Aposel 13:14 - Yesus Aqa Anjam Bole

^14-15 Onaqa Pol wo Barnabas wo naŋgi Perga qure uratosib siŋga na walwelosib Pisidia sawaq gilsib Antiok qureq di branteb. Brantosib di sonabqa yori batiej. Deqa naŋgi Juda naŋgo Qotei tal miligiq gilsib awoonabqa Juda gate kokba naŋgi tigelosib Moses aqa dal anjam ti Qotei aqa medabu o qaji tamo naŋgo anjam ti sisiyoqneb. Sisiyosib koboonaqa naŋgi na Pol wo Barnabas wo minjreb, “O gago was aiyel, niŋgi gagoq bonub deqa tamo uŋgasari naŋgo are siŋgilatetnjrqajqa anjam bei soqnimqa tigelosib mariye.”

Aposel 13:14 Iomraidhean Croise

Luk 4:16

Onaqa Yesus a dena walwelosiq Nasaret qureq aiej. Di aqa segi qure utru. A dia boleej. Aisiq dia aqa kumbra gaigai yoqnej qaji di dauryosiqa yori bationaqa Juda naŋgo Qotei tal miligiq gilsiqa Qotei aqa anjam sisiyqa osiq tigelej.

Aposel 13:42

Onaqa lou koboonaqa Pol wo Barnabas wo naŋgi Qotei talq dena oqedonabqa tamo uŋgasari naŋgi na minjreb, “Yori bati bei qa niŋgi bosib anjam deqaji olo mergibqa iga quqwom.”

Aposel 13:44

Onaqa yori bati bei qa tamo uŋgasari kalil Antiok qureq di soqneb qaji naŋgi Qotei aqa anjam quqwa marsibqa bosib Qotei talq di koroeb.

Aposel 13:46

Deqa Pol wo Barnabas wo naŋgi na Juda tamo kokba naŋgi siŋgila na endegsib minjreb, “Qotei na aqo Barnabas wo qariŋgosiq mergej, ‘Niŋgi aisib namoqna Juda naŋgo segiq di brantoqnsib ijo anjam minjroqniye.’ Qotei na iga degsi mergej deqa iga bosim Qotei aqa anjam niŋgi Juda tamo uŋgasari namoqna merŋgonum. Merŋgonumqa agi niŋgi na gago anjam qusib gotraŋyonub. Nuŋgo kumbra dena niŋgi nuŋgo segi jejamuq di une atsib niŋgi ŋambile gaigai sqajqa gam uratonub. Deqa niŋgi quiye. Bini aqo aiyel niŋgi uratŋgsimqa sawa bei bei qaji tamo naŋgoq gilsim Qotei aqa anjam naŋgi minjroqnqom.

Aposel 13:5

Brantosib Salamis qureq di tiryosib dena naŋgi siŋga na walwelosib nui di aqa qure kalilq dia brantoqnsibqa Juda naŋgo Qotei tal miligiq giloqnsib Qotei aqa anjam minjre minjre laqneb. Jon a dego naŋgi koba na gilsib Qotei aqa anjam na naŋgi aqaryainjroqnej.

Aposel 14:19

Onaqa Juda tamo qudei naŋgi Antiok dena ti Aikoniam dena ti walwelosib Listra qureq beb. Bosib dia tamo uŋgasari naŋgo are ugetetnjrnabqa naŋgi tigelosib Pol meniŋ na qaleb. Osib a giriŋyosib gilsib qure qalaq di ateb. Naŋgi are qaleb, “A moiqo.”

Aposel 16:13

Onaqa Juda naŋgo yori bationaqa iga qure polomq aisim ya qalaq di brantem. Iga are qalem, “Ya qalaq di Juda naŋgo pailyo sawa unu kio?” Degosim aiem. Aisim uŋgasari qudei dia koroesonab naŋgi itnjrsimqa naŋgi koba na awoosim Qotei aqa anjam minjroqnem.

Aposel 17:2

Deqa Pol aqa kumbra gaigai yoqnej qaji di dauryosiqa Qotei tal miligiq gilej. Gilsiqa yori bati qalub qa Qotei aqa anjam nami neŋgreŋyeb qaji di plaltoqnsiqa Juda tamo uŋgasari naŋgi minjroqnej.

Aposel 18:4

Yori bati gaigai Pol a Juda naŋgo Qotei tal miligiq giloqnsiqa Juda ti Grik ti naŋgi Yesus aqa anjam plaltosiq minjroqnej. Aqa anjam dena naŋgo are qametnjrimqa naŋgi Yesus qa naŋgo areqalo siŋgilatqajqa deqa anjam minjroqnej.

Aposel 19:8

Pol a bai qalub qure dia sosiqa Juda naŋgo Qotei tal miligiq giloqnsiqa siŋgila na Qotei aqa anjam minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu anjam di aqa utru naŋgi geregere poinjrqajqa deqa Pol a anjam siŋgila na minjroqnej.

2 Timoti 3:11

Ni qalie, Antiok qure ti Aikoniam qure ti Listra qure ti dia jeu tamo naŋgi na e kumbra uge uge ebeqnabqa e jaqatiŋ koba oqnem. Qure dia kumbra uge kalil e qa brantoqnej qaji di ni qalie. Ariya bati deqa Tamo Koba Qotei na e aqaryaiboqnsiqa gulube kalilq dena e oqnsiq taqal atoqnej. Deqa bini e bole unum.