Aposel 10:22 - Yesus Aqa Anjam Bole

²² Onaqa naŋgi na minjeb, “Qaja tamo gate aqa ñam Kornilius a tamo bolequja. A bati gaigai Qotei qa ulaoqnsiqa aqa anjam dauryeqnu. Juda tamo uŋgasari kalil naŋgi a qa mareqnub, ‘A tamo bolequja.’ Ni que. Ya bilaq Qotei aqa laŋ aŋgro bei Kornilius aqaq di brantosiq minjej, ‘Ni tamo qudei naŋgi qariŋnjrimqa aisib Pita minjib ino talq bosim anjam bei mermim quqwam.’”

Aposel 10:22 Iomraidhean Croise

Matyu 1:19

Ariya Maria aqa gumbuluŋ Josep a endegsi quej, “Maria a gumaŋqo.” A degsi qusiq deqa a Maria uratqa marej. Ariya Josep aqa kumbra tulaŋ boledamu deqa a endegsi are qalej, “E lumu na Maria uratqai. E boleq na uratqasai. Maria a jemaiyo uge.”

Matyu 2:12

Osib naŋgi tal uratosib olo puluqa laqnabqa Qotei a ŋeiobilqei na minjrej, “Niŋgi olo Herot aqaq di brantaib.” Degsi minjrnaqa naŋgi gam bei dauryosib naŋgo segi qure utruq gileb.

Mak 6:20

Di kiyaqa? Herot a Jon qa ulaosiq a geregere taqatoqnej deqa. Herot a qalieej, “Jon a tamo bole. Aqa jejamuq di une bei saiqoji. A Qotei aqa segi aŋgro.” Herot a degsi qalieosiq deqa Jon taqatoqnsiqa aqa anjam quoqnej. Quoqnsiqa are koba qaloqnej. A Jon aqa anjam quqwajqa arearetoqnej. Deqa aqa ŋauqali na Jon qalqa minjeqnaq a na saidyoqnej.

Mak 8:38

Tamo uŋgasari bini bati endeqa unub qaji naŋgi Qotei torei qoreiyoqnsib une atsib laqnub. Deqa tamo bei a ijo ñam qa ti ijo anjam qa ti jemaiyqas di mondoŋ e Tamo Aŋgro e ijo Abu aqa riaŋ na ti ijo Abu aqa laŋ aŋgro naŋgo riaŋ na ti bosiyqa e kamba tamo di aqa ñam metqajqa jemaibqas.”

Luk 2:25

Jerusalem dia tamo bei soqnej aqa ñam Simion. Aqa so tulaŋ boledamu. A Qotei aqa sorgomq di geregere sosiqa aqa dal anjam kalil dauryoqnej. Qotei aqa Mondor na a siŋgilatonaq soqnej. Qotei na Kristus qariŋyim bosim Israel tamo uŋgasari naŋgo are boletetnjrqajqa deqa Simion a are qalsiq tariŋosiq soqnej.

Luk 23:50

Tamo bei aqa ñam Josep a dego tigelosiqa Yesus a ŋamburbasq di gaiŋosiq moinaq unej. Josep a Juda naŋgo gate bei. A Arimatea qure qaji. Arimatea qure a Judia sawaq di unu. Josep a tamo bolequja. Aqa kumbra tulaŋ boledamu.

Luk 9:26

Tamo bei a ijo ñam qa ti ijo anjam marqajqa ti jemaiyqas di mondoŋ e Tamo Aŋgro ijo segi riaŋ na ijo Abu aqa riaŋ na ti ijo Abu aqa laŋ aŋgro naŋgo riaŋ na ti bosiyqa e kamba tamo di aqa ñam metqajqa jemaibqas.

Jon 13:20

Niŋgi quiye. E bole merŋgwai. Tamo bei na tamo bei e qariŋyonum qaji a oqas di a e dego oqas. A e oqas di a na ijo Abu e qariŋbej qaji a dego oqas.”

Jon 17:20

“E ijo aŋgro 11-pela naŋgi qa segi ni pailmosai. Bunuqna ijo aŋgro 11-pela naŋgi ijo anjam mare mare laqnibqa tamo uŋgasari gargekoba naŋgi naŋgo anjam quoqnsib e qa naŋgo areqalo siŋgilatoqnqab. E naŋgi qa dego ni pailmonum.

Jon 17:8

Anjam kalil ni na e merboqnem qaji di e na kamba naŋgi minjreqnam naŋgi quoqnsib endegsi poinjrej, e nami ni ombla sosim dena bem. Deqa naŋgi e qa naŋgo areqalo siŋgilatosib qalieeb, ni na e qariŋbonam bem.

Jon 5:24

“Niŋgi quiye. E bole merŋgwai. Tamo a ijo anjam qusim ijo Abu e qariŋbej qaji a qa aqa areqalo siŋgilatqas di a ŋambile gaigai sqas. Deqa e aqa une qa a pegiyqasai. A moio gam uratqo deqa a olo ŋambile unu.

Jon 6:63

Qotei aqa Mondor a segi na tamo uŋgasari naŋgi ŋambile enjreqnu. Nuŋgo segi jejamu na niŋgi aqaryaiŋwa keresai. Ijo anjam kalil e na merŋgeqnum qaji di Mondor aqa anjam. Anjam dena niŋgi ŋambile oqab.

Jon 6:68

Onaqa Saimon Pita na minjej, “O Tamo Koba, iga ni uratmosim tamo yai aqaq gilqom? Ni segi qujai ŋambile gaigai sqajqa anjam mergeqnum.

Aposel 10:2

Kornilius a Qotei aqa kumbra dauryoqnej qaji. Deqa tamo uŋgasari kalil a ombla tal qujaiq di soqneb qaji naŋgi a ti bati gaigai Qotei aqa sorgomq di soqneb. Juda tamo uŋgasari naŋgi iŋgi iŋgi saiinjreqnaqa a naŋgi silali na aqaryainjroqnej. A bati gaigai Qotei pailyoqnej.

Aposel 10:21

Onaqa Pita a tal uratosiq mandamq aisiq naŋgo areq di brantosiq minjrej, “Niŋgi tamo ŋamonub qaji agi e. Niŋgi kiyaqa bonub?”

Aposel 10:30

Onaqa Kornilius na Pita minjej, “Ya ya endi bati qolqe gilqo seŋ bati kere endego seŋ keliŋtonaqa e pailyeqnamqa tamo bei gara tulaŋ qat jigsiqa bosiq ijo ulatamuq di tigelosiqa merbej, ‘O Kornilius, Qotei a gaigai ino pail queqnu. Juda tamo uŋgasari naŋgi iŋgi iŋgi saiinjreqnaqa ni na naŋgi aqaryainjreqnum. Ino kumbra di Qotei a unoqnsiq deqa a ni qa tulaŋ areboleboleiyeqnu.

Aposel 10:33

Laŋ aŋgro na e degsi merbonaqa e urur tigelosim tamo qudei naŋgi qariŋnjrnam Jopa qureq aisib inoq di branteb. Brantonabqa ni na naŋgi daurnjrsim agi ijo talq bonum. Deqa e ni qa tulaŋ areboleboleibqo. Endego iga kalil endia koroosimqa Qotei aqa ŋamgalaq di awejunum. Deqa anjam kalil Tamo Koba Qotei na ni mermej qaji di mergimqa iga quqwom.” Kornilius na Pita degsi minjej.

Aposel 10:6

A tamo bei wagme aqa jegara na gara gereiyo qaji aqa ñam Saimon aqa talq di unu. Aqa tal agi alile qalaq di unu.”

Aposel 22:12

“Damaskus qureq dia tamo bei soqnej aqa ñam Ananaias. A Qotei aqa dal anjam dauryo qaji tamo. Juda tamo uŋgasari kalil Damaskus qureq di soqneb qaji naŋgi a qa maroqneb, ‘A tamo bolequja.’

Aposel 24:15

Mondoŋ Qotei na tamo bole ti tamo uge ti naŋgi olo subq na tigeltnjrqas. Qotei qujai deqa e ijo areqalo siŋgilatoqnsim subq na tigelo bati qa tariŋoqnsim unum. Juda tamo kokba naŋgi dego Qotei qa naŋgo areqalo siŋgilatoqnsib subq na tigelo bati qa tariŋoqnsib unub.

Aposel 6:3

Deqa was qu, niŋgi tamo 7-pela nuŋgo ambleq dena giltnjriye. Tamo endeqaji giltnjriye. Naŋgo kumbra tulaŋ boledamu. Qotei aqa Mondor naŋgoq di sosiqa naŋgi siŋgilatnjreqnu. Naŋgi powo koba ti unub. Tamo deqaji giltnjrsib wau enjribqa naŋgi na iŋgi jeietŋgoqnqab.

Rom 1:17

Anjam bole dena Qotei na aqa kumbra iga osorgej. Aqa kumbra agiende. A na iga tamo bole une saiqoji qa mergej. Iga Yesus qa gago areqalo siŋgilatem dena a na iga tamo bole une saiqoji qa mergej. Di kiyaqa? Iga Yesus qa gago areqalo siŋgilatqom gam dena qujai iga Qotei aqa ŋamgalaq di tamo bole une saiqoji sqom. Agi Qotei aqa anjam bei nami endegsib neŋgreŋyeb unu, “Qotei na tamo uŋgasari a qa naŋgo areqalo siŋgilateqnub qaji naŋgi tamo bole une saiqoji qa minjrqas. Yim deqa naŋgi ŋambile gaigai sqab.”

2 Korin 5:18

Kumbra kalil di Qotei a iga qa are qalsiq babtej. Nami iga Qotei ti jeu soqnem. Ariya Qotei a olo Kristus aqa ñam na jeu kobotej deqa bini iga a ombla are qujaitosim unum. Jeu kobotqajqa wau di Qotei na iga egej deqa iga waueqnum.

1 Timoti 3:7

Tamo bei a tamo uŋgasari Qotei qaliesai qaji naŋgo ŋamgalaq di ñam bole ti sqas di ni unsim a gate ate. A ñam bole ti sqasai di a gate sqa keresai. Di kiyaqa? Tamo qudei naŋgi a qa anjam uge marib gam dena Satan na a ugeugeiyqas.

Hibru 10:38

Ariya ijo segi tamo uŋgasari tiŋtiŋo naŋgi e qa naŋgo areqalo siŋgilatqab di naŋgi ŋambile sqab. Ariya naŋgi olo bunuqna e qoreibqab di e naŋgi qa areboleboleibqasai.”

Hibru 11:2

Agi tamo uŋgasari nami soqneb qaji naŋgi Qotei qa naŋgo areqalo siŋgilatoqneb deqa Qotei a naŋgi qa tulaŋ areboleboleiyeqnaqa maroqnej, “Naŋgi tamo bole.”

Hibru 12:23

Tamo naŋgi Qotei qa korooqnsib loueqnub qaji naŋgi qa dego niŋgi beleŋeb. Tamo naŋgi di Qotei aqa segi aŋgro matu tiŋtiŋ. Naŋgo ñam agi Qotei a laŋ qureq dia neŋgreŋyej unu. Niŋgi Qotei qa ti tamo naŋgi Qotei aqa segi kumbra tiŋtiŋ dauryeqnub qaji naŋgo qunuŋ qa ti beleŋeb. Tamo naŋgi di Qotei na une saiqoji qa minjrej deqa naŋgi tulaŋ bole unub. Niŋgi Qotei agi mondoŋ tamo uŋgasari kalil naŋgo une qa peginjrqas qaji a qa beleŋeb.

3 Jon 1:12

Tamo kalil naŋgi Demitrius a qa mareqnub, aqa kumbra bole. Qotei aqa anjam bole a dego tamo bulosiqa Demitrius aqa kumbra bole qa mareqnu. E dego a qa mareqnum, aqa kumbra bole. Ni qalie, ijo anjam di bole.

Uli Anjam 14:10

Wain di Qotei aqa minjiŋ siŋgila koba. Qotei a nami wain di ya ti bulyosai. Deqa tamo bei aqa lanjaqsi baŋqsi wagme juwaŋ aqa toqor oqas di aqa une deqa Qotei na a pegiyosimqa aqa segi minjiŋ gambaŋq di qamsim anaiyim uyqas. Uysimqa Qotei aqa laŋ aŋgro naŋgi Kaja Du ombla na naŋgo ŋamgalaq dia ŋamyuo na ti meniŋ yuo na ti jaqatiŋ koba oqnsim sqas.