1 Timoti 4:1 - Yesus Aqa Anjam Bole

¹ Qotei aqa Mondor a anjam endegsi babtej. Mondoŋ diŋo bati jojomoqnimqa tamo qudei naŋgi Kristus qa naŋgo areqalo siŋgilatqa uratqab. Di kiyaqa? Naŋgi gisaŋ mondor ti mondor uge uge ti naŋgo anjam qusib dauryqab deqa.

1 Timoti 4:1 Iomraidhean Croise

Matyu 18:7

“Mandamq endia tamo qudei naŋgi na tamo qudei naŋgi kumbra ugeq breinjreqnub. Bole, kumbra di gaigai brantoqnqas. Ariya tamo naŋgi kumbra di yeqnub qaji naŋgi tulaŋ padalougetqab.

Luk 17:1

Yesus a anjam degsi marsiq kobotosiqa aqa aŋgro naŋgi endegsi minjrej, “Kumbra qudei na tamo uŋgasari naŋgi uneq breinjroqnqas. Bole, kumbra di brantoqnqas. Ariya tamo a kumbra di babtoqnqas qaji a tulaŋ padalougetqas.

Jon 16:13

Ariya anjam bole qa Mondor a bosimqa nuŋgo areqalo gereiyetŋgimqa niŋgi anjam bole kalil poiŋgekritqas. A aqa segi areqalo na anjam merŋgwasai. A anjam quoqnsim di segi niŋgi merŋgoqnqas. Osim kumbra mondoŋ branteleŋqas qaji di dego ubtsim merŋgoqnqas.

Aposel 13:2

Bati bei naŋgi Tamo Koba Qotei qa louoqnsib qurieŋosib iŋgi ti ya ti uratsib sonabqa Qotei aqa Mondor na naŋgi minjrej, “Niŋgi na Barnabas wo Sol wo naŋgi aiyel giltnjrsib qariŋnjribqa e na wau enjro qaji di naŋgi gilsib wauoqnqab.”

Aposel 17:18

Bati bei Grik naŋgo qalie tamo Atens qureq di soqneb qaji naŋgi Pol ombla anjam na qoteb. Naŋgi qudei qalie tamo koba Epikurias aqa skulq dena qalie eb. Naŋgi qudei skul bei aqa ñam Stoik dena qalie eb. Pol a na naŋgi endegsi minjroqnej, “Yesus a moisiq olo subq na tigelej. Deqa mondoŋ tamo kalil naŋgi dego subq na olo tigelqab.” Pol a na naŋgi degsi minjroqnej deqa naŋgi Pol ombla anjam na qotoqnsib segi segi maroqneb, “Pol a anjam laŋa laŋa mareqnu. A anjam kie mergwajqa bqo?” Ariya tamo qudei naŋgi endegsib maroqneb, “Pol a qure bei naŋgo qotei qa mergeqnu kio?”

Aposel 20:23

E qure qureq dia laqnamqa Qotei aqa Mondor na e endegsi merbeqnu, ‘Ni Jerusalem dia tonto talq aisim gulube koba oqam.’ Deqa e qalieonum, kumbra di ijoq bqas.

Aposel 21:11

Bosiqa Pol aqa alalag yaiyosiqa qombilgej. Qombil aqa utru agiende. Agabus na Pol aqa alalag osiq aqa segi baŋ ti siŋga ti alalag dena qosej. Osiqa mergej, “Qotei aqa Mondor na e endegsi merbqo, ‘Jerusalem qureq dia Juda naŋgi na tamo alalag endi tigeqnu qaji aqa siŋga ti baŋ ti endegsib qosqab. Osib tamo di osi gilsib sawa bei bei qaji tamo naŋgo baŋq di atibqa naŋgi na a ugeugeiyqab.’” Dena qombil osorgej.

Aposel 28:25

Naŋgi degsib areqalo aiyeltosib tigelosib jaraiqa laqnabqa Pol na anjam qujai endegsi minjrej, “Mondor Bole a nami Qotei aqa medabu o qaji tamo Aisaia aqa medabuq na gago moma naŋgi anjam minjrej. A anjam bole endegsi minjrej,

1 Korin 10:20

E endegsi maronum. Sulum atrainjro qaji iŋgi iŋgi di sawa bei bei qaji tamo naŋgi na oqnsib mondor uge naŋgi atrainjreqnub. Naŋgi Qotei bole atraiyosaieqnub. Deqa was qu, niŋgi iŋgi iŋgi di uratiye. Uratqasai di niŋgi mondor uge uge naŋgi ti beterqab.

1 Korin 11:19

Di kiyaqa? E endegsi are qalonum. Niŋgi pupoabqa dena niŋgi poiŋgwas, nuŋgo ambleq di tamo yai naŋgi Qotei aqa kumbra bole tiŋtiŋ dauryeqnub.

1 Korin 12:11

Ariya Mondor qujai dena wau kalil di tamo naŋgi enjreqnu. A aqa segi areqalo na tamo segi segi naŋgi kumbra enjreqnaqa naŋgi wau di ojeqnub.

1 Korin 2:10

O was qu, anjam di nami uliesonaqa Qotei na aqa Mondor aqa wau na babtosiq mergej. Mondor a iŋgi iŋgi kalil qa qalie. Qotei aqa areqalo kalil uliejunu qaji di Mondor a qalie.

2 Korin 11:3

Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum.

Kolosi 2:18

Tamo qudei naŋgi na niŋgi endegsib merŋgwab, “Niŋgi nuŋgo segi ñam tentoqnsib olo laŋ aŋgro naŋgi qa louoqniye. Iga ŋeiobilqei na kumbra di unsim deqa niŋgi degsi merŋgonum.” O was qu, niŋgi tamo di naŋgo anjam quetnjraib. Tamo deqaji naŋgi naŋgo areqalo namij dauryoqnsib endegsib mareqnub, “Iga powo bole ti unum.”

2 Timoti 3:13

Tamo uge uge naŋgi ti gisaŋ tamo naŋgi ti brantoqnsib tamo uŋgasari naŋgi gisa gisaŋnjroqnqab. Deqa Satan a na kamba dego gisaŋ tamo naŋgi di gisa gisaŋnjroqnqas. Yim naŋgo kumbra di tulaŋ ugedamuqas.

2 Timoti 4:4

Deqa naŋgi anjam bole quqwajqa uratoqnsib-qa laŋa sa anjam quqwajqa dab atoqnqab.

Jems 3:15

Niŋgi degyqab di niŋgi powo bole ti sqasai. Niŋgi powo uge ti sqab. Powo deqaji laŋ goge dena bosai. Di mandam qaji powo. Di gago areqalo namij aqa powo. Powo di aqa abu Satan a segi.

1 Pita 1:20

Tulaŋ nami Qotei a mandam atosaisosiqa a Kristus qa qalieosiqa a giltej. Kristus na niŋgi awaiŋgwajqa deqa marsiq a giltej. Ariya bini bati endeqa diŋo bati jojomqo deqa Qotei a niŋgi qa osiqa Kristus qariŋyonaq bej.

2 Pita 2:1

Bole, nami tamo qudei naŋgi Israel naŋgo ambleq di tigelosib naŋgo segi ñam soqtoqnsib naŋgi segi Qotei aqa medabu o qaji tamo degsib maroqnsib wauoqneb. Ariya naŋgi Qotei aqa medabu o qaji tamo sai. Naŋgi gisaŋ tamo. Dego kere bunuqna tamo deqaji qudei naŋgi lumu na bosib nuŋgo ambleq di dego tigelosib naŋgi segi Qotei aqa medabu o qaji tamo degsib maroqnsib gisaŋ anjam gargekoba niŋgi merŋgoqnqab. Yimqa niŋgi qudei qusib bole edegosib naŋgi daurnjrsib Qotei aqa anjam olo uratosib uloŋqab. Tamo naŋgi di Tamo Koba Yesus na awainjrej. Ariya naŋgi na olo a qoreiyqab. Osib deqa mondoŋ naŋgi urur padalqab.

2 Pita 3:3

Ariya ijo anjam kobaquja bei unu. E na niŋgi merŋgit poiŋgem. Mondoŋ diŋo bati jojomoqnimqa meqe meqem tamo naŋgi bosib naŋgo segi areqalo uge uge dauryosib misiliŋ anjam endegsib merŋgoqnqab,

1 Jon 2:18

O ijo aŋgro, diŋo bati jojomqo. Niŋgi nami queb, Kristus aqa jeu tamo Satan a bqas. Bini Kristus aqa jeu tamo gargekoba naŋgi agi bosib unub. Deqa iga qalieonum, diŋo bati jojomqo.

1 Jon 4:6

Ariya iga Qotei aqa tamo. Deqa tamo naŋgi Qotei qa qalieonub qaji naŋgi gago anjam queqnub. Ariya tamo naŋgi Qotei qa qaliesai qaji naŋgi gago anjam quosaieqnub. Kumbra dena iga anjam bole qa Mondor ti gisaŋ mondor ti qalieonum.

Jut 1:18

Agi naŋgi anjam endegsib merŋgoqneb, “Mondoŋ diŋo bati jojomamqa meqe meqem tamo naŋgi boqnsib Qotei qoreiyoqnsib naŋgo segi areqalo uge uge dauryoqnqab.”

Jut 1:4

Jeu tamo qudei naŋgi uliosib nuŋgo ambleq aieb. Qotei a nami naŋgi qa marej, “Mondoŋ e na naŋgo une qa peginjrsiy padaltnjrqai.” Es was qu, jeu tamo naŋgi di Qotei qoreiyeqnub. Qotei a iga qa are tulaŋ boleiyeqnu aqa anjam di jeu tamo naŋgi dena olo bulbulyoqnsib mareqnub, “Qotei a iga qa laŋa are boleiyeqnu. Deqa uŋgum, iga kumbra uge uge yoqnqom.” Degsib maroqnsib gago Gate Koba Yesus Kristus dego qoreiyeqnub.

Uli Anjam 13:14

A na maŋwa di wagme juwaŋ e nami unem qaji aqa ŋamgalaq di yoqnsiqa kumbra dena tamo uŋgasari mandamq di unub qaji naŋgi gisa gisaŋnjroqnej. Osiqa naŋgi endegsi minjroqnej, “Niŋgi na sulum gereiyiye. Gereiyqa osibqa wagme juwaŋ aqa ulatamu bul gereiyosib aqa ñam soqtoqniye.” Wagme juwaŋ di agi nami serie na qalnab moisiq olo tigelosiqa ŋambile soqnej.

Uli Anjam 16:14

Mondor uge qalub dena maŋwa uge uge siŋgila kokba yoqnsibqa mandor kokba sawa sawa kalil taqate-junub qaji naŋgoq giloqnsib minjreqnub, “Niŋgi na nuŋgo qaja tamo kalil koroinjrsib minjribqa tamo uŋgasari naŋgo une qa peginjrqa batiamqa naŋgi qoteleŋqab.” Naŋgi degsib minjreqnub. Qotqajqa bati di agi Qotei siŋgila koba ti unu qaji aqa bati koba.

Uli Anjam 18:2

Onaqa a tulaŋ koba leleŋosiqa endegsi marej, “Babilon qure kobaquja a tulaŋ padalougetqo! Od, a tulaŋ padalougetqo! Babilon qure di mondor uge uge kalil naŋgo so sawa. Mondor uge naŋgi ti qebari jigat naŋgi ti qebari uge kalil dego qure dia unub.

Uli Anjam 18:23

Lam inoq di olo puloŋqasai. Inoq di tamo bei na olo uŋa baŋ ojqasai. Uŋa na tamo baŋ ojqasai. Deqa naŋgo aiyel anjam inoq di bunu quqwasai. Nami ino silali qa wauo qaji tamo naŋgi tamo kokba soqneb. Ariya bini naŋgi koboonub. O Babilon, ni na gumaniŋ kumbra gargekoba yoqnem. Kumbra dena ni na tamo uŋgasari sawa sawa kalilq di unub qaji naŋgi gisa gisaŋnjroqnem.”

Uli Anjam 19:20

Ariya tamo hos quraq di awesoqnej qaji a na wagme juwaŋ wo Satan aqa gisaŋ anjam maro tamo wo naŋgi aiyel ŋambile sonab ojsiqa wainjrnaq ŋamyuoq aieb. Ŋamyuoq dia meniŋ kalil yusiq ñaŋgaeqnu. Satan aqa gisaŋ anjam maro tamo di nami wagme juwaŋ aqa ŋamgalaq dia maŋwa tulaŋ kokba yoqnej. Aqa kumbra dena a na tamo uŋgasari wagme juwaŋ aqa toqor osib aqa sulum biŋiyoqneb qaji naŋgi gisa gisaŋnjroqnej.

Uli Anjam 2:11

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di a moio bunu qaji turqasai. Moio dena a ugetqa keresai. Sai bole sai.’ O Jon, ni anjam degsim neŋgreŋyosim Smerna naŋgo laŋ aŋgro aqaq qariŋye.”

Uli Anjam 2:17

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di e na laŋ qure qa iŋgi uliejunu qaji di anaiyit uyqas. Meniŋ qat dego yqai. Osiy meniŋ quraq di ñam bunuj neŋgreŋyqai. Ñam di tamo bei a qalieqasai. Tamo meniŋ oqas qaji a segi qalieqas.’ O Jon, ni anjam degsi neŋgreŋyosim Pergamum naŋgo laŋ aŋgro aqaq qariŋye.”

Uli Anjam 2:29

Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsi neŋgreŋyosim Taiataira naŋgo laŋ aŋgro aqaq qariŋye.”

Uli Anjam 2:7

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di e na laŋ qure qa ŋam gei osiy anaiyit a uysim dena ŋambile gaigai sqas. Ŋam di agi Qotei aqa laŋ qureq di unu.’ O Jon, ni anjam degsim neŋgreŋyosim Efesus naŋgo laŋ aŋgro aqaq qariŋye.”

Uli Anjam 20:10

Satan a na naŋgi walawalainjroqnej deqa Qotei na a waiyim ŋamyuoq aiqas. Ŋamyuoq dia meniŋ kalil yusiq ñaŋgaeqnu. Wagme juwaŋ wo Satan aqa gisaŋ anjam maro tamo wo naŋgi aiyel nami ŋamyuoq di wainjreb unub. Deqa Satan a dego Qotei na waiyim ŋamyuoq aisim naŋgi aiyel koba na bati gaigai qolo ti qanam ti ŋamyuoq dia jaqatiŋ oqnsib sqab.

Uli Anjam 20:8

Oqedosimqa sawa sawa kalilq giloqnsimqa tamo uŋgasari naŋgi gisa gisaŋnjroqnqas. Tamo uŋgasari naŋgi di Gok sawa qaji ti Magok sawa qaji ti. Satan a na naŋgi koroinjrimqa qoto qa gilqab. Naŋgi tulaŋ gargekoba. Naŋgi ulul bul sisiyqa keresai.

Uli Anjam 3:13

Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsim neŋgreŋyosim Filadelfia naŋgo laŋ aŋgro aqaq qariŋye.”

Uli Anjam 3:22

Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsim neŋgreŋyosim Laodisia naŋgo laŋ aŋgro aqaq qariŋye.” Yesus a na e degsi merbej.

Uli Anjam 3:6

Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem.’ O Jon, ni anjam degsi neŋgreŋyosim Sardis naŋgo laŋ aŋgro aqaq qariŋye.”

Uli Anjam 9:20

Naŋgi ugeugeinjreqnabqa tamo uŋgasari qudei gulube qalub dena ñumosai qaji naŋgi di unsibqa naŋgi deqa are bulyosai. Naŋgo baŋ na sulum gereiyeleŋeb qaji di dego naŋgi uratosai. Naŋgi na mondor uge uge ti qotei gisa gisaŋ naŋgi ti sulum kalil naŋgo baŋ na gereiyeleŋeb qaji naŋgi ti di biŋinjroqneb. Naŋgo kumbra uge di naŋgi uratosaioqneb. Sulum di gol na silva na bras na meniŋ na ŋamtaŋ na ti gereiyeleŋeb. Sulum di qunuŋ saiqoji. Deqa naŋgi ŋam atqa keresai. Naŋgi anjam quqwa keresai. Naŋgi walwelqa keresai.