Aposel 8:12 - Yesus Aqa Anjam Bole

¹² Ariya Qotei a tamo uŋgasari naŋgo Mandor Koba sosiq naŋgi taqatnjreqnu anjam bole di Filip a palontoqnsiqa Yesus Kristus aqa ñam mare mare laqnaqa tamo uŋgasari gargekoba naŋgi quoqnsib are bulyoqnsib Yesus qa naŋgo areqalo siŋgilatoqneb. Degyeqnabqa Filip a na naŋgi yansnjroqnej.

Aposel 8:12 Iomraidhean Croise

Matyu 28:19

Deqa niŋgi walwelosib sawa sawa kalil keretoqnsibqa tamo uŋgasari kalil naŋgi ijo anjam minjroqnsib laqniye. Minjroqnibqa naŋgi ijo anjam quoqnsib dauryoqnsibqa ijo segi aŋgro bole sqab. Deqa niŋgi na ijo Abu aqa ñam na ti e Qotei aqa Ŋiri ijo segi ñam na ti Qotei aqa Mondor Bole aqa ñam na ti naŋgi yansnjroqniye.

Luk 9:2

Siŋgila enjrsiq qariŋnjrsiqa minjrej, “Niŋgi giloqnsibqa Qotei a tamo uŋgasari naŋgo Mandor Koba sosiqa naŋgi taqatnjreqnu anjam di minjre minjre laqnsibqa naŋgo ma kobotetnjroqniye.”

Luk 9:60

Onaqa Yesus na minjej, “Uŋgum. Tamo moio qaji naŋgi segi na tamo moio qaji naŋgi subq ateleŋoqnqab. Ariya ni sawa sawaq giloqnsimqa Qotei a tamo uŋgasari naŋgo Mandor Koba sosiq naŋgi taqatnjreqnu anjam di minjroqnsim laqne.”

Aposel 1:3

Nami Yesus a jaqatiŋ koba osiq moiej. Osiqa olo subq na tigelosiqa aqa segi aŋgro naŋgoq di brantoqnsiqa maŋwa gargekoba yeqnaqa naŋgi unoqneb. Unoqnsib maroqneb, “Bole, Yesus a subq na tigelqo. A ŋambile unu.” Bati 40 qa Yesus a mandamq di sosiqa aqa aŋgro naŋgoq di brantoqnej. Brantoqnsiqa Qotei a tamo uŋgasari naŋgo Mandor Koba sosiqa naŋgi taqatnjrejunu anjam di minjroqnej.

Aposel 11:20

Ariya naŋgo ambleq di Saiprus qaji tamo qudei ti Sairini qaji tamo qudei ti soqneb. Naŋgi Antiok qureq aisib dia Grik tamo naŋgi dego Tamo Koba Yesus aqa anjam bole plaltosib minjroqneb.

Aposel 18:8

Bati deqa Qotei tal taqato tamo aqa ñam Krispus a ti tamo uŋgasari kalil a ombla tal qujaiq di soqneb qaji naŋgi ti Pol aqa anjam qusib are bulyosib Tamo Koba Yesus qa naŋgo areqalo siŋgilateb. Korin tamo uŋgasari tulaŋ gargekoba naŋgi dego Pol aqa anjam qusib Yesus qa naŋgo areqalo siŋgilatosib yanso eb.

Aposel 19:5

Onaqa naŋgi Pol aqa anjam di qusib poinjrnaqa Tamo Koba Yesus aqa ñam na yanso eb.

Aposel 2:38

Onaqa Pita na kamba minjrej, “Niŋgi segi segi are bulyosib Qotei aqaq boiye. Babqa iga Yesus Kristus aqa ñam na niŋgi yansŋgonam Qotei na nuŋgo une kalil kobotetŋgwas. Osim aqa Mondor Bole niŋgi laŋa eŋgwas. Awai saiqoji.

Aposel 2:41

Onaqa tamo uŋgasari kalil Pita aqa anjam di qusib naŋgo are miligiq di ateb qaji naŋgi yansnjreb. Bati deqa tamo uŋgasari 3,000 naŋgi Yesus qa naŋgo areqalo siŋgilatosib tamo uŋgasari nami Yesus qa naŋgo areqalo siŋgilateb qaji naŋgo miligiq aisib koba na soqneb.

Aposel 20:21

E bati gaigai Juda tamo ti Grik tamo ti naŋgi are bulyosib Qotei aqaq bosib gago Tamo Koba Yesus qa naŋgo areqalo siŋgilatqajqa deqa e siŋgila na anjam minjroqnem.

Aposel 20:25

“Deqa niŋgi quiye. E nami nuŋgo ambleq di sosimqa anjam endegsi plaltosim merŋgoqnem, ‘Qotei a nuŋgo Mandor Koba sosiq niŋgi taqatŋgeqnu.’ Ariya bini e qalieonum, e niŋgi uratŋgitqa niŋgi ijo ulatamu olo unqasai.

Aposel 28:31

Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru Pol na plaltoqnsiqa naŋgi sainjroqnej. Tamo Koba Yesus Kristus qa dego anjam plaltosiq sainjroqnej. Pol a anjam deqaji marqajqa ulaosaioqnej. A anjam deqaji mareqnaqa tamo bei na saidyosaioqnej.

Aposel 5:14

Tamo ti uŋa ti tulaŋ gargekoba Tamo Koba Yesus qa naŋgo areqalo siŋgilatoqnsib boqnsib tamo nami Yesus qa naŋgo areqalo siŋgilateb qaji naŋgo miligiq aieqnab naŋgi tulaŋ kobaoqneb.

Aposel 8:4

Ariya Yesus aqa tamo uŋgasari jaraieb qaji naŋgi sawa bei beiq giloqnsib dia Qotei aqa anjam mare mare laqneb.

Rom 10:10

Gago are miligiq na iga Yesus qa gago areqalo siŋgilateqnum deqa Qotei na iga tamo bole une saiqoji qa mergeqnu. Ariya gago medabu na iga Yesus aqa ñam soqtoqnsim boleq na mareqnum deqa Qotei na iga oqas.

1 Korin 11:11

Iga kalil Tamo Koba Yesus ombla unum deqa uŋa naŋgi naŋgo segi qa sai. Tamo naŋgi dego naŋgo segi qa sai.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

1 Pita 3:21

Dego kere niŋgi ya na yanso eb deqa Qotei a niŋgi dego eleŋej. A ya dena nuŋgo jejamu qaji jiga di yansetŋgosai. Niŋgi yanso eb bati deqa niŋgi Qotei pailyonab a na nuŋgo are miligi qaji jiga yansetŋgej. Qotei na Yesus Kristus olo subq na tigeltej gam dena a na niŋgi eleŋej.