1 Timoti 1:5 - Yesus Aqa Anjam Bole

⁵ Ariya Qotei na iga aqa wau ojqajqa mergeqnu. Aqa wau agiende. Iga na tamo uŋgasari naŋgi Yesus aqa anjam minjroqnim naŋgi a qa naŋgo areqalo siŋgilatosib dena naŋgi Qotei aqa ŋamgalaq di une saiqoji sqab. Sosib kumbra dena naŋgo areqalo tigeltetnjroqnim naŋgi qalaqalaiyo kumbra dauryoqnqab.

1 Timoti 1:5 Iomraidhean Croise

Matyu 12:35

Tamo bole naŋgo are miligiq di areqalo bole bole gargekoba unu. Deqa naŋgi kumbra bole bole yeqnub. Ariya tamo uge naŋgo are miligiq di areqalo uge uge gargekoba unu. Deqa naŋgi kumbra uge uge yeqnub.

Matyu 5:8

“Tamo uŋgasari naŋgo are miligiq di jiga bei saiqoji unub qaji naŋgi dego tulaŋ areboleboleinjreme. Di kiyaqa? Mondoŋ naŋgi Qotei aqa ulatamu unqab.

Aposel 15:9

Qotei a gam bei na iga Juda tamo uŋgasari eleŋosim olo gam bei na sawa bei bei qaji tamo naŋgi eleŋqasai. Naŋgi ti iga ti koba na Yesus qa gago areqalo siŋgilatqom gam dena qujai Qotei na iga are bulyetgosim gago une kobotetgwas.

Aposel 23:1

Onaqa Pol a Juda tamo kokba naŋgi koqnjrsiqa endegsi minjrej, “O ijo was niŋgi quiye. E nami Qotei aqa ŋamgalaq dia kumbra bole bole yoqnem agi bini yoqnsim unum. Deqa e are gulube saiqoji.”

Aposel 24:16

E subq na tigelo bati qa tariŋeqnum deqa e bati gaigai ijo segi so geregere taqatoqnsimqa Qotei aqa ŋamdamuq dia, tamo uŋgasari kalil naŋgo ŋamdamuq dia kumbra bole bole yoqnsim laqnum.

Rom 10:4

Iga qalie, Kristus na Moses aqa dal anjam kalil keretekritej. Aqa kumbra dena tamo uŋgasari kalil a qa naŋgo areqalo siŋgilateqnub qaji naŋgi Qotei aqa ŋamgalaq di tamo bole une saiqoji sqab.

Rom 12:9

O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

Rom 14:15

Deqa a iŋgi di jigat qa marimqa niŋgi iŋgi di osib uyib niŋgsimqa a are gulubeiyqas. Nuŋgo kumbra dena niŋgi qalaqalaiyo kumbra uratosib deqa niŋgi aqa are gulubetetqab. Kristus a nuŋgo was deqa osiq moiej deqa niŋgi nuŋgo iŋgi uyo qa osib a ugeugeiyaib.

Rom 9:1

E Kristus aqa tamo deqa e niŋgi anjam bole merŋgwai. E niŋgi gisaŋ anjam merŋgwasai. Qotei aqa Mondor na e areqalo ebeqnu deqa e qalieonum, ijo anjam endi bole.

1 Korin 13:1

Kumbra tulaŋ boledamu di agi qalaqalaiyo kumbra. E meŋ bulyosiy qure utru segi segi naŋgo anjam kio laŋ aŋgro naŋgo anjam kio maroqnqai ariya e qalaqalaiyo kumbra dauryqasai di ijo anjam maro di bolesai. Ijo anjam maro di laŋa noul bulosim qatroŋkobaqas. Osim gruma bul laŋa anjam atqas.

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

Galesia 5:22

Ariya Qotei aqa Mondor na iga kumbra bole endeqaji yqajqa are tigeltetgeqnu. Qalaqalaiyo kumbra dauryoqa, areboleboleiyoqa, lawo kumbra yoqa, was naŋgi aqaryainjroqnsim kumbra bole bole enjroqa, kumbra bole tiŋtiŋ dauryoqa,

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

1 Timoti 1:18

O ijo aŋgro Timoti, Kristen gate naŋgi nami Qotei aqa medabu osib ni qa anjam babtosib wau emeb. E deqa are qalsim deqa e na anjam endi ni mermonum. Deqa ni qusim daurye. Kristen gate naŋgo anjam dena ni siŋgilatmoqnimqa ni qoto tamo bulosim kumbra uge kalil gotraŋyoqne.

1 Timoti 1:19

Gotraŋysimqa ino areqalo Yesus qa bole siŋgilat. Osim Qotei aqa ŋamgalaq di ni une saiqoji soqne. Tamo qudei naŋgi segi qalie, naŋgi une yeqnub. Ariya Qotei na naŋgo kumbra tingitetnjrqa laqnaq naŋgi olo urateqnub. Deqa naŋgi Yesus qa naŋgo areqalo siŋgilatqa asginjreqnaqa qobuŋ a sargumq di paraqas dego kere naŋgi areqalo uge ugeiysib laqnub. Kumbra dena naŋgi tulaŋ ugetnjrqas.

1 Timoti 3:9

Naŋgi Qotei aqa ŋamgalaq di une saiqoji soqnebe. Sosib anjam bole Qotei na nami iga osorgej qaji di siŋgila na ojesoqnebe. Agi iga Qotei qa gago areqalo siŋgilateqnum qaji iga anjam bole di osorgej.

2 Timoti 1:3

Ijo moma utru naŋgi nami kumbra tiŋtiŋ na Qotei aqa wau ojoqneb dego kere e bini kumbra qujai dena Qotei aqa wau ojeqnum. Ijo are miligiq di e qalieonum, e Qotei aqa ŋamgalaq di une bei saiqoji. E qolo ti qanam ti Qotei pailyoqnsim ni qa are qaloqnsim Qotei biŋiyeqnum.

2 Timoti 1:5

Nami ino moma Lois naŋgi ino ai Yunis wo Kristus qa naŋgo areqalo siŋgilatoqneb dego kere bini ni dego Kristus qa ino areqalo siŋgilatejunum. E deqa are qaloqnsim unum.

2 Timoti 2:22

Deqa areqalo uge uge kalil aŋgro wala naŋgo are miligiq dena branteqnu qaji di ni na qoreiye. Osim ni kumbra tiŋtiŋ yqajqa wauoqnsim Qotei qa ino areqalo siŋgilatoqnsim tamo kalil naŋgi qalaqalainjroqnsim are lawo na soqne. Ni ti tamo kalil are bole na Tamo Koba Qotei qa louoqnsib aqa ñam na pailyeqnub qaji naŋgi ti kumbra di yoqniye.

Taitus 1:15

Tamo uŋgasari Qotei aqa ŋamgalaq di une saiqoji unub qaji naŋgi mareqnub, “Iŋgi iŋgi kalil Qotei na atej qaji di jiga saiqoji.” Osib uyeqnub. Ariya tamo uŋgasari kumbra jigat dauryoqnsib Kristus qa naŋgo areqalo siŋgilatosaieqnub qaji naŋgi mareqnub, “Iŋgi iŋgi kalil Qotei na atej qaji di jigat.” Osib uyqa urateqnub. Di kiyaqa? Naŋgo areqalo ti naŋgo are miligi ti di tulaŋ jigat deqa.

Hibru 10:22

A na aqa segi leŋ bilentonaqa gago are miligiq aiej. A gago kumbra uge kalil qa are qalsiqa gago une kobotetgej. Deqa iga qalieonum, iga Qotei aqa ŋamgalaq di une saiqoji unum. A gago jejamu ya na yansetgej deqa kumbra gisaŋ kalil gago are miligiq di unu qaji di iga taqal waiyqom. Osim Qotei qa gago areqalo siŋgilatosim aqa areq giloqnqom. Utru deqa Yesus a na aqa segi leŋ bilentonaqa gago are miligiq aiej.

Hibru 13:18

Niŋgi iga qa Qotei pailyoqniye. Iga qalieonum, iga Qotei aqa ŋamgalaq di are gulube saiqoji unum. Iga gaigai kumbra bole dauryqajqa are qaleqnum.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

Jems 4:8

Niŋgi Qotei jojomyoqnibqa a kamba dego niŋgi jojomŋgoqnqas. O une tamo, niŋgi quiye. Tamo naŋgi naŋgo baŋ yansoqnsib jiga koboteqnub dego kere niŋgi nuŋgo are miligi gereiyoqnsib bulyoqniye. Niŋgi qudei areqalo aiye aiyelteqnub. Deqa niŋgi nuŋgo areqalo uge di olo uratoqnsib nuŋgo are miligi yansoqniye.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 3:16

Ariya niŋgi anjam siŋgila na minjraib. Niŋgi lawo kumbra na ti kumbra bole na ti naŋgi anjam minjroqniye. Osib niŋgi gaigai Qotei aqa ŋamgalaq di une saiqoji soqniye. Bole, niŋgi Kristus dauryoqnib jeu tamo naŋgi nuŋgo kumbra bole di unsib deqa niŋgi anjam uge merŋgoqnsib misiliŋgoqnqab. Ariya bunuqna naŋgi naŋgo anjam deqa olo jemainjrqas.

1 Pita 3:21

Dego kere niŋgi ya na yanso eb deqa Qotei a niŋgi dego eleŋej. A ya dena nuŋgo jejamu qaji jiga di yansetŋgosai. Niŋgi yanso eb bati deqa niŋgi Qotei pailyonab a na nuŋgo are miligi qaji jiga yansetŋgej. Qotei na Yesus Kristus olo subq na tigeltej gam dena a na niŋgi eleŋej.

1 Pita 4:8

E anjam kobaquja bei dego niŋgi merŋgit quiye. Niŋgi Qotei aqa tamo uŋgasari naŋgi tulaŋ qalaqalainjroqniye. Di kiyaqa? Qalaqalaiyo kumbra na une gargekoba kabutoqnsiqa tulaŋ buŋye-junu.

2 Pita 1:7

Osib dena niŋgi nuŋgo Kristen was qu naŋgi kadoinjrsib geregereinjroqniye. Osib dena niŋgi qalaqalaiyo kumbra dauryosib soqniye.

1 Jon 3:10

Iga kiersi qalieqom, tamo di a Qotei aqa aŋgro? Tamo di a Satan aqa aŋgro? Iga endegsi qalieqom. Tamo naŋgi kumbra tiŋtiŋ yosaieqnub qaji naŋgi Qotei aqa aŋgro sai. Tamo naŋgi Qotei aqa aŋgro naŋgi qalaqalainjrosaieqnub qaji naŋgi dego Qotei aqa aŋgro sai.

1 Jon 3:23

Qotei aqa dal anjam agiende. Iga aqa Aŋgro Yesus Kristus aqa ñam qa gago areqalo siŋgilatosim gago Kristen was naŋgi qalaqalainjroqnqom. Qotei aqa dal anjam di a na nami iga mergnaq quem.

1 Jon 3:3

Tamo kalil Kristus qa tariŋeqnub qaji naŋgo kumbra dena naŋgi naŋgo segi une olo uratoqnsib Qotei aqa ŋamgalaq di jiga saiqoji unub. Agi Kristus a segi jiga saiqoji unu dego kere.