Aposel 3:18 - Yesus Aqa Anjam Bole

¹⁸ Nami Qotei na aqa medabu o qaji tamo kalil naŋgo medabu siŋgilatetnjreqnaqa naŋgi endegsib maroqneb, ‘Kristus agi Qotei na giltqo qaji a jaqatiŋ koba osim moiqas.’ Ariya bunuqna niŋgi na Yesus qalnab moiej. Niŋgi kumbra di yonabqa Qotei aqa medabu o qaji tamo naŋgo anjam nami maroqneb qaji di aqa damu agi brantej.

Aposel 3:18 Iomraidhean Croise

Luk 24:44

Uysiqa minjrej, “Nami e niŋgi koba na sosimqa bati deqa e niŋgi endegsim merŋgem, ‘Dal anjam kalil Moses na nami e qa neŋgreŋyej qaji di aqa damu brantqas. Anjam kalil Qotei aqa medabu o tamo naŋgi nami e qa neŋgreŋyeleŋeb qaji di aqa damu dego brantqas. Anjam kalil louqa buk miligiq di nami e qa neŋgreŋyeb qaji di dego aqa damu brantqas.’ E nami niŋgi degsi merŋgem.”

Aposel 10:43

O was qu, Qotei aqa medabu o qaji tamo kalil naŋgi nami Yesus qa endegsib maroqneb, ‘Qotei na tamo kalil Kristus qa naŋgo areqalo siŋgilateqnub qaji aqa ñam na naŋgo une kobotetnjrqas.’”

Aposel 2:23

Qotei na tamo di osiq nuŋgo baŋq di atej. A nami kumbra degyqa are qalsiq deqa anjam keretej. Onaqa niŋgi na Yesus osib tamo uge naŋgo baŋq di atnabqa naŋgi na osib ŋamburbasq di qalnab moiej. Nuŋgo kumbra dena niŋgi segi na Yesus qalsib moioteb.

Aposel 28:23

Osib olo koroqajqa bati ateb. Onaqa koro bati brantonaqa Juda tamo kokba tulaŋ gargekoba naŋgi nobqolo bosib Pol aqa talq di koroeb. Koroonabqa Pol a naŋgo ambleq di tigelosiqa anjam utru atsiq anjam gargekoba naŋgi minjreqnaq gilsiq bilaqtej. Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru plaltosiqa minjroqnej. Moses aqa dal anjam dena ti Qotei aqa medabu o tamo naŋgo anjam nami neŋgreŋyeb qaji dena ti anjam mutu quja quja eleŋoqnsiqa naŋgo are qametnjrimqa naŋgi are bulyosib Yesus qa naŋgo areqalo siŋgilatqajqa deqa siŋgila na minjroqnej.

2 Pita 1:21

Di kiyaqa? Naŋgo anjam maroqneb qaji di mandam tamo naŋgo areqalo na marosaioqneb. Mondor Bole a na naŋgo areqalo tigeltetnjreqnaqa naŋgi Qotei aqa medabu oqnsib anjam maroqneb.

Uli Anjam 19:10

Laŋ aŋgro na e degsi merbonaqa e aqa areq di siŋga pulutosim a biŋiyqa laqnamqa a na merbej, “Ni e biŋibaim! E ni bul. E ni ti tamo kalil Yesus aqa anjam qa naŋgo areqalo siŋgilateqnub qaji naŋgi ti iga koba na wau qujai. Iga kalil was. Deqa ni Qotei segi biŋi-yoqnime. Iga qalie, Qotei aqa Mondor a na qujai Qotei aqa medabu o qaji tamo naŋgi qariŋnjreqnaqa naŋgi Qotei aqa anjam marsib laqnub. Deqa naŋgi Yesus aqa ñam dego marsib laqnub.”