Aposel 4:26 - Yesus Aqa Anjam Bole

²⁶ Sawa bei bei qaji naŋgo mandor kokba naŋgi tigelosib naŋgi Kristus qalib moiqajqa deqa qoteqnub. Mandor kokba naŋgi na Tamo Koba Qotei wo aqa Kristus wo qoto itnjrqajqa deqa koroeqnub.’

Aposel 4:26 Iomraidhean Croise

Luk 4:18

“Tamo Koba Qotei na e giltbej deqa aqa Mondor ijoq di unu. A na e giltbosiqa endegsi merbej, ‘Ni na tamo uge uge naŋgi ijo anjam bole plaltosim minjroqne.’ Agi Qotei na e qariŋbonaq mandamq aiem deqa e na tamo uŋgasari naŋgo segi une na siŋgila na ojejunu qaji naŋgi Qotei aqa anjam bole minjroqnitqa naŋgo une uratoqnqab. E na tamo ŋam qandimo unub qaji naŋgi boletnjroqnitqa naŋgi olo ŋamdamu poinjroqnqas. Tamo naŋgi naŋgo jeu tamo na ugeugeinjreqnub qaji naŋgi aqaryainjroqnitqa naŋgo gulube kobooqnqas.

Aposel 10:38

Qotei na aqa Mondor siŋgila koba ti unu qaji di Yesus yonaqa a walweloqnsiqa kumbra bole bole yoqnsiqa tamo uŋgasari Satan na ugetnjro qaji naŋgi kalil boletnjroqnej. Qotei a Yesus ombla soqneb deqa a siŋgila ti wauoqnej.

Hibru 1:9

Ni kumbra tiŋtiŋ qa tulaŋ arearetmeqnu. Ni kumbra uge qa arearetmosaieqnu. Deqa ino Qotei na ino gateq di goreŋ bilentej. Aqa kumbra dena a na ni giltmosiqa ñam kobaquja emej. Deqa ni tulaŋ areboleboleimeqnu. Ino arebolebole dena ino kadoi naŋgo arebolebole tulaŋ buŋyejunu.”

Uli Anjam 11:15

Ariya laŋ aŋgro namba 7 na aqa gul anjamonaqa tamo uŋgasari kalil laŋ qureq di unub qaji naŋgi tulaŋ koba leleŋosib endegsib marnab quem, “Gago Tamo Koba Qotei naŋgi aqa Ŋiri Kristus wo Mandor Kokba sqajqa bati agi brantqo. Deqa naŋgi aiyel bati gaigai Mandor Kokba sosib sawa sawa kalil taqatnjroqnqab.”

Uli Anjam 12:10

Onaqa olo laŋ goge dia laŋ aŋgro bei tulaŋ koba leleŋonaqa e aqa kakoro quem. A endegsi marej, “Tamo uŋgasari naŋgi padalqa laqnabqa gago Tamo Koba Qotei a na naŋgi eleŋqo. A kumbra di yqo deqa aqa siŋgila boleq dekritqo. Deqa a gago Mandor Koba unu. Gago was naŋgo ñam ugetetnjro qaji tamo Satan a na qolo ti qanam ti Qotei aqa ŋamgalaq dia naŋgo ñam ugetetnjreqnu. Satan agi waiyonub mandamq aiqo. Deqa bini Qotei aqa Ŋiri Kristus a ñam koba ti siŋgila ti ejunu.

Uli Anjam 17:17

Qotei a segi na mandor kokba naŋgi di areqalo enjrimqa naŋgi na uŋa di degsib ugeugeiyqab. Qotei a segi nami marej, ‘E na areqalo enjritqa naŋgi kumbra di yqab.’ Qotei a nami degsi marej. Deqa bati brantimqa Qotei na areqalo enjrimqa naŋgi areqalo qujaitosib naŋgo segi siŋgila ti ñam ti kalil wagme juwaŋ di yqab. Naŋgi kumbra degyibqa Qotei aqa anjam kalil nami marej qaji di aqa damu brantqas.