Aposel 17:12 - Yesus Aqa Anjam Bole

¹² Deqa qure dia Juda tamo uŋgasari tulaŋ gargekoba naŋgi are bulyoqnsibqa Yesus qa naŋgo areqalo siŋgilatoqneb. Grik uŋa kokba qudei ti Grik tamo qudei ti naŋgi dego are bulyosib Yesus qa naŋgo areqalo siŋgilateb.

Aposel 17:12 Iomraidhean Croise

Mak 15:43

Onaqa bilaqtonaqa tamo bei aqa ñam Josep a Yesus aqa jejamu osim subq atqa marsiqa Pailat a nenemyqa gilej. Josep a Juda naŋgo gate bei. A Arimatea qure qaji. Aqa kumbra tulaŋ boledamu. Deqa tamo uŋgasari kalil naŋgi a qa maroqneb, “A tamo bolequja.” A endegsi are qaloqnej, “Diŋo bati qa Qotei a bosim gago Mandor Koba sqas.” A degsi are qaloqnsiq diŋo bati brantqajqa deqa tariŋosiq soqnej. Ariya Josep a Pailat aqa talq gilsiqa aqa areq di tigelej. A ulaosai. Osiqa Pailat nenemyej, “Ni e odbimqa e Yesus aqa jejamu osiy subq atqa kere e?”

Jon 7:17

Tamo bei a Qotei aqa areqalo dauryqajqa are soqnimqa anjam e mareqnum qaji endi aqa utru a geregere poiyqas. Osim qalieqas, ijo anjam endi Qotei aqaq dena bej. E ijo segi areqalo na marosaieqnum. A degsim qalieqas.

Aposel 13:46

Deqa Pol wo Barnabas wo naŋgi na Juda tamo kokba naŋgi siŋgila na endegsib minjreb, “Qotei na aqo Barnabas wo qariŋgosiq mergej, ‘Niŋgi aisib namoqna Juda naŋgo segiq di brantoqnsib ijo anjam minjroqniye.’ Qotei na iga degsi mergej deqa iga bosim Qotei aqa anjam niŋgi Juda tamo uŋgasari namoqna merŋgonum. Merŋgonumqa agi niŋgi na gago anjam qusib gotraŋyonub. Nuŋgo kumbra dena niŋgi nuŋgo segi jejamuq di une atsib niŋgi ŋambile gaigai sqajqa gam uratonub. Deqa niŋgi quiye. Bini aqo aiyel niŋgi uratŋgsimqa sawa bei bei qaji tamo naŋgoq gilsim Qotei aqa anjam naŋgi minjroqnqom.

Aposel 13:50

Onaqa Juda tamo qudei naŋgi Pol wo Barnabas wo naŋgo kumbra di unsibqa naŋgi tulaŋ minjiŋ oqetnjrnaqa uŋa kokba qudei Qotei qa louoqneb qaji naŋgi ti qure deqa gate kokba ti naŋgo are ugetetnjrnabqa naŋgi tigelosib Pol wo Barnabas wo naŋgi tulaŋ ugeugeinjrsib naŋgi aiyel qure dia sqajqa siŋgila na saidnjrsib naŋgi winjrnab gileb.

Aposel 14:1

Ariya Pol wo Barnabas wo naŋgi Aikoniam qureq di brantosib Juda naŋgo Qotei tal miligiq gileb. Gilnabqa tamo uŋgasari naŋgi koroesonabqa tigelosib Qotei aqa anjam palontosib minjroqneb. Minjreqnabqa tamo uŋgasari tulaŋ gargekoba Juda ti Grik ti naŋgo aiyel anjam dena are qametnjrnaqa naŋgi are bulyosib Yesus qa naŋgo areqalo siŋgilateb.

1 Korin 1:26

O was qu, niŋgi are qaliye. Qotei na niŋgi metŋgej bati deqa niŋgi gargekoba mandam tamo naŋgo ŋamgalaq di powo ti sosai. Niŋgi gargekoba siŋgila ti ñam ti sosai.

Efesus 5:14

Suwaŋ dena iŋgi qudei boleq ateqnaqa iŋgi di suwaŋobuleqnu. Agi anjam bei endegsi unu, “Ni tamo ŋeiejunum qaji ni olo subq na tigel. Yim Kristus a na ni suwaŋ emqas.”

Jems 1:10

Ariya tamo bei a ñoro koba ti unu. Di dego uŋgum. Qotei na aqa ñam olo aguq atimqa a dego arebolebolei-yem. Di kiyaqa? Tamo naŋgi ñoro koba koroiyqajqa arearetnjreqnu qaji naŋgi balamtamo aqa so bul mandamq endia sokiñalaysib moreŋqab.

Jems 1:21

Deqa kumbra uge uge jigat kalil gaigai nuŋgoq di branteqnu qaji di niŋgi taqal waiyoqniye. Osib nuŋgo segi ñam aguq atoqnsib Qotei aqa anjam a nami nuŋgo are miligiq di atej unu qaji di niŋgi ojesoqniye. Ojesqab di Qotei a nuŋgo qunuŋ oqas.