Aposel 11:18 - Yesus Aqa Anjam Bole

¹⁸ Onaqa Juda tamo Pita ŋiriŋteb qaji naŋgi aqa anjam di qusibqa naŋgo ŋiriŋ koboej. Osib naŋgi Qotei aqa ñam soqtosib mareb, “Bole, Qotei a sawa bei bei qaji tamo naŋgi dego are bulyetnjreqnu. Deqa naŋgi dego ŋambile gaigai sqab.”

Aposel 11:18 Iomraidhean Croise

Matyu 9:8

Onaqa tamo uŋgasari kalil naŋgi Yesus aqa siŋgila di unsibqa naŋgi tulaŋ ulaosib Qotei aqa ñam soqteb. Di kiyaqa? Qotei na siŋgila kobaquja Yesus yej deqa.

Aposel 11:1

Yesus aqa aŋgro 12-pela naŋgi ti Kristen was kalil Judia sawaq di soqneb qaji naŋgi ti anjam endegsib queb, “Sawa bei bei qaji tamo naŋgi dego are bulyosib Qotei aqa anjam dauryeqnub.”

Aposel 14:27

Aisib Yesus aqa tamo uŋgasari naŋgi koroinjrsibqa naŋgi aiyel qure qureq dia laqnsibqa Qotei na naŋgi aqaryainjreqnaqa naŋgi kumbra kalil yoqneb qaji deqa naŋgi sainjroqneb. Sainjroqnsib endegsib minjroqneb, “Qotei na sawa bei bei qaji tamo naŋgi dego gam waqtetnjreqnaqa naŋgi are bulyoqnsib Yesus qa naŋgo areqalo siŋgilateqnub.”

Aposel 15:3

Naŋgi degsib anjam keretosib naŋgi qariŋnjrnab aieb. Naŋgi aioqnsibqa Fonisia sawa ti Samaria sawa ti dia Kristen tamo uŋgasari naŋgi itnjroqnsibqa endegsib minjroqneb, “Qotei na sawa bei bei qaji tamo uŋgasari naŋgi dego are bulyetnjreqnu.” Degsib minjreqnab naŋgi quoqnsib tulaŋ areboleboleinjroqnej.

Aposel 20:21

E bati gaigai Juda tamo ti Grik tamo ti naŋgi are bulyosib Qotei aqaq bosib gago Tamo Koba Yesus qa naŋgo areqalo siŋgilatqajqa deqa e siŋgila na anjam minjroqnem.

Aposel 21:20

Onaqa naŋgi Pol aqa anjam di qusibqa naŋgi tulaŋ areboleboleinjrnaqa Qotei aqa ñam soqteb. Osib Pol minjeb, “O gago was Pol, ni qalie, Juda tamo uŋgasari tulaŋ gargekoba naŋgi are bulyoqnsibqa Yesus qa naŋgo areqalo siŋgilateqnub. Naŋgi Moses aqa dal anjam dauryqajqa dego tulaŋ siŋgilaeqnub.

Aposel 3:19

“Deqa niŋgi quiye. Niŋgi na nuŋgo une kalil torei uratosib are bulyosib Qotei aqaq babqa a na nuŋgo une kalil kobotetŋgimqa niŋgi aqa aŋgro bole sqab.

Aposel 3:26

Osiqa bunuqna aqa wau tamo Yesus osiqa qariŋyonaq namoqna nuŋgoq aiej. Yesus a nuŋgoq aisim niŋgi kalil aqaryaiŋgimqa niŋgi nuŋgo kumbra uge kalil uratqajqa deqa are qalsiq Yesus qariŋyonaq nuŋgoq aiej.”

Aposel 5:31

Yesus qujai di Qotei na laŋ qureq osi oqsiqa aqa baŋ woq di awotej. Deqa Yesus a gago Tamo Koba. A na qujai iga eleŋamqa iga padalqasai. Yesus qujai dena iga Israel tamo uŋgasari are bulyetgsim gago une kobotetgwas.

Rom 9:30

Deqa iga kiersi marqom? Iga endegsi marqom. Sawa bei bei qaji naŋgi tamo bole une saiqoji sqajqa gam ŋamosaioqneb. Ariya naŋgi gam iteb. Gam agiende. Naŋgi Yesus qa naŋgo areqalo siŋgilateb gam dena naŋgi tamo bole une saiqoji soqneb.

2 Korin 3:18

Deqa gago ulatamu olo kabuesosai. Iga kalil Tamo Koba Qotei aqa riaŋ di ya jeqiloq di unobuleqnam riaŋ di gagoq di tulaŋ kobaqujaeqnaqa dena iga Qotei a segi buloqnsim unum. Tamo Koba Yesus a na kumbra di iga egeqnu. Tamo Koba a segi Qotei aqa Mondor Bole.

2 Korin 7:10

Are gulube ti jemai ti Qotei na tamo uŋgasari naŋgi enjreqnu qaji dena naŋgi are bulyeqnub. Deqa Qotei na naŋgi olo eleŋeqnu. Deqa iga are bulyqajqa kumbra qa are ugeigwasai. Ariya are gulube ti jemai ti mandam tamo naŋgo kumbra na branteqnu qaji dena naŋgi moio qa gam tureqnub.

Galesia 1:24

O was qu, Qotei na e are bulyetbej anjam di naŋgi quoqnsib deqa naŋgi tulaŋ areboleboleinjrnaqa Qotei aqa ñam soqtoqneb.