Aposel 2:4 - Yesus Aqa Anjam Bole

⁴ Osiqa naŋgo segi segi are miligiq aisiq meŋ bulyetnjrnaqa naŋgi kalil qure segi segi naŋgo anjam mareleŋoqneb.

Aposel 2:4 Iomraidhean Croise

Matyu 10:19

Naŋgi na niŋgi ojsib gate kokba naŋgo ulatamuq dia tigeltŋgoqnibqa niŋgi ulaosib endegsib are qalaib, ‘Iga na kamba anjam kie minjrqom?’ Niŋgi degaib. Bati deqa Qotei na nuŋgo medabu siŋgilatetŋgimqa niŋgi kamba anjam minjrqab.

Mak 16:17

Tamo naŋgi e qa naŋgo areqalo siŋgilatqab qaji naŋgi maŋwa gargekoba endegsib yoqnqab. Naŋgi ijo ñam na mondor uge uge winjroqnqab. Qotei na naŋgo meŋ bulyetnjroqnimqa naŋgi anjam bunuj maroqnqab.

Luk 1:15

Aŋgro di a ñam kobaquja osimqa Tamo Koba Qotei aqa ŋamdamuq di tamo bolequja sqas. A wain ti ya siŋgila ti uyoqnqasai. A aqa ai miligiq di soqnimqa Qotei aqa Mondor Bole na a geregere taqatesqas.

Luk 1:41

Onaqa Elisabet a Maria aqa anjam di qunaqa aŋgro Elisabet aqa meneq di soqnej qaji a anŋilej. Onaqa Qotei aqa Mondor Bole na Elisabet aqaq aisiq siŋgila yonaqa a tulaŋ koba maosiqa Maria minjej, “Qotei na kumbra tulaŋ boledamu ni emqo. Kumbra deqaji Qotei na nami uŋgasari qudei enjrosaioqnej. Aŋgro ino meneq di unu qaji a dego Qotei na kumbra tulaŋ boledamu yqo.

Luk 1:67

Onaqa Qotei aqa Mondor a Jon aqa abu Sekaraia aqaq ainaqa medabu waqtosiqa endegsi marej,

Luk 12:12

Bati deqa Qotei aqa Mondor na areqalo eŋgimqa niŋgi anjam marqab.”

Luk 21:15

Di kiyaqa? E segi na nuŋgo medabu siŋgilatetŋgsiy areqalo eŋgitqa niŋgi kamba anjam minjroqnqab. Minjroqnibqa naŋgi na anjam bei nuŋgo jejamuq di qametŋgwa yoqnib ugeinjroqnqas.

Luk 4:1

Ariya Qotei aqa Mondor a Yesus aqa jejamuq di awoonaqa a Jordan yaq dena olo pulueqnaqa Mondor na a wadau sawaq osi gilsiqa di uratonaqa bati 40 a di laqnej. Di laqnaqa Satan bosiqa Yesus a une bei atqajqa deqa marsiqa walawalaiyoqnej. Bati deqa Yesus a iŋgi uratsiqa qurieŋ ti soqnej. A laŋa soqnej. Bati 40 di koboonaqa a mamyej.

Jon 14:26

Bunuqna Aqaryaiŋgo tamo a niŋgi qa bosim siŋgilatŋgwas. A Qotei aqa Mondor Bole. Ijo Abu na a qariŋyim ijo ñam na bosim anjam kalil niŋgi merŋgekritqas. Osim nuŋgo areqalo tigeltetŋgimqa anjam kalil e nami niŋgi merŋgoqnem qaji deqa olo are qalqab.

Jon 20:22

Yesus a na aqa aŋgro naŋgi anjam degsi minjrsiqa aqa mondor puynjrsiqa minjrej, “Niŋgi Qotei aqa Mondor Bole oiye.

Aposel 1:5

Jon a ya na tamo uŋgasari naŋgi laŋa yansnjroqnej. Ariya bati qudei koboamqa e Qotei aqa Mondor na niŋgi yansŋgwai.”

Aposel 1:8

Ariya Qotei aqa Mondor nuŋgoq bamqa niŋgi siŋgila osib e qa anjam mare mare laqniye. Niŋgi Jerusalem endia, Judia sawaq dia, Samaria sawaq dia, sawa sawa kalil keretosib e qa anjam mare mare laqniye.”

Aposel 10:47

“Iga Juda tamo nami Qotei aqa Mondor em dego kere sawa bei bei qaji tamo naŋgi dego bini aqa Mondor onub. Deqa tamo bei na iga naŋgi yansnjrqajqa saidgwa keresai.”

Aposel 11:15

Kornilius a na iga anjam degsi mergonaqa e kamba anjam mareqnamqa Qotei aqa Mondor a tamo kalil Kornilius aqa talq di koroesoqneb qaji naŋgoq aiej. Qotei aqa Mondor a nami iga Juda gagoq aiej dego kere naŋgoq aiej.

Aposel 11:24

Barnabas a tamo tulaŋ bolequja. Qotei aqa Mondor aqaq di sonaqa a siŋgila ti wauoqnej. Aqa areqalo kalil Yesus qa siŋgilatsiq soqnej. Deqa a Qotei aqa anjam mareqnaqa tamo uŋgasari gargekoba naŋgi quoqnsib are bulyoqnsib Tamo Koba Yesus qa naŋgo areqalo siŋgilatoqneb.

Aposel 13:52

Bati deqa Antiok qureq dia Qotei aqa Mondor a tamo uŋgasari Yesus qa naŋgo areqalo siŋgilateb qaji naŋgo are miligiq aioqnsiqa naŋgi siŋgilatnjreqnaqa naŋgi tulaŋ areboleboleinjroqnej.

Aposel 13:9

A degsi are qalsiqa naŋgo aiyel anjam gegentoqnej. Onaqa Qotei aqa Mondor a Sol aqa ñam bei Pol aqa miligiq aisiq siŋgila yonaqa a na quñam tamo di koqyosiq minjej, “Ni Satan aqa aŋgro. Ni na kumbra bole kalil jeutsi laqnum. Ni gisa gisaŋ anjam marqajqa ino areqaloq di koba unu. Ni gisa gisaŋ kumbra yqajqa tulaŋ siŋgilaeqnum. Ni na Tamo Koba Qotei aqa anjam bole beltoqnsimqa gisa gisaŋ anjam segi mareqnum. Ino kumbra uge di ni na uratqa keresai.

Aposel 15:8

Qotei a tamo kalil naŋgo areqalo qalie. Deqa a na aqa Mondor Bole nami iga egej dego kere sawa bei bei qaji tamo naŋgi dego enjreqnu. Aqa kumbra dena a na iga osorgeqnu, a na sawa bei bei qaji tamo naŋgi dego oqajqa are qaleqnu.

Aposel 19:6

Yanso onabqa Pol a naŋgo gateq di aqa baŋ atnaqa Qotei aqa Mondor naŋgoq aisiqa meŋ bulyetnjrnaqa naŋgi qure bei bei naŋgo anjam poinjrnaqa mareleŋoqneb. Osib naŋgi Qotei aqa medabu osib anjam maroqneb.

Aposel 2:11

Iga qudei Juda tamo. Iga qudei Juda naŋgo louqa kumbra dauryeqnum. Iga qudei Krit. Iga qudei Arebia qaji. Naŋgi kiersib gago segi segi qure utru anjam na Qotei aqa wau kokba deqa mareqnab iga queqnum?”

Aposel 2:3

Onaqa Qotei aqa Mondor a ŋam puloŋ bulosiqa aisiq segi segiosiqa naŋgo gateq di awoeleŋonaq uneb.

Aposel 4:31

Naŋgi degsib Qotei pailyosib koboonaqa tal naŋgi koroesoqneb qaji di reŋgiŋyej. Onaqa Qotei aqa Mondor aisiqa naŋgi siŋgila enjrnaqa naŋgi walwelosib siŋgila na Qotei aqa anjam mare mare laqneb. Naŋgi ulaosai.

Aposel 4:8

Onaqa Qotei aqa Mondor a Pita aqa miligiq aisiq medabu siŋgilatetonaqa a na naŋgi endegsi minjrej, “O Israel gate ti tamo bole bole ti niŋgi ijo anjam endi quiye. Aqo aiyel na tamo siŋga qandamo boletem deqa niŋgi na iga osib nuŋgo ŋamgalaq di tigeltgonub. Tamo di a kiersi boleej deqa niŋgi qalieqa osib nenemgonub.

Aposel 6:3

Deqa was qu, niŋgi tamo 7-pela nuŋgo ambleq dena giltnjriye. Tamo endeqaji giltnjriye. Naŋgo kumbra tulaŋ boledamu. Qotei aqa Mondor naŋgoq di sosiqa naŋgi siŋgilatnjreqnu. Naŋgi powo koba ti unub. Tamo deqaji giltnjrsib wau enjribqa naŋgi na iŋgi jeietŋgoqnqab.

Aposel 6:5

Onaqa naŋgi kalil anjam di dauryosib tamo 7-pela giltnjreb. Bei aqa ñam Stiven. Stiven aqa areqalo kalil Yesus qa siŋgilatoqnej. A areqalo aiyeltosaioqnej. Qotei aqa Mondor a Stiven aqa are miligiq aioqnsiqa siŋgilatoqnej. Bei aqa ñam Filip. Bei Prokorus. Bei Nikanor. Bei Timon. Bei Parmenas. Bei Nikolas. Nikolas aqa qure utru Antiok. A nami Juda tamo sai. A bunuqna Jerusalem bosiqa Juda naŋgo louqa kumbra dauryosiq naŋgo miligiq aiej.

Aposel 6:8

Qotei a Stiven qa are tulaŋ boleiyoqnsiq deqa a siŋgila yeqnaqa a na tamo uŋgasari kalil Jerusalem di soqneb qaji naŋgo ŋamgalaq dia maŋwa gargekoba yoqnej.

Aposel 7:55

Bati qujai deqa Qotei aqa Mondor na Stiven siŋgila yonaqa a laŋ goge tarosiqa Qotei aqa riaŋ koba unej. Yesus a Qotei aqa baŋ woq di tigelesonaq unej.

Aposel 8:17

Deqa naŋgi aiyel na Samaria tamo uŋgasari naŋgi qa pailyoqnsibqa naŋgo gateq di baŋ ateleŋeqnab naŋgi Qotei aqa Mondor oqneb.

Aposel 9:17

Onaqa Ananaias na minjej, “Od, Tamo Koba, e ino anjam dauryqai.” Osiqa tigelosiq gilsiq Sol soqnej qaji tal di gogetosiqa Sol aqaq di baŋ atsiqa minjej, “O ijo was Sol, Tamo Koba Yesus agi gamq dia inoq di brantonaq unem qaji a na e endegsi merbej, ‘Ni gilsim Sol boletimqa aqa ŋamdamu olo poiyqas. Yimqa Qotei aqa Mondor Sol aqa are miligiq aisim a siŋgilatqas.’ Yesus na e degsi merbsiqa qariŋbqoqa agi e inoq bonum.”

Rom 15:13

O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

1 Korin 12:10

Tamo qudei naŋgi siŋgila oqnsib dena naŋgi Qotei aqa maŋwa babteleŋeqnub. Tamo qudei naŋgi siŋgila oqnsib dena naŋgi Qotei aqa medabu oqnsib anjam geregere palonteqnub. Tamo qudei naŋgi powo oqnsib dena naŋgi na mondor kalil naŋgi peginjroqnsib mareqnub, “Mondor naŋgi di bole. Mondor naŋgi di uge.” Tamo qudei naŋgi powo oqnsib dena naŋgi meŋ bulyoqnsib qure utru segi segi naŋgo anjam mareleŋeqnub. Tamo qudei naŋgi powo oqnsib dena naŋgi qure utru segi segi naŋgo anjam di quoqnsib damu poinjreqnaqa bulyeqnub.

1 Korin 13:1

Kumbra tulaŋ boledamu di agi qalaqalaiyo kumbra. E meŋ bulyosiy qure utru segi segi naŋgo anjam kio laŋ aŋgro naŋgo anjam kio maroqnqai ariya e qalaqalaiyo kumbra dauryqasai di ijo anjam maro di bolesai. Ijo anjam maro di laŋa noul bulosim qatroŋkobaqas. Osim gruma bul laŋa anjam atqas.

1 Korin 13:8

Qalaqalaiyo kumbra di koboqa keresai. Qotei na tamo qudei naŋgi wau enjreqnu deqa naŋgi aqa medabu oqnsib aqa anjam geregere palonteqnub. Ariya wau di koboqas. Qotei na tamo qudei naŋgo meŋ bulyetnjreqnu deqa naŋgi qure utru segi segi naŋgo anjam mareleŋeqnub. Kumbra di dego koboqas. Qotei na tamo qudei naŋgi qalie koba enjreqnaqa naŋgi anjam bole mareqnub. Qalie di dego koboqas.

1 Korin 14:18

E Qotei biŋiyeqnum. Di kiyaqa? E bati gargekoba meŋ bulyoqnsim qure utru bei bei naŋgo anjam mareleŋeqnum. Ijo kumbra dena e na niŋgi tulaŋ buŋgejunum.

1 Korin 14:5

Ijo areqalo agiende. Niŋgi kalil meŋ bulyoqnsib qure utru segi segi naŋgo anjam maroqnqab di bolequja. Ariya niŋgi Qotei aqa medabu oqnsib anjam palontoqnqab di tulaŋ boledamu. Niŋgi quiye. Tamo bei a meŋ bulyosim qure utru bei naŋgo anjam maroqnim tamo bei a kamba anjam di aqa damu poiyim bulyosim palontqas di kere. Anjam dena Kristen tamo uŋgasari kalil naŋgo areqalo siŋgilatetnjrqas. Ariya anjam bulyo tamo bei sqasai di meŋ bulyo tamo aqa anjam na Kristen tamo uŋgasari naŋgo areqalo siŋgilatetnjrqasai. Deqa tamo naŋgi Qotei aqa medabu oqnsib anjam palonteqnub qaji naŋgi na meŋ bulyo tamo naŋgi tulaŋ buŋnjresqab.

Efesus 5:18

Niŋgi ya uge uyoqnsib nanarioqnaib. Kumbra dena niŋgi ugeugeiŋgwas. Deqa niŋgi Qotei aqa Mondor aqa kumbra dauryoqnibqa a na niŋgi taqatŋgesqas.

Efesus 6:18

Niŋgi Qotei aqa Mondor aqa siŋgila na gaigai Qotei pailyoqniye. Niŋgi aqar ataib. Niŋgi gaigai Qotei na niŋgi aqaryaiŋgwa maroqnsib siŋgila na pailyoqniye. Niŋgi pailyo urato uge deqa niŋgi geregere ŋam atoqnsib soqniye. Sosib niŋgi gaigai Qotei na aqa segi tamo uŋgasari naŋgi aqaryainjrqajqa deqa are qaloqnsib naŋgi qa pailyoqniye.

1 Pita 1:12

Ariya Qotei a na naŋgi kamba endegsi minjrej, “Anjam niŋgi mareqnub qaji di aqa damu nuŋgo bati qa brantqasai. A bunuqna brantqas.” O was qu, Qotei na niŋgi oqajqa anjam di Qotei aqa medabu o qaji tamo naŋgi maroqneb. Ariya bunuqna Qotei na aqa Mondor Bole qariŋyonaqa laŋ goge dena aisiq Qotei aqa anjam maro tamo naŋgi siŋgilatnjroqnej. Yeqnaqa naŋgi Kristus aqa anjam bole palontoqnsib niŋgi merŋgoqneb. Qotei aqa laŋ aŋgro naŋgi dego kumbra bole kalil Qotei na niŋgi eŋgeqnu qaji deqa geregere qalieqa osib utru ŋameqnub.

2 Pita 1:21

Di kiyaqa? Naŋgo anjam maroqneb qaji di mandam tamo naŋgo areqalo na marosaioqneb. Mondor Bole a na naŋgo areqalo tigeltetnjreqnaqa naŋgi Qotei aqa medabu oqnsib anjam maroqneb.