Aposel 6:9 - Yesus Aqa Anjam Bole

⁹ Onaqa bati bei Juda tamo qudei naŋgi tigelosib Stiven ombla anjam na qotoqneb. Tamo naŋgi di Juda naŋgo Qotei tal beiq dia gaigai louoqneb. Naŋgi nami kaŋgal tamo sonabqa uratnjrnab laŋa soqneb deqa naŋgi Qotei tal dia louoqneb. Deqa Qotei tal di aqa ñam endegsib waiyeb, “Tamo Laŋaj Naŋgo Qotei Tal.” Tamo naŋgi di Stiven ombla anjam na qotoqneb. Naŋgi nami Sairini qure ti Aleksandria qure ti Silisia sawa ti Esia sawa dena ti beleŋeb.

Aposel 6:9 Iomraidhean Croise

Matyu 10:17

Niŋgi tamo naŋgi qa geregere ŋam atsib soqniye. Tamo qudei naŋgi na bosib niŋgi ojeleŋosib tamo kokba naŋgo ulatamuq dia niŋgi tigeltŋgoqnqab. Osib nuŋgo jejamuq di anjam gargekoba laŋa laŋa qametŋgoqnsib naŋgo Qotei tal miligiq dia niŋgi kumbaiŋgoqnqab.

Matyu 23:34

“Deqa niŋgi quiye. E na Qotei aqa medabu o qaji tamo naŋgi ti Qotei aqa powo tamo ti Qotei aqa dal anjam qalie tamo naŋgi ti qariŋnjroqnit nuŋgoq boqnqab. Nuŋgoq boqnibqa niŋgi na naŋgi qudei ñumoqnsib moiotnjroqnqab. Osib naŋgi qudei ŋamburbasq di gaintnjrqab. Osib naŋgi qudei ojeleŋosib nuŋgo Qotei tal miligiq dia kumbaiŋnjroqnqab. Osib naŋgi qudei teteinjribqa naŋgi jaraiosib qure bei beiq giloqnqab.

Matyu 27:32

A osi giloqnsibqa gamq dia tamo bei walwelosiq aieqnaqa a turosib ojsib Yesus aqa qawarq dena ŋamburbas yaiyosib tamo di yonabqa a kamba qoboiyosiqa Yesus gam na dauryosiq giloqnej. Tamo di aqa ñam Saimon. A Sairini qure qaji.

Mak 13:9

“Deqa niŋgi geregere ŋam atsib soqniye. Kumbra kalil di brantosaisoqnimqa tamo qudei naŋgi bosib niŋgi ijo segi aŋgro unub deqa ojeleŋosib tamo kokba naŋgo ulatamuq dia niŋgi tigeltŋgoqnqab. Yimqa naŋgi na nuŋgo jejamuq di anjam gargekoba laŋa laŋa qametŋgoqnsib naŋgo Qotei tal miligiq dia niŋgi kumbaiŋgoqnqab. Niŋgi ijo ñam ejunub deqa naŋgi na niŋgi olo joqoqnsib Rom naŋgo mandor kokba ti Rom naŋgo gate kokba ti naŋgo ulatamuq dia niŋgi tigeltŋgoqnqab. Bati deqa Qotei na niŋgi siŋgila eŋgoqnimqa niŋgi ijo anjam geregere minjroqnqab.

Luk 21:12

“Ariya kumbra kalil di brantosaisoqnibqa namoqna tamo qudei naŋgi na bosib niŋgi jeutŋgoqnsib ugeugeiŋgoqnsib ojeleŋoqnqab. Ojeleŋoqnsib Juda gate kokba naŋgo ulatamuq dia niŋgi tigeltŋgoqnibqa naŋgi na nuŋgo jejamuq di anjam gargekoba qametŋgoqnsib niŋgi tonto talq di breiŋgoqnqab. Niŋgi ijo ñam ejunub deqa naŋgi na niŋgi joqsib Rom naŋgo mandor kokba ti naŋgo gate kokba ti naŋgo ulatamuq dia niŋgi tigeltŋgoqnqab.

Aposel 11:20

Ariya naŋgo ambleq di Saiprus qaji tamo qudei ti Sairini qaji tamo qudei ti soqneb. Naŋgi Antiok qureq aisib dia Grik tamo naŋgi dego Tamo Koba Yesus aqa anjam bole plaltosib minjroqneb.

Aposel 13:1

Antiok qureq dia Yesus aqa tamo uŋgasari naŋgo ambleq di Qotei aqa medabu o qaji tamo naŋgi ti Qotei aqa anjam plalto qaji tamo naŋgi ti soqneb. Naŋgo ñam agiende. Bei Barnabas. Bei Simeon aqa ñam bei Niger. Ñam di aqa damu, “Jejamu tulu.” Bei Lusius. A Sairini qaji. Bei Manain. A nami Tamo Koba Herot ombla aŋgro sosibqa tal qujaiq di boleeb. Ariya bei Sol.

Aposel 13:45

Tamo uŋgasari tulaŋ gargekoba naŋgi Pol aqa anjam quqwajqa bosib koroonabqa Juda tamo kokba naŋgi na naŋgi unjrsibqa are minjiŋ oqetnjrnaqa Pol a anjam mareqnaqa naŋgi na aqa anjam gegentoqnsib a misiliŋyoqneb.

Aposel 15:23

Yesus aqa tamo uŋgasari Jerusalem qureq di soqneb qaji naŋgi na anjam di neŋgreŋyosib naŋgi aiyel enjrnabqa Antiok qureq osi aieb. Naŋgi na anjam endegsib neŋgreŋyeb, “O Yesus aqa tamo uŋgasari kalil Antiok qureq di unub qaji, kaiye. Iga na anjam endi neŋgreŋyosim niŋgi qa qariŋyonum. Iga nuŋgo Kristen was. Iga Yesus aqa aŋgro 12-pela iga ti Kristen gate kokba iga ti anjam endi neŋgreŋyosim niŋgi qa qariŋyonum. Sawa bei bei qaji tamo Antiok qure ti Siria sawa ti Silisia sawa ti dia unub qaji niŋgi qa anjam endi qariŋyonum.

Aposel 15:41

Naŋgi aiyel gilsib Siria sawa ti Silisia sawa ti ambleq na walweloqnsibqa qure qure kalilq dia brantoqnsibqa Yesus aqa tamo uŋgasari naŋgi itnjroqnsib naŋgi Qotei aqa anjam minjroqnsib siŋgilatnjroqneb.

Aposel 16:6

Bati bei Pol na Sailas na Timoti na naŋgi qalub walwelosib Frigia sawa ti Galesia sawa ti dia Qotei aqa anjam mare mare giloqneb. Naŋgi nami Esia sawaq dia Yesus aqa anjam marqa laqnabqa Qotei aqa Mondor na naŋgi saidnjrej.

Aposel 18:24

Onaqa bati bei Juda tamo bei aqa ñam Apolos aqa qure utru Aleksandria a bosiqa Efesus qureq di wauoqnej. A Qotei aqa anjam maro qaji tamo. A Qotei aqa anjam tulaŋ qaliedamu. Deqa a na Qotei aqa anjam kalil nami neŋgreŋyeb qaji di geregere plaltoqnej.

Aposel 19:10

Pol a wausau aiyel Efesus qureq di sosiqa Tamo Koba Yesus aqa anjam plaltosiq maroqnej. Deqa aqa anjam tulaŋ kobaonaqa tamo uŋgasari kalil Esia sawaq di soqneb qaji Juda ti Grik ti naŋgi quoqneb.

Aposel 19:26

Ariya Pol a na gago wau endi ugeteqnu. Agi a gam endena ugeteqnu. A na tamo uŋgasari gargekoba naŋgi are tigeltetnjroqnsiqa minjreqnu, ‘Tamo naŋgi baŋ na qotei gereiyo qaji di qotei bolesai. Di qotei gisaŋ.’ Yeqnaqa naŋgi aqa anjam di dauryosib qotei Artemis qoreiyeqnub. Osib naŋgi Artemis aqa atra tal sulum dego awaiyqa urateqnub. Pol aqa kumbra di niŋgi uneqnub. Aqa anjam di dego niŋgi queqnub. Aqa kumbra di Efesus qureq endia segi yosai. Esia sawa keretoqnsiqa dia dego a kumbra di yeqnu.

Aposel 21:27

Ariya bati 7-pela di koboqa laqnaqa Juda tamo qudei Esia sawaq dena beleŋeb qaji naŋgi Pol a atra tal miligiq di sonaq unsibqa bosib a ojeb. Ojsib murqumyoqnsib Juda tamo uŋgasari kalil naŋgo areqalo ugetetnjrqa marsibqa Pol aqa jejamu laŋa gisaŋyosib minjreb, “O Israel tamo uŋgasari, niŋgi kalil bosib iga aqaryaigosib Pol qalib moiqas. Pol a sawa sawa kalilq dia iga Juda qa ti Moses aqa dal anjam qa ti atra tal qa ti misiliŋ anjam mareqnaqa tamo uŋgasari kalil queqnub. Di segi sai. A dego Grik tamo qudei naŋgi joqsiqa koba na atra tal miligiq gileb. Aqa kumbra dena a na Qotei aqa atra tal di ugetej.”

Aposel 21:39

Onaqa Pol na minjej, “E tamo di sai. E Juda tamo. Ijo qure utru Tarsus. Tarsus a qure kobaquja. A Silisia sawaq di unu. A qure ñam ti. Deqa ni mare. E na tamo uŋgasari kalil naŋgi anjam bei minjrqa kere e?”

Aposel 22:19

Onaqa e na Yesus minjem, ‘O Tamo Koba, e kiyaqa Jerusalem uratqai? Juda naŋgi na ijo anjam quetbqab. Naŋgi qalie, nami e are bulyosaisosim bati deqa e naŋgo Qotei tal miligiq giloqnsimqa tamo uŋgasari ni qa naŋgo areqalo siŋgilato qaji naŋgi ojeleŋoqnsim toqoŋ na ñumoqnsim tonto talq di breinjroqnem. Nami Juda naŋgi na ino wau tamo Stiven meniŋ na qaleqnabqa e jojom di tigelosim tamo naŋgi a qaloqneb qaji naŋgo gara jugo taqatesosim endegsi minjroqnem, “Keretosib Stiven qalonub moiqo.” Ijo kumbra di Juda naŋgi qalie. Deqa naŋgi ijo anjam quetbqab.’

Aposel 22:3

“E Juda tamo. Ijo qure utru Tarsus. Tarsus a Silisia sawaq di unu. E dia ŋambabonam ijo ai wo abu wo naŋgi na e Jerusalem qureq osi bonabqa e endia tamo kobaqujaem. Kobaqujaosimqa Gamaliel aqa skul kobaq gilem. Gilsim di sonamqa a na gago moma naŋgo dal anjam kalil geregere plaltosiq osorboqnej. Deqa e Qotei aqa kumbra kalil dauryqajqa tulaŋ siŋgilaoqnem. Niŋgi bini Qotei aqa kumbra kalil dauryqajqa siŋgilaeqnub dego kere e dego dauryqajqa tulaŋ siŋgilaoqnem.

Aposel 23:34

Onaqa Feliks a anjam di sisiyosiqa Pol nenemyej, “Ni sawa qabe qaji?” Onaqa Pol na minjej, “E Silisia sawa qaji.”

Aposel 24:18

E atra tal miligiq gilsimqa une kobotqajqa kumbra Moses a nami marej qaji di dauryosim yem. Di koboonaqa e Qotei atraiyeqnamqa Juda tamo kokba naŋgi bosib e nubeb. E tamo uŋgasari gargekoba joqsim sonam naŋgi e nubosai. E qoto bei dego tigelteqnam nubosai.

Aposel 26:11

E bati gargekoba Juda naŋgo Qotei tal kalil miligiq giloqnsimqa dia Yesus aqa tamo uŋgasari naŋgi ojeleŋoqnsim ugeugeinjroqnem. E endegsi are qaloqnem, ‘E naŋgi jaqatiŋ koba enjritqa naŋgi ulaosib Yesus qoreiyosib aqa ñam misiliŋyqab.’ Degsim are qaloqnsim deqa naŋgi ugeugeinjroqnem. E naŋgi qa minjiŋ ani oqetbeqnaqa naŋgi daurnjroqnsimqa qure isa isaq giloqnsim dia naŋgi itnjroqnsim ugeugeinjroqnem.

Aposel 6:10

Naŋgi Stiven ombla anjam na qoteqnab Qotei aqa Mondor na Stiven powo koba yoqnej deqa naŋgi aqa anjam qalotqa keresai.

1 Korin 1:20

O was qu, tamo naŋgi powo ti qa mareqnub qaji naŋgi qa iga kiersi marqom? Dal anjam qalie tamo naŋgi ti tamo naŋgi anjam na qotqajqa siŋgilaeqnub qaji naŋgi qa ti iga kiersi marqom? Iga endegsi marqom. Qotei na tamo naŋgi mandam endeqa powo ti unub qaji naŋgi olo nanaritnjreqnaqa naŋgi nanari anjam segi maroqnsib laqnub.

Galesia 1:21

Ariya bunuqna e Jerusalem olo uratosim Siria sawa ti Silisia sawa ti deq gilem. Gilsim di laqnem.