Aposel 16:23 - Yesus Aqa Anjam Bole

²³ Naŋgi kumbaiŋnjrogargekobatosib tonto talq di breinjrsib tonto tal taqato tamo a minjeb, “Ni na naŋgi aiyel siŋgila na tontnjrsim geregere taqatnjresoqne.”

Aposel 16:23 Iomraidhean Croise

Matyu 26:48

Tamo Yesus ojsim jeu tamo naŋgo baŋq di atqas qaji a nami naŋgi ti anjam gereiyosib minjrej, “E na tamo kundoqyqai agide. A ojsib osib giliye.”

Luk 21:12

“Ariya kumbra kalil di brantosaisoqnibqa namoqna tamo qudei naŋgi na bosib niŋgi jeutŋgoqnsib ugeugeiŋgoqnsib ojeleŋoqnqab. Ojeleŋoqnsib Juda gate kokba naŋgo ulatamuq dia niŋgi tigeltŋgoqnibqa naŋgi na nuŋgo jejamuq di anjam gargekoba qametŋgoqnsib niŋgi tonto talq di breiŋgoqnqab. Niŋgi ijo ñam ejunub deqa naŋgi na niŋgi joqsib Rom naŋgo mandor kokba ti naŋgo gate kokba ti naŋgo ulatamuq dia niŋgi tigeltŋgoqnqab.

Aposel 12:18

Ariya nebeonaqa qaja tamo tonto tal taqatesoqneb qaji naŋgi ŋam ateb Pita a tonto talq di sosai degsi unsibqa naŋgi tulaŋ ulaugetosib are koba qaloqnsib maroqneb, “Pita a qabitqo?”

Aposel 12:4

Herot a Pita ojsiqa tonto talq di waiyej. Osiqa qaja tamo 16-pela naŋgi minjrnaqa naŋgi tonto talq dia Pita taqatesoqneb. Herot a endegsi are qalej, “Juda naŋgo yori bati koba ñam Pasova di koboamqa e Pita osiy Juda tamo uŋgasari naŋgo ulatamuq dia tigeltqai.”

Aposel 16:27

Onaqa tonto tal taqato tamo a tigelosiqa ŋam atej siraŋme kalil waqeleŋesonaq unej. Deqa a are qalej, “Tonto tamo kalil naŋgi jaraionub.” Degsi are qalsiqa aqa serie osiq aqa segi jejamu qalqa laqnaqa Pol a maosiq minjej, “Ni ino segi jejamu qalaim. Iga kalil endi unum. Iga jaraiosai.”

Aposel 16:36

Onaqa a naŋgo anjam di qusiqa gilsiq Pol minjej, “Gate kokba naŋgi na qaja tamo qudei naŋgi qariŋnjronub bosib e endegsi merbonub, ‘Ni na naŋgi aiyel oqeq atim naŋgi gileb.’ Naŋgi e degsi merbonub. Deqa niŋgi aiyel are lawo na giliye.”

Aposel 5:23

“Iga ainum tonto tal siraŋme qandimesonaq unonum. Tal taqato tamo naŋgi aŋ ti siraŋmeq di tigelenab. Ariya iga siraŋ waqtosim miligiq gilonum iga tamo bei unosai.”

Aposel 8:3

Sol a dego tamo uŋgasari Yesus qa naŋgo areqalo siŋgilateb qaji naŋgi qa tulaŋ minjiŋ oqnaqa ugeugeinjroqnej. Deqa a naŋgo segi segi talq giloqnsiqa tamo ti uŋa ti ojeleŋoqnsiqa naŋgi joqsi aioqnsiqa tonto talq di breinjroqnej.

Aposel 9:2

“Ni anjam bei neŋgreŋyosim ebimqa e anjam di osiy aisiy Damaskus qureq dia Juda tamo kokba naŋgi enjritqa naŋgi na anjam di sisiyosib e odbibqa tamo uŋgasari Damaskus qureq dia Yesus aqa gam dauryeqnub qaji naŋgi tontnjrsiy joqsiy Jerusalem bqai.”

2 Korin 11:23

Naŋgi mareqnub, “Iga Kristus aqa wau tamo.” Ariya e nanari tamo bulosiy anjam endegsi marqai. E dego Kristus aqa wau tamo. Agi e na tamo naŋgi di tulaŋ buŋnjrsimqa ŋes na ti jaqatiŋ na ti Kristus aqa wau ojeqnum. Bati gargekoba jeu tamo naŋgi na e tonto talq di waiboqneb. Osib e lubogargekobatoqneb. Gulube dena e na tamo naŋgi di tulaŋ buŋnjroqnem. Bati gargekoba e moiqa jojomem.

2 Korin 6:5

Gago jeu tamo naŋgi toqoŋ na iga lugoqnsib tonto talq di breigeqnub. Osib murqumyoqnsib iga qa anjam uge uge mareleŋeqnub. Iga gaigai ŋes na ti jaqatiŋ na ti waukobaeqnum. Iga geregere ŋeiosaieqnum. Iga bati gaigai mam ti laqnum.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Efesus 4:1

E Pol. E Tamo Koba Yesus aqa wau ojeqnum deqa e tonto talq endi unum. Qotei na niŋgi a dauryqa osiq metŋgej deqa e na nuŋgo are tigeltetŋgitqa niŋgi kumbra a tulaŋ areareteqnu qaji di dauryosib walweloqniye.

2 Timoti 2:9

E anjam bole di mareqnum deqa jeu tamo naŋgi na e tamo uge bul nuboqnsib e gulube koba ebeqnub. Deqa naŋgi na e ojsib tonto talq endia waibeb unum. Ariya naŋgi Qotei aqa anjam getentqa keresai.

Filemon 1:9

Deqa e ni anjam tulaŋ siŋgila na mermqasai. Aqo ombla qalaqalaiyo kumbra dauryeqnum deqa e ni lawo na anjam mermqai. E Pol. E Kristus Yesus aqa anjam marsim laqnum qaji tamo. E Kristus aqa wau di ojeqnum deqa jeu tamo naŋgi na e ojsib tonto talq endia waibeb unum.

Uli Anjam 1:9

E nuŋgo was Jon. E ti niŋgi ti Yesus aqa tamo unum deqa iga kalil gulube koba qoboiyoqnsim jaqatiŋ eleŋeqnum. Qotei a gago Mandor Koba sosiq iga taqatgeqnu. Deqa iga kalil koba na siŋgila na tigeloqnsimqa gulube qoboiyejunum. E Qotei aqa anjam ti Yesus aqa anjam ti palontsim laqnem deqa jeu tamo naŋgi na e taqal waibosib nui ñam Patmos endia e ateb unum.

Uli Anjam 2:10

Bunuqna ni jaqatiŋ koba oqam. Ni deqa ulaaim. Ni que. Satan a na niŋgi qudei ojeleŋosim tonto talq breiŋgwas. Breiŋgimqa niŋgi ijo ñam geregere ojqab kio ijo ñam uratosib uloŋqab kio di Satan a nuŋgo areqalo unsim qalieqajqa deqa niŋgi tonto talq breiŋgwas. Niŋgi bati 10-pela gulube ti jaqatiŋ ti sqab. Ariya niŋgi e qa nuŋgo areqalo siŋgilatosib soqniye. Sosib sosib gilsib jeu tamo naŋgi na niŋgi liŋgib moreŋqab. Amqa e na niŋgi ŋambile eŋgwai. Ŋambile di nuŋgo awai boledamu.