Aposel 14:1 - Yesus Aqa Anjam Bole

¹ Ariya Pol wo Barnabas wo naŋgi Aikoniam qureq di brantosib Juda naŋgo Qotei tal miligiq gileb. Gilnabqa tamo uŋgasari naŋgi koroesonabqa tigelosib Qotei aqa anjam palontosib minjroqneb. Minjreqnabqa tamo uŋgasari tulaŋ gargekoba Juda ti Grik ti naŋgo aiyel anjam dena are qametnjrnaqa naŋgi are bulyosib Yesus qa naŋgo areqalo siŋgilateb.

Aposel 14:1 Iomraidhean Croise

Mak 7:26

Uŋa di a Grik qaji. A Juda uŋa sai. A Siria sawaq dia ŋambabej. A Finisia qure qaji. A na Yesus waiŋyoqnsiqa minjoqnej, “Ni na mondor uge di wiyimqa a na ijo aŋgro uratosim ulaŋqas.”

Jon 12:20

Ariya tamo uŋgasari Qotei louqa marsib yori bati di unqajqa Jerusalem aieleŋeb qaji naŋgo ambleq di Grik tamo qudei soqneb.

Jon 7:35

Onaqa Juda naŋgi segi segi maroqneb, “Yesus a qabitimqa iga a unqasai? A Grik naŋgo sawaq gilqas kio? Gilsim dia Juda tamo qudei naŋgi koba na sosib Grik naŋgi anjam minjroqnqas kio?

Aposel 11:21

Naŋgi Tamo Koba Yesus aqa siŋgila ti wauoqnsib anjam mareqnab tamo uŋgasari tulaŋ gargekoba naŋgi Tamo Koba Yesus qa naŋgo areqalo siŋgilatoqnsib are bulyoqneb.

Aposel 13:43

Bati deqa tamo uŋgasari tulaŋ gargekoba naŋgi Pol wo Barnabas wo naŋgo anjam qusib naŋgi aiyel daurnjreb. Juda tamo ti sawa bei bei qaji tamo nami Juda naŋgo louqa kumbra dauryoqneb qaji naŋgi ti Pol wo Barnabas wo naŋgi daurnjreb. Deqa naŋgi aiyel na naŋgo are siŋgilatetnjroqnsib endegsib minjroqneb, “Qotei a niŋgi qa are tulaŋ boleiyeqnu deqa niŋgi aqa areqalo geregere dauryoqnsib soqniye.”

Aposel 13:46

Deqa Pol wo Barnabas wo naŋgi na Juda tamo kokba naŋgi siŋgila na endegsib minjreb, “Qotei na aqo Barnabas wo qariŋgosiq mergej, ‘Niŋgi aisib namoqna Juda naŋgo segiq di brantoqnsib ijo anjam minjroqniye.’ Qotei na iga degsi mergej deqa iga bosim Qotei aqa anjam niŋgi Juda tamo uŋgasari namoqna merŋgonum. Merŋgonumqa agi niŋgi na gago anjam qusib gotraŋyonub. Nuŋgo kumbra dena niŋgi nuŋgo segi jejamuq di une atsib niŋgi ŋambile gaigai sqajqa gam uratonub. Deqa niŋgi quiye. Bini aqo aiyel niŋgi uratŋgsimqa sawa bei bei qaji tamo naŋgoq gilsim Qotei aqa anjam naŋgi minjroqnqom.

Aposel 13:5

Brantosib Salamis qureq di tiryosib dena naŋgi siŋga na walwelosib nui di aqa qure kalilq dia brantoqnsibqa Juda naŋgo Qotei tal miligiq giloqnsib Qotei aqa anjam minjre minjre laqneb. Jon a dego naŋgi koba na gilsib Qotei aqa anjam na naŋgi aqaryainjroqnej.

Aposel 13:51

Deqa naŋgi aiyel naŋgo siŋga tumbrum butuyosib Antiok qure uratosib Aikoniam qureq aieb. Naŋgo aiyel kumbra di Antiok tamo uŋgasari naŋgi unsib naŋgo segi une qalieqajqa deqa naŋgi aiyel kumbra di yeb.

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 14:2

Ariya Juda tamo qudei Pol wo Barnabas wo naŋgo anjam quqwa urateb qaji naŋgi na sawa bei bei qaji tamo naŋgo are ugetetnjrnabqa naŋgi tamo uŋgasari Yesus qa naŋgo areqalo siŋgilateb qaji naŋgi qa ugeosib misiliŋyoqneb.

Aposel 14:21

Naŋgi aiyel Derbe qureq di sosib Yesus aqa anjam bole plalteqnabqa tamo uŋgasari tulaŋ gargekoba naŋgi qusib are bulyoqnsib Yesus qa naŋgo areqalo siŋgilatoqneb. Bunuqna naŋgi aiyel olo puluosib qure kalil naŋgi nami laqneb qaji deq olo giloqneb. Listra qure ti Aikoniam qure ti Antiok qure ti deq giloqneb.

Aposel 16:1

Onaqa bati bei naŋgi aiyel walwelosib Derbe qureq di branteb. Dena tigelosib Listra qureq gileb. Dia tamo bei soqnej aqa ñam Timoti. A Yesus qa aqa areqalo siŋgilatej qaji. Timoti aqa aniqali a Juda qaji uŋa. A dego Yesus qa aqa areqalo siŋgilatej qaji. Timoti aqa siqali a Grik qaji tamo.

Aposel 16:2

Listra qure ti Aikoniam qure ti dia Yesus aqa tamo uŋgasari naŋgi maroqneb, “Timoti a tamo bolequja.”

Aposel 17:12

Deqa qure dia Juda tamo uŋgasari tulaŋ gargekoba naŋgi are bulyoqnsibqa Yesus qa naŋgo areqalo siŋgilatoqneb. Grik uŋa kokba qudei ti Grik tamo qudei ti naŋgi dego are bulyosib Yesus qa naŋgo areqalo siŋgilateb.

Aposel 17:17

Ariya a Atens qureq di sosiqa a bati gaigai Juda naŋgo Qotei tal miligiq giloqnsiqa Juda ti Grik tamo uŋgasari Qotei qa louoqneb qaji naŋgi ti Yesus aqa anjam plaltosiq minjroqnej. Atens naŋgo koro sawaq dia dego a bati gaigai tigeloqnsiqa tamo uŋgasari dia soqneb qaji naŋgi Yesus aqa anjam plaltosiq minjroqnej.

Aposel 17:4

Pol a na naŋgi anjam degsi minjreqnaqa Juda tamo uŋgasari qudei naŋgi aqa anjam di qusib poinjrnaqa Yesus qa naŋgo areqalo siŋgilatosib Pol wo Sailas wo naŋgi daurnjreb. Grik tamo uŋgasari gargekoba Qotei qa louoqneb qaji naŋgi ti uŋa kokba qudei ti naŋgi dego Yesus qa naŋgo areqalo siŋgilatosib Pol wo Sailas wo naŋgi daurnjreb.

Aposel 18:4

Yori bati gaigai Pol a Juda naŋgo Qotei tal miligiq giloqnsiqa Juda ti Grik ti naŋgi Yesus aqa anjam plaltosiq minjroqnej. Aqa anjam dena naŋgo are qametnjrimqa naŋgi Yesus qa naŋgo areqalo siŋgilatqajqa deqa anjam minjroqnej.

Aposel 18:8

Bati deqa Qotei tal taqato tamo aqa ñam Krispus a ti tamo uŋgasari kalil a ombla tal qujaiq di soqneb qaji naŋgi ti Pol aqa anjam qusib are bulyosib Tamo Koba Yesus qa naŋgo areqalo siŋgilateb. Korin tamo uŋgasari tulaŋ gargekoba naŋgi dego Pol aqa anjam qusib Yesus qa naŋgo areqalo siŋgilatosib yanso eb.

Aposel 19:10

Pol a wausau aiyel Efesus qureq di sosiqa Tamo Koba Yesus aqa anjam plaltosiq maroqnej. Deqa aqa anjam tulaŋ kobaonaqa tamo uŋgasari kalil Esia sawaq di soqneb qaji Juda ti Grik ti naŋgi quoqneb.

Aposel 19:17

Onaqa tamo uŋgasari kalil Juda ti Grik ti Efesus qureq di soqneb qaji naŋgi deqa qusibqa tulaŋ ulaugeteb. Osib naŋgi Tamo Koba Yesus aqa ñam tulaŋ koba soqteb.

Aposel 19:8

Pol a bai qalub qure dia sosiqa Juda naŋgo Qotei tal miligiq giloqnsiqa siŋgila na Qotei aqa anjam minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru naŋgi geregere poinjrqajqa deqa Pol a anjam siŋgila na minjroqnej.

Aposel 20:21

E bati gaigai Juda tamo ti Grik tamo ti naŋgi are bulyosib Qotei aqaq bosib gago Tamo Koba Yesus qa naŋgo areqalo siŋgilatqajqa deqa e siŋgila na anjam minjroqnem.

Rom 1:16

E Yesus aqa anjam bole di marqajqa jemaibosaieqnu. Di kiyaqa? Anjam bole di Qotei aqa siŋgila ti unu. Siŋgila dena Qotei na tamo kalil Yesus qa naŋgo areqalo siŋgilateqnub qaji naŋgi padalqa gamq dena olo eleŋeqnu. A namoqna Juda naŋgi eleŋej. Ariya a na olo tamo uŋgasari sawa bei beiq di unub qaji naŋgi dego eleŋqas.

Rom 10:12

Iga Juda tamo ti Grik tamo ti iga kalil kerekere unum. Tamo Koba Kristus a gago kalil qa Tamo Koba. Deqa a na tamo kalil Kristus metoqnsib pailyeqnub qaji naŋgi tulaŋ geregereinjreqnu.

Galesia 2:3

Bati deqa Taitus a e ombla soqnej. Taitus a Grik qaji tamo. Ariya Kristen gate naŋgi e na Taitus osiy muluŋ waiyqa merbosai.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Kolosi 3:11

Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

2 Timoti 3:11

Ni qalie, Antiok qure ti Aikoniam qure ti Listra qure ti dia jeu tamo naŋgi na e kumbra uge uge ebeqnabqa e jaqatiŋ koba oqnem. Qure dia kumbra uge kalil e qa brantoqnej qaji di ni qalie. Ariya bati deqa Tamo Koba Qotei na e aqaryaiboqnsiqa gulube kalilq dena e oqnsiq taqal atoqnej. Deqa bini e bole unum.