga niŋgi qa bosaisosimqa bati deqa iga Filipai qureq di sonamqa tamo naŋgi na iga jaqatiŋ egoqnsib ugeugeigoqneb. Ariya bunuqna iga nuŋgo qureq bonamqa gago Qotei na iga are siŋgilatetgej deqa iga jeu tamo naŋgi deqa ulaosai. Iga siŋgila na tigeloqnsim Qotei aqa anjam bole niŋgi merŋgoqnem.

2 Tesalonaika 1:1

Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi gago Abu Qotei wo Tamo Koba Yesus Kristus wo naŋgi aiyel taqnjrejunub.

2 Tesalonaika 1:10

Bati Qotei na nami giltej qaji di brantimqa Tamo Koba Yesus a bosim naŋgi degsim ŋolawotnjrqas. Ariya Qotei aqa segi tamo uŋgasari a qa naŋgo areqalo siŋgilateqnub qaji naŋgi kalil a mandamq aioqnim aqa siŋgila unsibqa aqa ñam soqtosib a qa tulaŋ areboleboleinjrim sqab. Niŋgi dego naŋgi ti areboleboleiŋgim sqab. Di kiyaqa? Qotei aqa anjam iga nami niŋgi merŋgoqnem qaji di niŋgi qusib nuŋgo areqaloq di siŋgilatejunub deqa.

1 Timoti 1:2

O Timoti, e na anjam endi neŋgreŋyosim ni qa qariŋyonum. E nami Yesus aqa anjam ni mermonam qusimqa ino areqaloq di siŋgilatem. Deqa ni ijo aŋgro bole bulonum. Gago Abu Qotei wo gago Tamo Koba Kristus Yesus wo naŋgi aiyel ni qa dulosib are boleinjrimqa ni are lawo na soqnime.

1 Timoti 3:8

Kristen naŋgo wau tamo naŋgi dego areqalo bole ti sosib wauoqnebe. Naŋgi medabu aiyeltaib. Naŋgi ya uysib nanarioqnaib. Naŋgi na tamo naŋgo silali yainjrqajqa are koba qalaib.

Taitus 1:1

E Pol. E Qotei aqa wau tamo. Yesus Kristus na e qariŋbej deqa e aqa anjam marsim laqnum. Tamo uŋgasari Qotei na aqa segi qa giltnjrej qaji naŋgi aqa anjam minjroqnitqa naŋgi Yesus qa naŋgo areqalo siŋgilatqajqa deqa qariŋbej. E na naŋgi aqaryainjritqa naŋgi Qotei aqa anjam qalie boleosib aqa kumbra dauryosib sqajqa deqa ti qariŋbej. Qotei aqa anjam di gisaŋ sai. Di anjam bole.

Taitus 1:7

Ni qalie, Kristen naŋgo gate naŋgi Qotei aqa wau taqateqnub. Deqa ni tamo bei a gate atqa osimqa ni aqa kumbra endeqaji unsim ate. A tamo uŋgasari naŋgo ŋamgalaq di une saiqoji unu. A aqa segi ñam soqtosiq tamo uŋgasari naŋgi siŋgila na taqatnjro-saieqnu di ni unsim a gate ate. A urur minjiŋ oqetosaieqnu. A ya uysiq nanariosaieqnu. A qoto ani tamo sai. A silali koba oqnqajqa tulaŋ arearetosaieqnu.

Filemon 1:1

O Filemon, e Pol. E Kristus Yesus aqa wau tamo deqa jeu tamo naŋgi na e ojsib tonto talq endia waibeb unum. Aqo gago was Timoti wo anjam endi neŋgreŋyosim ni qa qariŋyonum. Ni gago Kristen was bole. Ni iga koba na wau qujai.

Hibru 13:23

E niŋgi endegsi merŋgwai. Gago was Timoti a tonto talq dena uratonab oqedej. Deqa a e qa urur bqas di aqo aiyel ombla na niŋgi qa bosim nuŋgwom.

Jems 1:1

E Jems. E Qotei wo Tamo Koba Yesus Kristus wo naŋgo wau tamo. Niŋgi Israel naŋgo moma utru 12-pela naŋgo leŋ deqaji. Niŋgi nuŋgo segi segi qure utru uratosib jaraiosib sawa sawa kalil keretosib di unub. Deqa e na anjam endi neŋgreŋyosim niŋgi qa qariŋyonum. O was niŋgi kaiye.

1 Pita 2:25

Nami niŋgi kaja du du bul sosibqa nuŋgo segi areqalo na aleloqnsib laqneb. Ariya bini niŋgi olo Mandor Koba Yesus aqa areq bonub deqa a na nuŋgo qunuŋ geregere taqatejunu.

2 Pita 1:1

E Saimon Pita. E Yesus Kristus aqa wau tamo. A na e qariŋbej deqa e aqa anjam marsim laqnum. Kristus a gago Qotei. A na iga padalo sawaq dena eleŋej. Niŋgi ti iga ti gago areqalo qujai. Agi iga kalil Yesus qa gago areqalo siŋgilateqnum. Yesus Kristus a kumbra tiŋtiŋ yeqnu qaji tamo. Aqa kumbra dena niŋgi a qa nuŋgo areqalo siŋgilateqnub. Agi iga a qa gago areqalo siŋgilateqnum dego kere.

Jut 1:1

E Jut. E Yesus Kristus aqa wau tamo. E Jems aqa was. E na anjam endi neŋgreŋyosim niŋgi tamo uŋgasari Qotei na metŋgej qaji niŋgi qa qariŋyonum. Gago Abu Qotei a na niŋgi tulaŋ qalaqalaiŋgeqnu. Yesus Kristus a segi na niŋgi taqatŋgeqnu.

Uli Anjam 1:1

Nami anjam endi uliesonaqa Yesus Kristus na olo babtej. Qotei na anjam endi Yesus osoryej. Yimqa kumbra mondoŋ urur brantoqujatqas qaji di Yesus na kamba olo aqa wau tamo naŋgi osornjrqajqa deqa. Ariya Yesus a na aqa laŋ aŋgro qariŋyonaqa a e qa bosiqa anjam endi e ebej. Yim e na kamba olo aqa wau tamo qudei naŋgi minjrqajqa deqa. E Jon. E Yesus aqa wau tamo.

Uli Anjam 1:20

Bongar 7-pela ijo baŋ woq di unub qaji naŋgi ti lam 7-pela gol na gereiyo qaji naŋgi ti di ni unjronum. Di anjam ulito qaji. Aqa utru agi mermqai. Ni que. Bongar 7-pela di agi tamo uŋgasari qure 7-pelaq dia e qa loueqnub qaji naŋgo laŋ aŋgro 7-pela naŋgi. Lam 7-pela di agi tamo uŋgasari qure 7-pelaq dia e qa loueqnub qaji naŋgi.”

Uli Anjam 19:10

Laŋ aŋgro na e degsi merbonaqa e aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti tamo kalil Yesus aqa anjam qa naŋgo areqalo siŋgilateqnub qaji naŋgi ti iga koba na wau qujai. Iga kalil was. Deqa ni Qotei segi biŋi-yoqnime. Iga qalie, Qotei aqa Mondor a na qujai Qotei aqa medabu o qaji tamo naŋgi qariŋnjreqnaqa naŋgi Qotei aqa anjam marsib laqnub. Deqa naŋgi Yesus aqa ñam dego marsib laqnub.”

Uli Anjam 2:12

Yesus a na e degsi merbsiqa olo endegsi merbej, “Pergamum qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E serie olekoba tulaŋ qala uge qala aiyel ojejunum. E na anjam endi ni qa qariŋyonum.

Uli Anjam 2:8

Yesus a na e degsi merbsiqa olo endegsi merbej, “Smerna qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E segi qujai namoq di unum. E segi qujai bunuq di sqai. Nami e moiem. Bini e olo ŋambile unum. E na anjam endi ni qa qariŋyonum.

Uli Anjam 22:9

“Ni e biŋibaim! E ni bul. E ni ti ino was naŋgi ti Qotei aqa medabu o qaji tamo naŋgi ti iga koba na wau qujai. Tamo kalil anjam ni buk endia neŋgreŋyonum di dauryeqnub qaji naŋgi dego iga ti koba na wau qujai. Deqa ni Qotei segi biŋiyoqnime.”